ا.ساپاروۆ قوستاناي وبلىسى سارىكول اۋدانىنداعى بىرنەشە شارۋا قوجالىقتارى مەن ورتا جانە ءىرى اگروحولدينگتەردىڭ ەگىس القاپتارىندا بولىپ, ەگىس جۇمىستارىنىڭ بارىسىمەن تانىستى. ءوڭىر شارۋالارى جازدىق ەگىستى 4,7 ملن گەكتار جەرگە ەگۋدى جوسپارلاپ وتىر. القاپتاردىڭ باسىم بولىگى – 81%-ى نەمەسە 3,8 ملن گەكتار جەرگە – ءداندى جانە بۇرشاق داقىلدارى ەگىلمەكشى.
ءارتاراپتاندىرۋ شەڭبەرىندە بيىل قوستانايلىق شارۋالار مايلى ءداندى داقىلدارىنىڭ ەگىس القاپتارىن 700 مىڭ گەكتارعا دەيىن ارتتىرادى. بۇل 2019 جىلمەن سالىستىرعاندا 200 مىڭعا ارتىق. جەمشوپتىك داقىلداردىڭ القاپتارى 176 مىڭ گەكتارعا دەيىن ازايتىلادى (بۇرىن – 237 مىڭ گا). وبلىس اكىمدىگىنىڭ مالىمەتتەرى بويىنشا شارۋالار ەگىستىككە قاجەتتى تۇقىممەن تولىقتاي قامتىلعان, 528 مىڭ توننا تۇقىم دايىن.
ايماقتا بولعان ۆيتسە-مينيستر شارۋالارمەن مەملەكەتتىك قولداۋ, ساتىپ الۋلار جانە زاماناۋي اۋىل شارۋاشىلىعى تەحنيكاسىن, ساپالى تۇقىم قورىن پايدالانۋ سىندى بىرقاتار تاقىرىپتاردى تالقىلادى.
«تۇقىم مەن تىڭايتقىشتاردى قولدانۋ نورمالارى, باعالار, سۋبسيديالارعا قاتىستى كوپتەگەن سۇراقتار قويىلدى. شەشىمىن تاپپاي كەلە جاتقان ماسەلەلەر قاراستىرىلادى. الداعى ۋاقىتتا ولقىلىقتاردىڭ الدىن الۋ ماقساتىندا جۇمىس ىستەيمىز. سونىمەن قاتار مال شارۋاشىلىعى, ۆەتەريناريا جايىندا ماسەلەلەر كوتەرىلدى, مۇنىڭ ءبارى كۇن تارتىبىندە تۇر», – دەدى ايداربەك ساپاروۆ.
قوستانايلىق شارۋالار كەزدەسۋ ناتيجەسىنە كوڭىلدەرى تولىپ, مينيسترلىك تاراپىنان جاسالعان كەرى بايلانىسقا ريزاشىلىقتارىن ءبىلدىردى. سونداي-اق, كاسىپكەرلەر مەملەكەت باسشىسىنا جانە ۇكىمەتكە توتەنشە جاعداي كەزىندە كورسەتىلگەن كومەككە, اتاپ ايتقاندا ەگىن ەگۋدى قارجىلاندىرۋعا, تۇقىم, وتىن, مينەرالدى تىڭايتقىشتار, گەربيتسيدتەر مەن پەستيتسيدتەر قۇنىن سۋبسيديالاۋعا 170 ميلليارد تەڭگە كولەمىندە قولداۋ كورسەتكەنى ءۇشىن العىس ايتتى.
