بەردىبەك ساپارباەۆ قۇرمەتتى ارداگەردى ۇلى جەڭىس كۇنىمەن قۇتتىقتاپ, مايدانگەرگە زور دەنساۋلىق جانە اماندىق تىلەدى. اكىم قارياعا گۇل شوقتارىمەن قاتار, جەمىس-جيدەك سەبەتتەرى مەن ءبىر ميلليون تەڭگەلىك سەرتيفيكاتىن تاپسىردى. مۇساحان بەردىباەۆ بۇل كۇندە 99 جاسقا جەتىپ وتىرعان ابىز قاريا. ول تاريحتاعى اۋىر ءارى سۇراپىل ستالينگراد جانە كۋرسك شايقاستارىنا قاتىسقان ارداگەر. اڭگىمە بارىسىندا مۇساحان اتا مايدانداعى سول ءبىر قيىن-قىستاۋ كۇندەردى ەسكە الىپ, ەندى سوعىس بولماۋىن تىلەدى. ول مايدان دالاسىندا جاۋ وعىنان امان قالعانىمەن, 1945 جىلدىڭ باسىندا اۋىر جارالانادى. بەس اي اۋرۋحانادا ەمدەلىپ, مۇگەدەكتىك الادى. جىلدار وتكەن سايىن مۇساحان اتا سوعىس زاردابىن تارتىپ كەلەدى ەكەن. ءتىپتى جاقىندا اقساقالدىڭ كوزىنىڭ كورۋ قابىلەتى ناشارلاپتى. بىرنەشە ولەڭدەر جانە باتالار جيناعىنىڭ اۆتورى اتانعان مۇساحان بەردىباەۆ بۇل كۇندە نەمەرە-شوبەرەلەرىنىڭ ورتاسىندا ءتىرى تاريح جانە دانالىق كوزى بولىپ ءومىر ءسۇرىپ وتىرعان ارداقتى اقساقال.
سونداي-اق بەردىبەك ساپارباەۆ انتونينا بەلياەۆانىڭ شاڭىراعىنا دا ارنايى بارىپ, ۇلى جەڭىستىڭ 75 جىلدىعىمەن قۇتتىقتادى. بۇگىندە 93 جاستاعى ارداگەر اۋىر بولسا دا وتكەن كۇندەردەن ەستەلىك ايتتى. 1944 جىلى جەدەل جاردەم پويىزىنا وتىرىپ, بۇكىل ەۋروپانى ارالاپ, جەڭىس كۇنىن كەنيگسبەرگتە قارسى العانىن قىزىقتى ەتىپ باياندادى. ول 1946 جىلى مايداننان ورالعان سوڭ بۇكىل ءومىرىن جامبىل قالاسىنداعى كاسىپورنىندا جۇمىس ىستەۋگە ارناعان ەكەن. بەردىبەك ساپارباەۆ انتونينا بەلياەۆاعا دا پرەزيدەنت قاسىم-جومارت توقاەۆتىڭ قۇتتىقتاۋى مەن ءبىر ميلليون تەڭگەلىك سەرتيفيكات تابىستادى. ء«بىز ءبارىمىز ءسىز سياقتى تۇلعالاردى قۇرمەت تۇتۋىمىز كەرەك. ەل ءۇشىن ەڭ قيىن جىلدارى ءسىز ءوز جەرىڭىزدى جاۋدان قالاي قورعاۋ كەرەكتىگىن دالەلدەدىڭىز. سول ءۇشىن سىزدەرگە باس يەمىز», دەدى بەردىبەك ساپارباەۆ.
جامبىل وبلىسى
