بۇرىننان ءبىزدىڭ وسى ماسەلەگە قاتىستى ءوز ويىمىز بار. ارحيۆتەردىڭ بارلىعىن مادەنيەت جانە سپورت مينيسترلىگىنە باعىندىرۋ - بارىپ تۇرعان ساۋاتسىزدىقتىڭ كورىنىسى دەپ ويلايمىز. ءبىزدىڭ ويىمىزشا, قازاقستان ۇكىمەتىنىڭ جانىنان تىكەلەي پرەمەر-مينيستر مەن ۇكىمەت اپپاراتىنا تىكەلەي باعىناتىن قازاقستان رەسپۋبليكاسىنىڭ ارحيۆ باسقارماسى قۇرىلۋى ءتيىس. ارحيۆ باسقارماسىنىڭ باسشىسىندا ارنايى ءبىلىم بولۋى ءتيىس. كەزىندە, حاساناەۆ مارات جاقسىباي ۇلى سىندى مىقتى ارحيۆ مامانى بولعان ەدى. سونداي مىقتى مامانداردىڭ ءبىرى بۇل سالانى باسقارسا قۇبا-قۇپ بولار ەدى.
ەكىنشىدەن, ارحيۆتەردەگى بۇكىل قۇجاتتى باس جوق, كوز جوق تسيفرلاندىرۋ دۇرىس ەمەس! ول ۇلكەن شىعىن. سەبەبى, مازمۇنى ءبىر نەمەسە كوشىرمە قۇجاتتار وتە كوپ قايتالانادى. ءبىزدىڭ ويىمىزشا, ءاربىر ارحيۆ جانىنان ارنايى كوميسسيالار قۇرىلىپ, سول كوميسسيالار شەشىمىمەن قۇجاتتاردى تسيفرلاندىرعان ءجون.
ۇشىنشىدەن, ارحيۆتەردەگى قۇجاتتاردى جاپپاي تسيفرلاندىرۋعا ۇشان-تەڭىز اقشا جىبەرگەنشە, قاجەتتى قۇجاتتاردى باسىپ-شىعارۋ جانە جاريالاۋعا دا ماڭىز بەرگەن ءجون. مىسالى, پرەزيدەنت ارحيۆىندەگى كيرورگبيۋرو - كيربيۋرو - كيروبكوم - كيركرايكوم - كازكرايكوم - تسك كپك قۇجاتتارىن باسپادان باسىپ شىعاراتىن كەز جەتتى دەپ ەسەپتەيمىز. بيۋرو مەن سەكرەتاريات ماجىلىستەرىنىڭ حاتتامالارىن رەسەيدەگىدەي باسىپ شىعارۋ اسا قاجەت! سونىمەن قاتار, پارتكونفەرەنتسيالار مەن سەزدەردىڭ ستەنوگرافيالىق ەسەپتەرى مەن ولارعا دايىندالعان ەسەپتىك ماتەريالدار جيناقتارىن, پلەنۋمداردىڭ ستەنوگرافيالىق ەسەپتەرى مەن قاۋلىلارىن, ماتەريالدار جيناعىن تۇگەل شىعاراتىن كەز جەتتى. اقشانى وسى سالاعا جىبەرگەن ءجون دەپ ەسەپتەيمىز. سول سياقتى, ورتالىق مەملەكەتتىك ارحيۆتەگى قازواك پەن قازحالكوم حاتتامالارىن تۇگەل باسىپ شىعارىپ, كىتاپحانالارعا تاراتقان ءجون. سونداي قازاقاكسر كەڭەستەرىن سەزدەرىنىڭ, قازواك سەسسيالارىنىڭ, قازاقستان جوعارعى كەڭەسى مەن ونىڭ سەسسيالارىنىڭ ستەنوگرافيالىق ەسەپتەرى مەن ولارعا دايىندالعان ماتەريالداردى, قاۋلى-قارارلارى مەن شەشىمدەرىن تۇگەل باسىپ شىعارۋ قاجەت دەپ ەسەپتەيمىز.
مىنە وسىنداي جۇمىستار ۇلت تاريحىن تانۋدىڭ جاڭا بەلەسىنە جول اشىپ, ارحيۆ قۇجاتتارىن تسيفرلاندىرۋدىڭ جارقىن ۇلگىسى بولماق دەپ ويلايمىز. ويتكەنى, ءبىزدىڭ قازاقستان ارحيۆتەرىندەگى جاريالاۋ بولىمدەرىنىڭ جۇمىسى وتە ءالسىز. ارحيۆ قۇجاتتارىن جاريالاۋدى ءوز دەڭگەيىنە كوتەرۋ كەرەك دەپ ويلايمىز.
«تورعاي سويسا دا, قاساپشى سويسىن!» دەيتىن ءپرينتسيپتى ۇستانساق, 1997-98 جىلدارى كوتەرىلىپ, ءالى كۇنگە ورىندالماي كەلە جاتقان «كاسىپقوي مەملەكەت» قۇرۋ ماقساتىنا جاقىنداي تۇسەر ەدىك.
ءسابيت شىلدەباي
