بۇگىنگى سانالى ۇرپاقتىڭ ساناسىندا «وتانعا قالاي قىزمەت ەتسەم ەكەن؟» دەگەن ساۋال جاڭعىرىپ تۇرسا يگى. «وتاندى ءسۇيۋ – يماننان», – دەگەن اتالى ءسوز بار. يماندى ادام ءوز ەلىنىڭ ناعىز پاتريوتى بولا الادى. وتانشىلدىق سەزىم وتانعا, تۋعان ەلىنە, ونىڭ تىلىنە, تۋىپ-وسكەن جەرىنە, سالت-ءداستۇرى مەن مادەنيەتىنە دەگەن قۇرمەتتەن باستالادى. وتانشىلدىقتىڭ مايەگى – ۇلتتى ءسۇيۋ. ءوز ۇلتىن, ەلى مەن جەرىن ءسۇيىپ, ونىڭ دامۋىنا قىزمەت ەتىپ, جاناشىرلىق تانىتقان جان عانا وتانشىل بولا الادى. وتانشىلدىق سانا حالىقتىڭ ءوز انا ءتىلىن, ءدىلىن, ءدىنىن بەرىك ساقتاۋىمەن جانە ونى ماقتان تۇتۋىمەن ولشەنەدى.
ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن) قاسيەتتى حاديس-شاريفىندە مەككەنى مەڭزەپ: «سەن مەن ءۇشىن سونداي قىمباتسىڭ, سۇيىكتىسىڭ...», دەپ ءوزىنىڭ تۋعان جەرىنە ايرىقشا سەزىمى مەن سۇيىسپەنشىلىگىن بىلدىرگەن.
اسىل دىنىمىزدە مۇسىلمان بالاسىنىڭ ءوز وتانىن, وتباسىن, ار-نامىسىن, مال-مۇلكىن قورعاۋ قاسيەتتى امالداردىڭ قاتارىنا جاتادى. تاعى ءبىر حاديستە وتاندى قورعاپ, شەكارا كۇزەتكەن ادامنىڭ اللا الدىنداعى دارەجەسى ارتاتىنى باياندالعان.
يسلام – تەك قۇلشىلىقتاردان عانا قۇرالعان ءدىن ەمەس. ءدىنىمىز وتاندى قورعاپ, ەلدى سۇيۋگە, بەيبىت, ىزگى قوعام قۇرۋعا ۇندەيدى. وتانشىل ادام سوزىمەن عانا ەمەس, ىسىمەن دە ۇلگى-ونەگە بولۋعا ءتيىس. وسى رەتتە ايتەكە بي بابامىزدىڭ: ء«ومىرىم – حالىقتىكى...» دەگەن ناقىل ءسوزىنىڭ تاربيەلىك ءمانى زور.
قازاقستان مۇسىلماندارى ءدىني باسقارماسى يمامدار فورۋمىندا قابىلداعان «جەتى رۋحاني قازىق» تۇعىرناماسىندا ءار ازاماتتىڭ بويىنان تابىلۋعا ءتيىس وتانشىلدىق سيپاتتى ايرىقشا اتاپ ءوتتى. ويتكەنى وتاندى قورعاۋ – قاسيەتتى بورىش, وتانشىل بولۋ – ىزگى امالدىڭ ءبىرى.
قۇرمەتتى قاۋىم! وتان قورعاۋشىلار مەرەكەسى قۇتتى بولسىن! اللا تاعالا ەلدىڭ ەرتەڭىن ويلايتىن, حالىققا ايانباي قىزمەت ەتەتىن, وتانىن قورعايتىن اسىل ازاماتتاردىڭ قاتارىن ارتتىرعاي.
جاراتقان يەمىزدىڭ سىيعا بەرگەن تاۋەلسىزدىگىمىز بەن كيەلى وتانىمىزدىڭ بولاشاعى باياندى بولعاي! ارقاشان ەلىمىز امان, جەرىمىز تىنىش بولسىن! ءامين!
ناۋرىزباي قاجى تاعان ۇلى,
قازاقستان مۇسىلماندارى ءدىني باسقارماسىنىڭ توراعاسى,
باس ءمۇفتي
