توتەنشە جاعدايدىڭ سالدارىنان كەڭ كولەمدە اتالماسا دا, بۇل كۇنى جەڭىس الاڭى بوس بولمادى. كۇردەلى جوندەۋدەن ءوتىپ, جاڭعىرىپ قالعان الاڭدا بۇل كۇننىڭ قادىر-قاسيەتىن ۇقتىراتىن مازمۇندىق پيوندار – جارنامالىق تاقتالار كوبەيىپتى. وندا ءىى دۇنيەجۇزىلىك الاپات سوعىسقا قاتىسقان قازاقستاننىڭ, سونىڭ ىشىندە باتىس قازاقستان ءوڭىرىنىڭ ۇلەسى بارىنشا ناقتى كورسەتىلگەن.
وسى مەيرام قارساڭىندا جەڭىس الاڭىندا اسپان استىندا اشىلعان اسكەري تەحنيكالاردىڭ مۇراجايى اشىلعان بولاتىن. مۇندا سول زاماننىڭ اتاقتى «پولۋتوركا» جۇك كولىگى, 1943 جىلى سۋاستى ميناسىنىڭ ۇلگىسى, «تورپەدا» زىمىرانى قويىلعان. ايتا كەتەيىك, بۇل مينا مەن زىمىران ورال قالاسىنداعى «زەنيت» زاۋىتىندا جاسالعان! بۇدان بولەك الاڭداعى مۇراجايدا شىنجىرتابان اسكەري تەحنيكالار, زەڭبىرەكتەر قويىلعان. كارانتين اياقتالىپ, ىندەت سەيىلسە, بۇل جەر ۇلكەن-كىشىنىڭ ءجيى جيىلىپ, ارنايى كەلەتىن مادەني ورىنعا اينالعالى تۇر ەكەن.
ۇلى وتان سوعىسى جىلدارىندا باتىس قازاقستان وبلىسىنان قان مايدانعا 76265 ادام الىنىپ, سونىڭ 36548-ءى عانا ءتىرى ورالعان ەكەن. مايداننان العان جاراقاتىنان مۇگەدەك بولىپ, تۇرمىس قيىندىعىن تارتقاندار قانشاما! باتىسقازاقستاندىق 39 جاۋىنگەر كەڭەس وداعىنىڭ باتىرى اتاعىن السا, 6 ادام «داڭق» وردەنىنىڭ تولىق يەگەرى اتانعان. بۇگىندە وسى قىرعىنعا قاتىسقان, قانىن توككەن, جانىن بەرگەن بارشا بوزداقتىڭ ەسىمى ءدال وسى جەڭىس الاڭىندا تاسقا قاشاۋلى تۇر.
- قادىرلى ارداگەرلەر, قىمباتتى جەرلەستەر, بارشاڭىزدى ۇلى جەڭىستىڭ 75 جىلدىعىمەن شىن جۇرەگىمنەن قۇتتىقتايمىن! جەڭىس كۇنى – جاھاندىق سۇراپىل سوعىستا ارىن – بايراق, نامىسىن – نايزا ەتكەن ارداگەر بابالارىمىزدىڭ جانقيارلىق ەرلىكپەن, قايسارلىقپەن جەڭىس جالاۋىن جەلبىرەتىپ, بۇگىنگى ۇرپاققا اشىق اسپان, بەيبىت كۇندى امانات ەتىپ جەتكىزگەن قاستەرلى مەرەكەسى. پرەزيدەنتىمىز قاسىم-جومارت توقاەۆ اتاپ وتكەندەي, ءبىز ەرجۇرەك اعا بۋىننىڭ الدىندا ماڭگى قارىزدارمىز. ولاردىڭ قايسارلىعى مەن توزىمدىلىگىنىڭ, تاباندىلىعى مەن پاتريوتتىعىنىڭ ارقاسىندا بەيبىت زاماندا ءومىر ءسۇرىپ, جارقىن بولاشاعىمىزعا جول اشتىق, - دەدى سالتاناتتى جيىندا ءسوز العان ورال قالاسىنىڭ اكىمى ابات شىنىبەكوۆ.
قالا اكىمى اتاپ وتكەندەي, مەملەكەت ارداگەرلەردى قولداۋ ءۇشىن بارلىق جاعدايدى جاساۋدا. ۇلى جەڭىستىڭ 75 جىلدىعى قارساڭىندا ورال قالاسىنداعى 48 سوعىس ارداگەرى 1 ميلليون تەڭگە كولەمىندە ماتەريالدىق كومەك الدى. كونتسلاگەر تۇتقىنىندا بولعاندار مەن لەنينگرادتى قورعاۋشىلارعا 120 مىڭ تەڭگەدەن, تىل ارداگەرلەرى مەن ارداگەرلەر جەسىرلەرىنە 30 تەڭگەدەن كومەك كورسەتىلدى.
