تەكەلى قالاسىنا قارايتىن رۋدنيچنىي كەڭەستىك داۋىردە اتاعى اسپانداپ تۇرعان ەلدى مەكەننىڭ ءبىرى بولعان. اتاۋى ءالى وزگەرمەگەن بۇل اۋىلدا نەگىزىنەن كەنشىلەر قونىستانعان ەدى. قازىنالى وڭىردە قازىر دە 1000 ادامنان استام تۇرعىن تىرشىلىك كەشىپ جاتىر. مۇندا كەزىندە سالىنعان 3 قاباتتى كوپ پاتەرلى ۇيلەردە تۇراتىن اۋلەتتەر كوپ. سول كۇنى اۋىلدى دۇرلىكتىرگەن وقيعا دا وسى پاتەردىڭ بىرىندە بولعان.
«...كاپيتان, كومەكتەسىڭىز ءۇي ورتەنىپ جاتىر!» دەگەن حاباردى ەستي سالا ەربول امانباەۆ تەكەلىدەگى ءورت سوندىرۋشىلەرگە جۇرە حابار بەرىپ, كەنتتىڭ كوپ پاتەرلى ۇيلەرى ورنالاسقان كوشەگە اسىققان. كەلسە, تەرەزدەن كوك ءتۇتىن شىعىپ جاتىر ەكەن. ءبىرىنشى قاباتتاعى پاتەردىڭ ەسىگى جابىق. ىشتەن ىلىنگەن ەكەن, قاتتى-قاتتى قاققانىمەن دىبىس بىلىنبەدى. «دەمەك, ادامدار تۇتىنگە تۇنشىققان بولدى. ەسىكتى بۇزۋ كەرەك...» دەگەندى ويلاپ ۇلگەرگەن ۋچاسكەلىك ينسپەكتورگە ەسكى تاقتاي ەسىكتى سىندىرىپ اشۋ اسا قيىن بولمادى. كاپيتان ىشكە كىرگەندە اس ۇيدەن شىققان ءتۇتىننىڭ اراسىنان قىزىل جالىن سۋماڭداي باستاعان ەدى. ءۇي يەسىن دالىزدەن تاپتى. ءيىس ءتيىپ قۇلاعان بولۋى كەرەك. ايەل ادامدى قاپسىرا كوتەرىپ الىپ, ەسىك الدىنا شىعارىپ جاتقىزدى دا, پاتەرگە قايتا ۇمتىلدى. اس بولمەگە جەتىپ, گاز باللونىن ىزدەپ تاپتى. قىرسىققاندا, قۇتىعا بەكىتىلگەن رەدۋكتور اعىتىلار ەمەس. ەربول قالتاسىنان باكىسىن شىعارىپ, رەزەڭكە شلانگانى كەسىپ جىبەردى. كوگىلدىر وتىن تولى ىدىستى سىرتقا الىپ شىققاندا اس ءۇيدىڭ قابىرعاسىنداعى تۇسقاعاز دا لاۋ ەتە قالعان ەدى, ءدال ساتىندە ۇلگەرىپتى. ەندى ءبىراز كەشىككەندە گاز قۇتىسىنا جالىن ءتيىپ, ول جارىلعانداي ەكەن. بۇل كەزدە ءۇي يەسى روزا اپايدا ەسىن جيىپ, جينالعان كورشى-قولاڭنىڭ كومەگىنە جۇگىنىپ جاتتى. ال پوليتسەي ءورت شالعان پاتەرگە قايتا ورالىپ, بولمە ءىشىن مۇقيات تەكسەرە باستادى. ءۇي يەسىنەن باسقا ادامنىڭ جوعىنا كوز جەتكىزگەسىن, اس ۇيدەگى وتتى سوندىرۋگە كىرىستى.
- ءورت اس بولمەدەگى توڭازىتقىشتىڭ تۇبىندەگى ەلەكتر قۇرىلعىسىنان تۇتانعان بولۋى كەرەك, الدىمەن سول بالقىپ, جانىپتى. اۋەلى ءۇي يەسى ءورتتى ءوزى وشىرمەك بولعانعا ۇقسايدى, بىراق تۇتىنگە قاقالىپ, قۇلاپ تۇسكەن ەكەن. گاز باللونىن قاۋىپسىز جەرگە شىعارعاسىن, ءورتتى سوندىرمەك بولدىم. بۇل كەزدە اس ءۇيدىڭ قابىرعاسى تۇتاس لاۋلاپ جاتتى. دەرەك جۋىناتىن بولمەدەن سۋ تاسىپ, جالىندى اۋىزدىقتاۋعا كىرىستىم. جالىننىڭ قاتتى بولعانى سونداي, وڭ قولىمدى قاتتى كۇيدىرىپ الدىم, - دەپ ەسكە الادى سول وقيعانى پليتسيا كاپيتانى ەربول امانباەۆ.
جالپى, رۋدنيچىي اۋىلى تەكەلى قالاسىنان 60 شاقىرىمداي الىستا جاتىر. تاۋ اراسىنداعى جولمەن ءجۇرىپ ءوتۋ ءبىراز ۋاقىتتى الادى. ءورت سوندىرۋشىلەر كەلىپ جەتكەنشە ءتىلسىز جاۋ باسقا پاتەرلەردى دە شارپىپ, تۇتاس ءۇي وتقا ورانار ەدى. ال ءابجىل ارەكەت ەتىپ, تۇتىننەن تايسالماعان ەربولدىڭ ارقاسىندا ءورت اۋىزدىقتالىپ, قاۋىپ سەيىلدى. ەندى ايرانداي ۇيىعان شاعىن اۋىل تۇرعىندارى ۋچاسكەلىك ينسپەكتوردىڭ بۇل ەرلىك ىسىنە ءسۇيىنىپ, ۇنەمى العىس ايتىپ ءجۇر. اجال اۋزىنان قالعان روزا لوبوۆا دا ەربولعا انالىق اق باتاسىن بەرىپتى.
قۇقىق قورعاۋ سالاسىندا 14 جىلدان بەرى قالتقىسىز قىزمەت ەتىپ كەلە جاتقان كاپيتان ەربول امانباەۆتىڭ ەرلىگى ەسكەرۋسىز قالمادى. باستاپقىدا وبلىستىق پوليتسيا باسقارماسى مەن جەرگلىكتى اكىمدىك تاراپىنان قۇرمەت كورسەتىلسە, كۇنى كەشە مەملەكەتتىك دەڭگەيدە ماراپاتتالدى. پرەزيدەن قاسىم-جومارت توقاەۆتىڭ جارلىعىمەن ماراپاتتالعان قۇقىق قورعاۋ جانە اسكەري قىزمەتكەرلەر تىزىمىندە تەكەلى قالاسى پوليتسيا ءبولىمىنىڭ رۋدنيچنىي كەنتىندەگى ۋچاسكەلىك ينسپەكتورى ەربول امانباەۆتىڭ دا اتى اتالدى. كاپيتاننىڭ ءوز قىزمەتىنە ادالدىعى مەن ادامدار الدىنداعى پارىزىن العاۋسىز اتقارعان ەڭبەگى «ەرلىگى ءۇشىن» مەدالىمەن اتاپ ءوتىلدى.
