سپورت • 11 مامىر، 2020

نەمىس فۋتبولىنىڭ اڭىزى ميروسلاۆ كلوزە باپكەرلىككە بەت بۇردى

24 رەت كورسەتىلدى

گەرمانيا ۇلتتىق قۇراماسى تاريحىندا ەڭ كوپ گول سوققان اڭىز شابۋىلشى ميروسلاۆ كلوزە كەلەسى ماۋسىمنان باستاپ، بۋندەسليگانىڭ بايەرن ميۋنحەن كومانداسىنىڭ كومەكشى باپكەرى رەتىندە قىزمەتىن باستاماق. بۇل تۋرالى فۋتبولشىنىڭ ءوزى «جاتتىقتىرۋشى رەتىندە بۇل مەنىڭ  ەڭ ۇلكەن قادامىم» دەپتى.

بۋندەسليگانىڭ ماۋسىمدىق ويىندارى بۇيىرسا، الداعى مامىر ايىنىڭ 16-نان باستالماق. بايەرن ميۋنحەن كومانداسى وتكەن ايدا باس باپكەر حانسي فليكپەن جاساعان شارتىن ۇزارتتى. 2014  جىلى نەمىس قۇراماسى الەم چەمپيوناتىندا اسىر سالىپ، توپ جارعان تۇستا وسى حانسي فليك بۇگىنگى كلوزە سياقتى كومەكشى باپكەر قىزمەتىن اتقارىپ جۇرگەن بولاتىن. سوندىقتان دا بۇل ەكەۋى ادامي تۇرعىدان دا، كاسىپتىك تۇرعىدان دا ءبىر-ءبىرىن جاقسى بىلەدى.

ميروسلاۆ كلوزە 2001-2014 جىلدارى گەرمانيا قۇراماسىنىڭ بەلدى ويىنشىسى رەتىندە تانىلعان تۇلعا. وسى ارالىقتا قۇراما ساپىندا 137 ويىن وتكىزىپ، 71 گولدىڭ اۆتورى اتانعان. ال بايەرن ميۋنحەن قۇرامىندا 98 ويىن وتكىزىپ، 24 گول سوققان ەكەن. بۇگىندەرى 41 جاسقا تولىپ وتىرعان بۇل ازامات 2016 جىلى ۇلكەن سپورتپەن قوشتاسىپ، بۇعان دەيىن جاسوسپىرىمدەر كومانداسىن جاتتىقتىرىپ كەلگەن بولاتىن.

سوڭعى جاڭالىقتار

ۇقساس جاڭالىقتار