جەڭىستىڭ 75 جىلدىق مەرەكەسىنە وراي قالامىزداعى ەڭ كورىكتى مەكەن - «جەڭىس الاڭى» قايتادان جاڭارتىلدى, «داڭق مەموريالى» باتىسقازاقستاندىق ساربازداردىڭ ەسىمدەرى مەن فوتولارىمەن جاڭادان بەزەندىرىلدى. ۇلى جەڭىسكە زور ۇلەس قوسىپ, جاۋعا اتىلعان 10 وقتىڭ توعىزىن دايىنداعان تىل ارداگەرلەرىنىڭ قۇرمەتىنە «تىل ەڭبەككەرلەرىنە تاعزىم» بارەلەفى ورناتىلدى. اللەيالارعا باتىسقازاقستاندىق جاۋىنگەرلەردىڭ قوسقان ۇلەسى تۋرالى اقپاراتتىق تاقتالار قويىلدى, سوعىستىڭ نەگىزگى وقيعالارى مەن كەزەڭدەرىن بەينەلەيتىن سۋرەتتەر, ماڭىزدى داتالار ەنگىزىلدى. ەلىمىزدەگى توتەنشە جاعداي رەجيمى مەن كارانتين تارتىبىنە بايلانىستى جەڭىستىڭ 75 جىلدىق مەرەكەسىنە ارنالعان ءىس-شارالاردىڭ كوبى قاشىقتان, ونلاين فورماتتا ۇيىمداستىرىلىپ جاتىر, - دەدى قالا اكىمى.
ءيا, جىل وتكەن سايىن سول ءبىر قاندى قىرعىننىڭ كۋاگەرلەرى, جەڭىس ساربازدارى ازايىپ بارادى. باتىس قازاقستان وبلىسىندا نەبارى 62 ارداگەر قالىپتى. قاتارى سەلدىرەپ قالعان قارۋلاستارىنىڭ اتىنان بۇگىن الاڭعا كەلگەن حامزا سافين, يۆان گاپيچ, تىل ارداگەرى مەرۋەرت جولدىقايىرقىزى بۇگىنگى سالتاناتتى ءوز كوزدەرىمەن كورگەنى ءۇشىن باقىتتى ەكەنىن ايتتى.
وسىدان ءدال 75 جىل بۇرىن وبلىستىق راديونىڭ ەفيرىنەن جەڭىس حابارىن جاريالاعانىم ەسىمدە. «تىڭداڭىزدار, تىڭداڭىزدار! ورالدان سويلەپ تۇرمىز! بۇگىن حالقىمىزدىڭ اڭساپ كۇتكەن ۇلى جەڭىس كۇنى! فاشيستىك گەرمانيانىڭ باسقىنشى ارمياسىن سوۆەتتىك قىزىل ارميانىڭ سولداتتارى ءوز جەرىندە, ءوز توپىراعىندا, ءوز ۇڭگىرىندە ماڭگىلىك باسىن كوتەرمەستەي ەتىپ جەڭدى! بۇگىن ۇلى جەڭىس كۇنى! قۋانىڭدار! شاتتانىڭدار!» - دەپ جۇرەگىمىز جارىلا حابارلاعان ءسۇيىنشى جاڭالىققا 75 جىل ءوتىپتى. بۇل كۇن اعا ۇرپاقتىڭ جانقيارلىق ءىسىن ەل جادىندا ساقتاپ قالۋعا ارنالعان ەڭ قاستەرلى مەرەكە. بۇگىنگى تاۋەلسىزدىك باياندى بولسىن, ەلىمىز بۇگىنگى ىندەتتى دە جەڭىپ, ءار وتباسى باقىتتى بولسىن, - دەدى مەرۋەرت جولدىقايىرقىزى.
بۇدان كەيىن ارداگەرلەر, جينالعان حالىق قان مايداندا قازا تاپقان بوزداقتاردىڭ رۋحىنا ءبىر مينۋت ءۇنسىز تۇرىپ قۇرمەت كورسەتىپ, ماڭگىلىك الاۋ باسىنا گۇل شوقتارىن قويدى. ارداگەرلەر ارنايى دايىندالعان ەلەكتروموبيلگە وتىرىپ, الاڭداعى جاڭا وزگەرىستەرمەن تانىستى. گيد رولىندە قالا اكىمى ابات اباي ۇلىنىڭ ءوزى ءجۇردى.
بۇدان كەيىن ارداگەرلەردىڭ ءبىر توبىن وبلىس اكىمى عالي ەسقاليەۆ قابىلداپ, قۇرمەت كورسەتتى. وعان قوسا ورال قالاسىندا تۇراتىن ءار ارداگەردىڭ ۇيىنە ارنايى كولىك اتتاندى. كارانتين جاعدايىنا بايلانىستى ولاردىڭ ارقايسىسىنىڭ ءۇيى جانىندا شاعىن كونتسەرت قويىلىپ, مەرەكەلىك سىي-سياپات بەرىلمەك.
بۇعان قوسا جەرگىلىكتى سپورت مەكتەپتەرىنىڭ وقۋشىلارى جەڭىستىڭ 75 جىلدىعى قۇرمەتىنە وبلىس ورتالىعىنىڭ كوشەلەرىمەن ۆەلوشەرۋ جاساپ ءجۇرىپ ءوتتى.
باتىس قازاقستان
