ايتالىق, بيىلعى 2020 جىلعى اقپان ايىنىڭ اياعىندا نۇر-سۇلتان مەن اقتوبە قالالارىنىڭ ارالىعىندا ۇشا باستاعان اۋە رەيسىنىڭ باعاسى قاراپايىم تۇرعىندار مەن ستۋدەنتتەر جانە زەينەتكەرلەر ءۇشىن قولجەتىمدى بولىپ وتىر. ياعني الدىن-الا جوسپارلاعان جاعدايدا اقتوبەدەن نۇر-سۇلتان قالاسىنا ۇشىپ بارۋ ءۇشىن 7999 تەڭگە نەمەسە الماتىعا 11999 تەڭگەگە اۋە بيلەتىن ساتىپ الۋعا بولادى.
الەۋمەتتىڭ قارىم-قاتىناس جاساۋى ءۇشىن جاسالعان وڭدى قادام «ەير استانا» اۋە كومپانياسىنىڭ پرەزيدەنتى پيتەر فوستەر مەن اقتوبە وبلىسىنىڭ اكىمى وڭداسىن ءورازاليننىڭ وتكەن جىلى جاساعان ءوزارا ۋاعدالاستىعىنان كەيىن شەشىمىن تاپتى دەۋگە ابدەن بولادى. سونىڭ ناتيجەسىندە بيىلعى جىلدىڭ باسىندا «FlyArystan» اۋە كومپانياسى اقتوبە مەن نۇر-سۇلتان قالاسىنىڭ اراسىنان جاڭا رەيس اشاتىندىعى بەلگىلى بولدى. سونداي اق وسى ەكىجاقتى كەزدەسۋدە «اقتوبە» حالىقارالىق اۋەجايىندا كومپانيانىڭ وڭىرلىك بازالىق بەكەتىن قۇرۋ جونىندە دە ىسكەرلىك سيپاتتاعى اڭگىمەلەر قوزعالعان-دى.
بۇگىنگى كۇنى ونىڭ ءبارى قۇر بوس ءسوز كۇيىندە قالماي, ناقتى ىسكە اينالعانى, ءسويتىپ اتالعان ارالىقتا زاماناۋي Airbus A320 اۋەلاينەرى رەسپۋبليكامىزدا توتەنشە جاعداي جاريالانعان كەزگە دەيىن اپتاسىنا ءتورت رەت قاتىناي باستاعانى ايقىن ايعاق. ونىڭ اقتوبە مەن نۇر-سۇلتان قالالارى اراسىنا ۇشۋ ۇزاقتىعى 1 ساعات 50 مينۋتتى قۇرايدى. اۋە تاسىمالداۋشىلاردىڭ ايتۋىنشا الداعى ماۋسىم جانە شىلدە ايىنان باستاپ 180 ورىنعا ارنالعان كومفورتابەلدى ۇشاقتار اقتوبەدەن الماتىعا ۇشا باستاماق.
- الداعى ۋاقىتتا كومپانيانىڭ جاڭا بەكەتى قاراعاندى قالاسىندا دا اشىلادى. سول ۋاقىتتا جولاۋشىلار اقتوبە مەن قاراعاندىنىڭ اراسىنا ۇشاقپەن تىكەلەي قاتىناي الادى. ءبىز بۇگىنگى كۇنى جەرگىلىكتى اتقارۋشى ورگاندار وكىلدەرىمەن تەك ىشكى رەيستەر عانا ەمەس, سونىمەن بىرگە شەت ەلدەرگە دە باعىتتار اشۋ جونىندە كەلىسىمگە كەلۋدى ويلاستىرىپ وتىرمىز. بۇل ءىستىڭ ءبىرىنشى لەگىندە «اقتوبە» حالىقارالىق اۋەجايى تۇر دەدى گازەت تىلشىسىنە. «FlyArystan» اۋەكومپانياسى جەر ءۇستى قىزمەتىنىڭ ديرەكتورى دانيار وسكەنباەۆ.
ايتا كەتەرلىك جايت, ەلىمىزدە سovid-19 ىندەتى باستالعان ۋاقىتقا دەيىن جوعارىدا اتالعان باعىتتارعا ۇشا باستاعان رەيس سالوندارىندا جولاۋشىلار تولىق جانە تولىققا تاياۋ بولعاندىعى. بۇل كورىنىس جاڭا باعىتتار قاي تۇرعىدان دا ءتيىمدى بولا الاتىنىن تانىتسا كەرەك. مەملەكەت باسشىسى قاسىم-جومارت توقاەۆ وتكەن جىلى اۋە بيلەتىنىڭ باعاسى نەگىزسىز وسپەۋى, ءارى قىمباتتاماۋى, بۇل باعىتتا ورىن العان ۇستىرتتىكتەر رەتكە كەلتىرىلۋى كەرەكتىگىن اتاپ وتكەنى ءمالىم. بۇگىنگى ماتەريالىمىزعا ارقاۋ بولعان دەرەكتەر پرەزيدەنت تاپسىرماسىنا وراي تىندىرىلعان وڭ قادامنىڭ ءبىرى بولا الادى دەمەكپىز.
