سالتاناتتى جيىندا «جەڭىس كۇنىنىڭ» 75 جىلدىعى دا اتالىپ ءوتتى. «مامىر ايىندا اتاپ وتىلەتىن مەرەكەلەرىمىز قارساڭىندا ءبىز بولاشاق وتان قورعاۋشىلاردىڭ بويىندا پاتريوتتىق سەزىمنىڭ ويانۋىن قولداپ, ولارعا ءىى دۇنيەجۇزىلىك سوعىسقا قاتىسۋشىلاردىڭ ەرلىكتەرىن جەتكىزەمىز. ول كەزدەگى ورتاق وتانىمىزدى فاشيستىك باسقىنشىلاردان قورعاعان, سونداي-اق اسكەر قاتارىندا قىزمەت ەتكەن, بۇگىندە اسكەري بورىشىن وتەپ جۇرگەندەرگە قۇرمەتىمىزدى بىلدىرەمىز. ءىى دۇنيەجۇزىلىك سوعىستا جەڭىسكە جەتكەن ۇرپاقتىڭ ەرلىگى ادامزات جادىندا ماڭگى ساقتالادى», دەدى سالتاناتتى شاراداعى سوزىندە پوليتسيا دەپارتامەنتىنىڭ باستىعى, پولكوۆنيك مارات تولەباەۆ.
سولتۇستىك قازاقستاننىڭ پوليتسيا قىزمەتكەرلەرى بيىلعى سىناققا توتەپ بەرىپ, اتى جامان ىندەتكە قارسى تۇرعىنداردىڭ كارانتين رەجىمىن ساقتاۋىن قاتاڭ باقىلاي ءبىلدى. سونىڭ ارقاسىندا قازىر ينفەكتسيالىق بولىمدە ءبىر-اق ناۋقاس قالدى. سالتاناتتى شارادا بۇل ناتيجەگە قول جەتكىزۋدە پوليتسيا قىزمەتكەرلەرىنىڭ ەڭبەگى زور ەكەندىگى اتالىپ, ولاردىڭ ىشىنەن 50-دەن ارتىق ادامعا ۆەدومستۆولىق ماراپاتتار بەرىلەتىندىگى ايتىلدى. سونىمەن بىرگە 2 قىزمەتكەردىڭ لاۋازىمدىق اتاعى جوعارىلايتىنى بەلگىلى بولدى. تاعى تورتەۋى مەدالدەر مەن توسبەلگىلەر الدى. 8 قىزمەتكەرگە ىشكى ىستەر ءمينيسترىنىڭ گراموتالارى مەن العىس حاتتارى تاپسىرىلدى.
تۇرعىندار اراسىنان توتەنشە جاعداي كەزىندە پوليتسياعا قولداۋ كورسەتكەن وبلىس تۇرعىندارى باقىتجان ساميەۆا (ىسكەر ايەلدەر قاۋىمداستىعى), مۇراتبەك زەينۋللين (قازاقستان حالقى اسسامبلەياسى), تەمىرعالي ءابىلماجينوۆ (مەملەكەتتىك, بانك جانە قوعامدىق قىزمەت كورسەتۋ قىزمەتشىلەردىڭ كاسىپوداق ۇيىمى) جانە «Qyzyljar» تەلەارناسىنىڭ ديرەكتورى ەرلان توقشىلىق تا ماراپاتتالدى. سونداي-اق اققايىڭ اۋدانىنىڭ ءۇش تۇرعىنى دا العىس حاتتارعا يە بولدى.
