بۇگىن وڭتۇستىكتەگى اعايىنعا قول ۇشىن بەرۋ ماقساتىندا ارقا توسىنەن ينجەنەرلىك جانە سۋ سورعىش تەحنيكالارمەن, سونداي-اق ءجۇزۋ قۇرالدارىمەن جابدىقتالعان قۇتقارۋشىلار توبى اتتانىپ كەتتى. ولار ماقتاارال اۋدانىنىڭ ەلدى مەكەندەرىندەگى سۋ باسۋ سالدارىن جويۋ بويىنشا اپاتتىق-قۇتقارۋ جانە باسقا دا كەزەك كۇتتىرمەيتىن جۇمىستاردى جۇرگىزۋگە كومەك كورسەتەتىن بولادى.
قۇتقارۋشىلار توبى ساپارعا اتتانباس بۇرىن, قاراعاندى وبلىستىق توتەنشە جاعدايلار جونىندەگى دەپارتامەنتتىڭ باسشىسى يبراگيم كۇلشىمباەۆ جەكە قۇرامنىڭ دايىندىق بارىسىن تەكسەرىپ, نۇسقامالىق اڭگىمە وتكىزدى. نەگىزگى نازار جەكە قۇرامنىڭ, تەحنيكا مەن جابدىقتاردىڭ ازىرلىگىن قامتاماسىز ەتۋگە, سونداي-اق تەحنيكا قاۋىپسىزدىگى ماسەلەلەرىنە اۋدارىلدى.
اتالعان دەپارتامەنت باسشىسى جەكە قۇرام قۇتقارۋشىلارىنا جۇكتەلگەن مىندەتتەردى ورىنداۋ بارىسىندا بارىنشا توزىمدىلىك تانىتۋ تالاپ ەتىلەتىندىگىن ەسكەرتتى.
ەسكە سالساق, مامىر ايىنىڭ 1-ءشى جۇلدىزىندا تىنباي جاۋعان نوسەر مەن قاتتى سوققان داۋىلدان كەيىن وزبەكستانداعى ساردوبا سۋ قويماسىنىڭ بوگەتى بۇزىلىپ, سونىڭ سالدارىنان تۇركىستان وبلىسىنداعى ماقتاارال اۋدانىنىڭ بىرنەشە ەلدى مەكەنى سۋ استىندا قالىپ, جەرگىلىكتى تۇرعىندار زارداپ شەككەن بولاتىن.
قاراعاندى وبلىسى
