وبلىس اۋماعىنان سوعىستىڭ ءتورت جىلىندا 74 مىڭ ادام سوعىسقا الىنىپ, ونىڭ 34 مىڭى مايدان دالاسىندا قالعان ەكەن. جەرلەستەرىمىزدىڭ جۇرگەن ءىزىن قاراساق, ولاردىڭ ەۋروپانى جاياۋ وتكەندەرىمەن قاتار قيىر شىعىستىڭ دا تاۋلى-تاستى دالاسىن بەلدەن كەشكەندەرى كوپ ەكەن. ءتىپتى سوعىستان كەيىنگى ۋكراينا, بالتىق رەسپۋبليكالارى اۋماعىنداعى ورمان ىشىنە جاسىرىنعان باندالارمەن كۇرەسكەندەر كوپ بولىپ شىقتى.
جەرلەستەرىمىزدىڭ ءبىرازى 1941 جىلى وبلىس اۋماعىندا قۇرىلعان 314-ءشى اتقىشتار ديۆيزياسىنىڭ قۇرامىندا سوعىستى. كەيىن كۋتۋزوۆ وردەنىن الىپ, «كينگيسەپپ ديۆيزياسى» دەگەن قۇرمەتتى اتاققا يە بولعان ول نوۆگورود وبلىسىندا, كارەل مايدانىندا, لەنينگراد وبلىسىنداعى «لودەينوە پولەدە» جانە ت.ب. جەرلەردە سوعىسقان. 1944 جىلى لۋگا وزەنىن كەشىپ ءوتىپ, لەنينگراد وبلىسىنداعى كينگيسەپپ قالاسىن ازات ەتۋدە ايرىقشا كوزگە تۇسكەن. سوعىستى «پراگا وپەراتسياسىنا» قاتىسىپ, 1945 جىلدىڭ 11 مامىرىندا اياقتاعان.
وتان قورعاۋشى كۇنىندە سالتاناتتى ساپقا تۇرعان پوليتسيانىڭ پەتروپاۆل گارنيزونى الدىندا جەرلەس مايدانگەرلەردىڭ وتانسۇيگىشتىگى مەن ەرلىگى تۋرالى ايتىلىپ, ىشكى ءتارتىپتى باقىلاۋ ارقىلى حالىق تىنىشتىعىن كۇزەتەتىن قىزمەتكەرلەرگە ولاردىڭ ۇلگىسىنىڭ ونەگە بولۋ كەرەكتىگى اتاپ ءوتىلدى. وسى ساپ تۇزەۋدە بىرقاتار وفيتسەرلەر مەن سەرجانتتار پوليتسيا دەپارتامەنتىنىڭ ناگرادالارىمەن ماراپاتتالدى. سالتاناتتى ساتتە التى پوليتسيا قىزمەتكەرىنە كەزەكتى اتاقپەن پوگوندار تابىس ەتىلدى. سقو پد باستىعىنىڭ ورىنباسارى پوليتسيا پولكوۆنيگى قاپەز داۋلەتباەۆ ناگرادالاردى تابىستاي وتىرا, ءوز قىزمەتتىك بورىشىن اتقارۋعا جاۋاپكەرشىلىكپەن قاراۋ - حالىقتىڭ قاۋىپسىزدىگىنىڭ كەپىلى ەكەندىگىن اتاپ ءوتتى.
سولتۇستىك قازاقستان وبلىسى
