قازىرگى تاڭدا قالادا 200-گە جۋىق سوعىس ارداگەرلەرى مەن 14 مىڭنان استام تىل مايدانىنىڭ قاتىسۋشىلار تۇرادى. اسكەري قىزمەتشىلەر ولارمەن تىعىز بايلانىستا, قال-جاعدايلارىن ءبىلىپ تۇرادى, تۇرمىستارىنا كومەك كورسەتەدى.
جەڭىس كۇنى قارساڭىندا اسكەري قىزمەتشىلەر قۇتتىقتاپ قايتقانداردىڭ قاتارىندا الماتى جانە الماتى وبلىسىنىڭ قۇرمەتتى ازاماتى, «كازاحستانسكايا پراۆدا» گازەتى اتىنداعى حالىقارالىق مايداندىق كلۋبىنىڭ پرەزيدەنتى گۆارديا پولكوۆنيگى لەونيد گيرش, قازاق كسر حالىق ءارتىسى, مەملەكەتتىك پرەميا لاۋرەاتى, ءارتىس يۋري پومەرانتسەۆ, سوعىستى باسىنان وتكەرىپ, كەيىن قاراپايىم ساربازداردىڭ ەرلىكتەرىن ءوزىنىڭ تۋىندىلارىندا بەينەلەگەن جازۋشى ءابدىجامال نۇرپەيىسوۆ تا بار.
سونىمەن قاتار, نۇر-Cۇلتاندا اسكەري قىزمەتشىلەر ۇلى وتان سوعىسىنداعى جەڭىستىڭ 75 جىلدىعىمەن ارداگەرلەردى قۇتتىقتاپ, تۇرعىن ۇيلەردىڭ اۋلالارىندا كونتسەرتتەر قويدى.
قر قك ۇلتتىق اسكەري-پاتريوتتىق ورتالىعىنىڭ ورتالىق ءانسامبلى ارتىستەرى پاتريوتتىق شىعارمالار مەن سوعىس جىلدارىنىڭ اندەرىن ورىندادى, قالا كوشەلەرىمەن اۆتوكولىكپەن ءجۇرىپ ءوتىپ, تۇرعىن ۇيلەردىڭ اۋلالارىنا كىرىپ, مەرەكەنىڭ باستى باتىرلارى – ارداگەرلەر مەن جەرگىلىكتى تۇرعىنداردى قۇتتىقتادى. كورەرمەندەر قويىلعان كونتسەرتتى جاقسى باعالاپ, اسكەري ارتىستەرگە العىستارىن ءبىلدىردى. ودان باسقا اقمولا گارنيزونىنىڭ اسكەري قىزمەتشىلەر ۇيدە وتىرعان ارداگەرلەردىڭ جاعدايىن سۇراپ قايتتى.
9 مامىردا تاڭەرتەڭگى 10.00-دەن 13.00-گە دەيىن اسكەري قىزمەتشىلەر تاعى دا نۇر-سۇلتان قالاسىنىڭ ءار ءتۇرلى جەرلەرىندە كونتسەرت بەرەتىن بولادى.
سۇراپىل سوعىستا الدىڭعى قاتاردا تۇرعان جانە تىلدا ءجۇرىپ جەڭىسكە جەتۋدى كوزدەگەن ۇلى وتان سوعىسىنىڭ باتىرلارىنىڭ ارقايسىسىنىڭ جاۋىنگەرلىك جولى مەن ەرلىگى ۇرپاق جادىندا ماڭگى ساقتالۋى كەرەك. وكىنىشكە وراي, جىلدان جىلعا سوعىس ارداگەرلەرىنىڭ سانى ازايىپ كەلەدى, ولاردىڭ ەڭ كىشىسى توقسانعا تولۋ مەرەيتويىن اتاپ ءوتتى.
