قاسيەتتى دە قاسىرەتتى, كوزگە جاس كەلتىرىپ, كوڭىلگە مۇڭ ۇيالاتاتىن ايرىقشا اتاۋلى داتالى كۇنگە اقتوبە وبلىسى بويىنشا 29 مايدانگەر امان ەسەن جەتەدى دەپ كۇتىلگەن-ءدى. ايتسە دە مەرەكەگە ساناۋلى كۇندەر قالعاندا ولاردىڭ ءبىرى ومىردەن وزدى. بيىلعى جەڭىستىڭ 75 جىلدىق مەرەكەسىنىڭ تاعى ءبىر ەرەكشەلىگى مايدانگەرلەرگە بەرىلەتىن سىياقى ءبىر ىزگە ءتۇسىرىلىپ ولاردىڭ ءار قايسىسىنا مەملەكەت تاراپىنان ءبىر ميلليون تەڭگە بەرۋ جونىندە شەشىم قابىلدانعانى ءمالىم. ايتا كەتەرلىك ءجاي بۇل قوماقتى سىياقى بۇدان ءبىر ەكى كۇن بۇرىن ومىردەن وزعان مايدەنگەردىڭ وتباسىنا دا بەرىلدى.
قالعان 28 سوعىس مۇگەدەگى مەن سوعىسقا قاتىسۋشىلاردىڭ بارىنە دە جەرگىلىكتى اتقارۋشى ورگاندار تاراپىنان لايىقتى سىي-سىياپات پەن قۇرمەت كورسەتىلدى. سونىڭ ىشىندە وڭىردە تۇراتىن 6795 سوعىس پەن تىل ارداگەرلەرىنە وبلىستىق بيۋدجەتتەن جالپى سوماسى 341 ميلليون تەڭگە كولەمىندە ماتەريالدىق كومەك بەرىلدى. مۇنىڭ سىرتىندا «Nur Otan» پارتياسى اقتوبە وبلىستىق فيليالى جەڭىستىڭ 75 جىلدىق مەرەكەسى شەڭبەرىندە ەكىنشى دۇنيەجۇزىلىك سوعىستىڭ قاھارماندارى مەن قاتىسۋشىلارىن ماڭگى ەستە قالدىرۋ ءۇشىن الەۋمەتتىك جەلىلەردە #qaharman چەلەندجىن جۇزەگە اسىردى.
- اقتوبە ءوڭىرىنىڭ بارشا حالقىمىز ءتورت جىل كۇتكەن جەڭىستى جاقىنداتۋعا قوسقان ۇلەسى قوماقتى. مايداندا جاۋعا قارسى اتىلعان ون وقتىڭ توعىزى قازاقستاندا جاسالدى دەگەن قالىپتاسقان تۇجىرىم بار. اقيقاتى دا وسى ەكەنى انىق. بۇل ىستە 1941-1945 جىلدارى اقتوبەدەگى قورعانىس كاسىپورىندا شىعارىلعان قارۋ-جاراق تۇرلەرى دە ەلەۋلى ءرول اتقاردى دەپ بىلەمىز. ەكىنشىدەن سوعىس كەزىندە اقتوبەدە جاساقتالعان قوس بىردەي اتقىشلار ديۆيزياسى سوعىس قيمىلدارىنىڭ وڭ جاققا بەت بۇرۋىنا ىقپال جاساعانىن ۇمىتپاۋعا ءتيىسپىز. راس, ادام شىعىندارى دا از بولعان جوق. بۇل جەڭىستىڭ وڭايلىقپەن كەلمەگەنىن كورسەتەدى. جەڭىستىڭ ءتالىمى مەن تاعىلىمى وتە مول. ونىڭ رۋحى بۇگىنگى ۇرپاقتى ءوز ەلىن قوعاي ءبىلۋ مەن وتانشىلدىق سەزىمدى تەرەڭدەتە تۇسۋگە قىزمەت جاساي بەرمەك. جەڭىس مەرەكەسى قۇتتى بولسىن دەدى گازەت تىلشىسىنە اقتوبە وبلىسىنىڭ اكىمى وڭداسىن ورازالين.
اقتوبە
