قازىرگى تاڭدا قالادا 200-گە جۋىق سوعىس ارداگەرى مەن 14 مىڭنان استام تىل مايدانىنىڭ قاتىسۋشىلارى تۇرادى. اسكەري قىزمەتشىلەر ولارمەن تىعىز بايلانىستا, حال-جاعدايلارىن ءبىلىپ وتىرادى, تۇرمىستارىنا كومەك كورسەتەدى.
جەڭىس كۇنى قارساڭىندا اسكەري قىزمەتشىلەر قۇتتىقتاپ قايتقانداردىڭ قاتارىندا الماتى جانە الماتى وبلىسىنىڭ قۇرمەتتى ازاماتى, «كازاحستانسكايا پراۆدا» گازەتى اتىنداعى حالىقارالىق مايداندىق كلۋبىنىڭ پرەزيدەنتى, گۆارديا پولكوۆنيگى لەونيد گيرش, قازاق كسر حالىق ءارتىسى, مەملەكەتتىك سىيلىقتىڭ لاۋرەاتى يۋري پومەرانتسەۆ, سوعىستى باسىنان وتكەرىپ, كەيىن قاراپايىم ساربازداردىڭ ەرلىكتەرىن ءوزىنىڭ تۋىندىلارىندا بەينەلەگەن جازۋشى ءابدىجامىل نۇرپەيىسوۆ تە بار.
سونىمەن قاتار نۇر-Cۇلتاندا اسكەري قىزمەتشىلەر ۇلى وتان سوعىسىنداعى جەڭىستىڭ 75 جىلدىعىمەن ارداگەرلەردى قۇتتىقتاپ, تۇرعىن ۇيلەردىڭ اۋلالارىندا كونتسەرتتەر قويدى.
ۇلتتىق اسكەري-پاتريوتتىق ورتالىعىنىڭ ورتالىق ءانسامبلى ارتىستەرى پاتريوتتىق شىعارمالار مەن سوعىس جىلدارىنىڭ اندەرىن ورىندادى, قالا كوشەلەرىمەن اۆتوكولىكپەن ءجۇرىپ ءوتىپ, تۇرعىن ۇيلەردىڭ اۋلالارىنا كىرىپ, مەرەكەنىڭ باستى باتىرلارى – ارداگەرلەر مەن جەرگىلىكتى تۇرعىنداردى قۇتتىقتادى. كورەرمەندەر قويىلعان كونتسەرتتى جاقسى باعالاپ, اسكەري ارتىستەرگە العىستارىن ءبىلدىردى. ودان باسقا اقمولا گارنيزونىنىڭ اسكەري قىزمەتشىلەرى ۇيدە وتىرعان ارداگەرلەردىڭ جاعدايىن سۇراپ قايتتى.
