مەنىڭ اسكەري ومىرگە قادامىم وسىدان تۇپ-تۋرا سەگىز جىل بۇرىن باستالدى. 2012 جىلى الماتىداعى قۇرلىق اسكەرلەرىنىڭ اسكەري ينستيتۋتىنا قابىلدانىپ, كوماندا-تاكتيكالىق تانك اسكەرلەرى ماماندىعى بويىنشا ءبىلىم الدىم. ءتورت جىلدان سوڭ 2016 جىلى اتالعان ينستيتۋتتى التىن مەدالمەن ءتامامداپ, ەلباسى – تۇڭعىش پرەزيدەنت نۇرسۇلتان نازارباەۆتىڭ قولىنان لەيتەنانت اتاعىن الدىم. سول جىلى ۆزۆود كومانديرى رەتىندە دەسانتتىق-شابۋىلداۋشى اسكەرلەرىنىڭ قولباسشىلىعىنا قاراستى 12740 اسكەري بولىمىنە كەلدىم. وسى اسكەري بولىمدە كۇنى بۇگىنگە دەيىن قىزمەت ەتىپ كەلەمىن. بۇگىندە شابۋىلداۋشى تانك روتاسىنىڭ كومانديرىمىن.
مەملەكەت تاراپىنان اسكەري قىزمەتشىلەرگە قوماقتى قولداۋ كورسەتىلىپ, ساربازداردىڭ تۇرمىس-الەۋەتى دە جاقسارىپ كەلەدى. وعان – ءوزىم دە كۋامىن. ماسەلەن, 2017 جىلى قورعانىس ءمينيسترىنىڭ قولىنان سارىوزەكتە جاڭادان سوعىلعان تۇرعىن ۇيدەن ەكى بولمەلى پاتەردىڭ كىلتىن الدىم. وتباسىن قۇرىپ, بالا ءوسىرىپ وتىرمىز.
قازاقستان اسكەرىنىڭ قازىرگى قاۋقارىن ءبىزدىڭ اسكەري ءبولىمنىڭ جەتىستىكتەرىنە قاراپ-اق باعامداۋعا بولادى. ايتايىن, شابۋىلداۋشى تانك باتالونىنىڭ كومانديرى, مايور جانات قۋانىشەۆ 2013 جىلى ماسكەۋدە وتكەن تانك بياتلونىندا جۇلدەلى 2-ورىننان كورىندى. 2018 جىلى قازاقستاننىڭ قۇرلىق اسكەرلەرى اراسىندا وتكىزىلگەن «مەرگەندەر باتالونى» سايىسىندا ءبىزدىڭ باتالون 3-ورىندى يەلەندى. 2015 جىلى جانە 2019 جىلى باتالونىمىز «ايبالتا» جاۋىنگەرلىك وقۋ-جاتتىعۋلارىندا ۇزدىك كورسەتكىشكە قول جەتكىزدى. وتكەن جىلى شابۋىلداۋشى تانك روتاسىنىڭ سەرجانتى ازات شويىنباەۆ ماسكەۋدە وتكەن تانك بياتلونىندا 2-ورىندى جەڭىپ الىپ قانا قويماي, «الەمنىڭ ۇزدىك كوزدەۋشىسى» اتاعىن يەلەنىپ, قازاقستانعا ورالعان سوڭ ءىى دارەجەلى «ەل قورعانى» مەدالىمەن ماراپاتتالدى. مەن دە وسى تەكتەس سايىستارعا بىرنەشە رەت قاتىسىپ, كوزگە ءتۇستىم. ماسەلەن, 2018 جىلى دەسانتتىق-شابۋىلداۋشى اسكەرلەرىنىڭ روتالارى اراسىندا «تانك روتاسىنىڭ ۇزدىك كومانديرى» ماراپاتىن يەلەندىم.
بۇل جەتىستىكتەر ءبىر عانا اسكەري ءبولىمنىڭ, باتالوننىڭ عانا ەمەس, ءبۇتىن ءبىر قازاقستان اسكەرىنىڭ جەتىستىگى رەتىندە باعالاندى دەپ بىلەمىن. ەل اسكەرىنىڭ كۇن ساناپ ارتىپ كەلە جاتقان الەۋەتى الداعى ۋاقىتتا بۇدان زور اسۋلاردان اساتىنىنا سەنىمدىمىن.
سەرىك ايتبەكوۆ,
دەسانتتىق-شابۋىلداۋشى اسكەرلەرى قولباسشىلىعىنا قاراستى 12740 اسكەري ءبولىمىنىڭ شابۋىلداۋشى تانك روتاسىنىڭ كومانديرى
