ۇلى جەڭىستىڭ 75 جىلدىعىنا وراي بۇگىن تاراز قالاسىنىڭ اكىمى ايتقازى قارابالاەۆ قالا تۇرعىنى, ۇلى وتان سوعىسىنىڭ ارداگەرى ءمۇتالىپ ەرەجەپباەۆتىڭ شاڭىراعىنا بارىپ, قارت مايدانگەردى جەڭىس مەرەكەسىمەن قۇتتىقتادى. ايتقازى قارابالاەۆ بۇگىندە 95 جاسقا كەلىپ وتىرعان قارياعا وبلىس اكىمى بەردىبەك ساپارباەۆتىڭ مەرەكەلىك ىستىق لەبىزىن جەتكىزىپ, لايىقتى قۇرمەت كورسەتتى. «تالاس اۋدانىنان 1944 جىلى اسكەر قاتارىنا شاقىرىلىپ, ۇلى جەڭىستەن سوڭ ايگىلى برەست قامالىن قالپىنا كەلتىرۋگە قاتىستىم. ەلگە ورالعان سوڭ تالاس اۋداندىق «لەنين جولى» گازەتىندە العاش جاۋاپتى حاتشى, كەيىننەن رەداكتور بولىپ قىزمەت اتقاردىم.
تالاس اۋدانىنىڭ قۇرمەتتى ازاماتى اتاندىم. «اتاقونىس», «ولەڭىم – ءومىرىم» جانە تاعى دا باسقا كىتاپتارىم جارىق كوردى. اۋداننىڭ, وبلىستىڭ دامۋى مەن گۇلدەنۋىنە كەزىندە ءوز ۇلەسىمدى قوستىم», دەگەن ارداگەر اقىن ءمۇتالىپ ەرەجەپباەۆ جينالعاندارعا ءوزىنىڭ جازعان ولەڭىن وقىپ بەردى. سونداي-اق, وزىنە كورسەتىلگەن قۇرمەتكە ريزاشىلىعىن ءبىلدىرىپ, اۆتورلىق كىتابىن قالا اكىمى ايتقازى قارابالاەۆقا سىيلادى.
جامبىل وبلىسى
