تارازدا سوعىس ارداگەرلەرىن قۇتتىقتاۋ جىلداعىدان ەرەكشە جاعدايدا ءوتتى. وبلىس ەرىكتىلەرى «جەڭىس» ءانىنىڭ سۇيەمەلدەۋىمەن اۆتوكران ارقىلى 98 جاستاعى مۇساحان بەردىباەۆ پەن 94 جاستاعى ءمۇتالىپ ەرەجەپباەۆتىڭ بالكوندارىنا دەيىن كوتەرىلىپ, ولارعا گۇل شوقتارىن سىيلادى. جاستار سوعىس ارداگەرلەرىنە بۇگىنگى بەيبىت كۇن ءۇشىن العىستارىن بىلدىرسە, قارت مايدانگەرلەر ءوز كەزەگىندە ولارعا اق باتاسىن بەردى. الايدا, جامبىل وبلىسى اكىمدىگىنىڭ مالىمەتىنشە, ارداگەرلەرگە قۇرمەت پەن ريزاشىلىق ءبىلدىرۋ مۇنىمەن تولاستامايدى ەكەن.
ءبىر ايتا كەتەرلىگى, ۇلى جەڭىس كۇنىنە وراي وبلىستاعى 57 ارداگەرگە 1 ميلليون تەڭگەدەن الەۋمەتتىك كومەك كورسەتىلىپ وتىر. تىل ەڭبەككەرلەرى دە نازاردان تىس قالعان جوق. سوعىس جىلدارىندا تىلدا 6 ايدان استام جۇمىس ىستەگەن 4247 ادام 50 مىڭ تەڭگەدەن السا, ەكىنشى دۇنيەجۇزىلىك سوعىسقا قاتىسۋشىلاردىڭ 350 جەسىرى مەن مۇگەدەكتەرىنىڭ ايەلدەرى دە وسىنداي كولەمدە الەۋمەتتىك كومەككە قول جەتكىزدى. ال, لەنينگراد بلوكاداسىندا بولعاندار مەن كونتسلاگەرلەردىڭ بۇرىنعى تۇتقىندارىنا 60 مىڭ تەڭگەدەن تولەندى.
سونىمەن قاتار ۇلى وتان سوعىسىنىڭ قاتىسۋشىلارى مەن مۇگەدەكتەرىنە تەڭەستىرىلگەن ادامدار 100 مىڭ تەڭگە كولەمىندە بىرجولعى الەۋمەتتىك كومەكتى يەلەندى. بارلىعى 6650 ادامعا ءبىر رەتتىك الەۋمەتتىك كومەك كورسەتۋ ءۇشىن 500 ميلليون تەڭگەدەن استام قاراجات قاراستىرىلعان. مەرەكە كۇندەرى وبلىس باسشىلىعى ۇلى وتان سوعىسىنىڭ ارداگەرلەرىن ارنايى قۇتتىقتايتىن بولادى.
جامبىل وبلىسى
