2017-2018 جىلدار اراسىندا 25-تەن 58 جاسقا دەيىنگى ەكى مىڭ جۇمىسسىز ازاماتتار اراسىندا جۇرگىزىلگەن تاجىريبەگە 2000 ادام قاتىسقان. ولارعا اي سايىن 560 ەۋرو مولشەرىندە اي سايىنعى كەپىلدى جاردەماقى بەرىلىپ, مۇنى بازالىق تابىس رەتىندە قاراستىرعان.
جوبانىڭ اۆتورلارى ادامدار ۋاقىت وتە كەلە بازالىق تابىسپەن شەكتەلمەي, جۇمىس ىستەۋگە ۇمتىلادى دەپ دامەلەنگەن بولاتىن. بىراق تەگىن اقشا, كەرىسىنشە جۇمىسسىزدىق دەڭگەيىنە كەرى اسەر ەتەتىنىن كورسەتكەن. ايلىق تابىسى 560 ەۋرودان تومەن ازاماتتار تەز ارادا جۇمىستارىنان شىعىپ, جۇمىسسىزداردىڭ قاتارىن تولىقتىرۋعا اسىعىپتى. جوبانىڭ العا ءجۇرىپ كەتپەۋىنە وسى فاكتورلار سەبەپ بولىپتى.
وسى تاجىريبەنىڭ اۆتورلارىنىڭ ءبىرى وللي كانگاس جوباعا قاتىسقاندار ءوزىن وزگەلەرمەن سالىستىرعاندا بارلىق ولشەم بويىنشا باقىتتى ەكەنىن, كوڭىلىنىڭ توق ەكەنىن ايتقان. بارعا توقمەيىلسۋ ءوزىن-ءوزى جەتىلدىرۋگە اپاراتىن جولىن كەسىپ تاستايتىنىن جوبا اۆتورلارى ەستەن شىعارىپ العانعا ۇقسايدى.
ال 2018 جىلدارى سول ەلدە جۇمىسسىزدار قاتارى 27 پايىزعا دەيىن ءوستى. قازىر فينليانديا ۇكىمەتى ءتيىمسىز بولعاندىقتان حالىقتى قولداۋ شاراسى رەتىندە شارتسىز بازالىق تابىس يدەياسىنان باس تارتىپ, تابىس سالىعىن ەنگىزۋ مۇمكىندىگىن قاراستىرۋدا.
ساراپشىلار بۇل يدەيا جاڭالىق ەمەس ەكەنىن ايتادى. بۇل يدەيا 503 جىل بۇرىن جارىق كورگەن توماس موردىڭ «ۋتوپياسىندا» ايتىلىپتى. توماس مور ء«اربىر جۇمىس ىستەپ جۇرگەن ازاماتقا مەملەكەت بازالىق كوتەرمەلەۋ تابىستارىن بەرىپ تۇرۋ كەرەك. سول كەزدە عانا باقىتتى ادامداردىڭ قوعامىن قالىپتاستىرامىز» دەگەن. فينليانديادان كەيىن مۇنداي ەكسپەريمەنتتەر بۇكىل الەمدە وتكىزىلەدى. كەنيانىڭ باتىسىنداعى اۋىلداردىڭ بىرىندە جاسى 22-دەن اسقان ازاماتتار اي سايىن 22 دوللار الىپ تۇرادى ەكەن. ءبىر قىزىعى بۇل قارجى ەلدىڭ بيۋدجەتىنەن ەمەس, حالىقارالىق ۇيىمداردىڭ ەسەبىنەن تولەنىپ تۇرادى. يتاليا ۇكىمەتى دە بەرىگە دەيىن «ازاماتتىڭ بازالىق تابىسى» اتتى جوسپار ازىرلەپ, اي سايىن 150 ەۋرو كولەمىندە بازالىق كوتەرمە تابىس بەرىپ تۇرعان.
بازالىق تابىستىڭ جاقتاستارى بۇل كەدەيلىكپەن كۇرەسۋگە كومەكتەسەدى دەپ سانايدى, ويتكەنى ادامدارعا جۇمىس ىزدەۋگە ۋاقىت نەمەسە جاڭا كاسىپتى وقۋعا مۇمكىندىك بەرەدى دەپ ۇمىتتەنەدى ەكەن.
