اعايىندى ەكەۋى دە ەڭبەك جانە ۇلى وتان سوعىسىنىڭ ارداگەرلەرى ەدى. مەن اكەمىز ءامىر قوجاقوۆ تۋرالى از كەم ويلارىممەن بولىسپەكپىن. اكەمىز ءامىر قوجاقوۆ سوعىستان سول اياعى مەن قولىنان جارالانىپ ورالسا دا ەلى, وتانى ءۇشىن دەنە مۇشەلەرى ساۋ ادامداردان ارتىق ەڭبەك ەتتى. جەڭىستىڭ اكەمىزدىڭ قانشاما قارۋلاستارىنىڭ ولىمىمەن, توگىلگەن قانىمەن كەلگەنىن اكەمىزدىڭ اڭگىمەلەرىنەن قۇلاعىمىزعا قۇيىپ, سانامىزعا ءسىڭىرىپ وستىك. ءبىز ۇستىمىزدەگى جىلى بەيبىت ءومىرىمىزدىڭ 75 جىلدىعىن اتاپ وتۋدەمىز. ارينە, ورتامىزدا, ءۇيىمىزدىڭ تورىندە مايدانگەر اكەمىز بولماعانىمەن ونىڭ رۋحى, بىزگە سىيلاعان ۇلى جەڭىس كۇنى, بەيبىت ءومىر بار. سوندىقتان دا جىل سايىن اكەمىز بەن اكەمىزدىڭ اعاسىن اتامىزدىڭ ەسىمىن ەرەكشە قۇرمەتپەن ەسكە الىپ, رۋحتارىنا تاعزىم ەتەمىز.
ءبىز اكەمىزدى كوكە دەپ وستىك. مەنىڭ كوكەم ءامىر قوجاقوۆ 1922 جىلى وڭتۇستىك قازاقستان وبلىسى, ارىس اۋدانىنداعى وكتيابر اۋىلىندا قازىرگى تۇركىستان وبلىسى, ورداباسى اۋدانى, شۇبار اۋىلىندا دۇنيەگە كەلگەن. 1939 جىلى اۋىلداعى جەتىجىلدىق مەكتەپتە وقىپ, ونى ويداعىداي بىتىرەدى. 1938 جىلى كومسومول قاتارىنا وتەدى. ال 1939-1942 جىلدارى اۋىلدا ءىىى- ينتەرناتسيونال كولحوزىندا تىندىرىمدى ەڭبەك ەتەدى. ال كەڭەستەر وداعىنا نەمىس باسقىنشىلارى سوعىس باستاعاننان كەيىن 1942 جىلى ءوز ەركىمەن قىزىل اسكەر قاتارىنا الىنادى. العاشقى اسكەري دايىندىقتان تاشكەنت وبلىسىنداعى شىرشىق قالاسىندا وتەدى. 1942 جىلدىڭ كوكتەمىندە سمولەنسك قالاسى ءۇشىن بولعان قاندى شايقاستا اتالعان قالا ىرگەسىندەگى ياكوۆلەۆكا دەرەۆنياسىنىڭ ماڭىندا سول اياعى مەن قولىنان جارالانىپ, دالا گوسپيتالىنا تۇسەدى. قاتارداعى جاۋىنگەر پۋلەمەتشىنىڭ كومەكشىسى بولادى. سەرىگىنە جاشىكتەگى وقتى الىپ كەلە جاتقاندا ولاردىڭ قاسىنا سنارياد جارىلادى.
جارالى جاۋىنگەردىڭ توبىعىنا تيگەن مينا جارىقشاعى گانگرەنا كەسەلىنە ۇشىراتپاس ءۇشىن دارىگەرلەر اياعىن تىزەسىنەن تومەن جەرىنەن كەسەدى. اكەمىز ءنومىرى 1943-ءشى جانە 232-ءشى اتقىشتار پولكىندە بولدى. كۇزگە دەيىن ەمدەلگەن اكەمىز 1942 جىلى ەلگە مۇگەدەك بولىپ ورالادى. ۇلى وتان سوعىسىنا قاتىسۋشى رەتىندە جەڭىستىڭ جانە كسرو قارۋلى كۇشتەرىنىڭ مەرەكەلىك بەلگى-مەدالدارىمەن ماراپاتتالعان. اتاپ ايتساق, ۇلى وتان سوعىسىنداعى جەڭىستىڭ 20,30 جىلدىعى مەرەكەلىك مەدالدارى. سسرو قارۋلى كۇشتەرىنىڭ 50 جىلدىعى مەدالى. «ەرلىگى ءۇشىن» جانە «ەڭبەك ارداگەرى» مەدالدارىن يەلەنگەن.
اكەمىز سوعىستان ورالعان سوڭ 1943-1945 جىلدارى ارىس اۋداندىق سوتىندا سوت ورىنداۋشىسى بولىپ, جاۋاپتى قىزمەت اتقاردى. مۇنان سوڭ اۋىلداعى كەڭشاردا اۋىلشارۋاشىلىعىندا تىنباي ەڭبەك ەتتى. ءوزى مۇگەدەك بولا تۇرا ساۋ ادامداردان ارتىق ەڭبەك ەتتى. بىزگە ءومىردىڭ وزەگى دە تىرەگى دە ادال ەڭبەك ەكەنىن ۇلگى ەتىپ, كورسەتىپ كەتتى. كوكەمىز ناعىز ديحان ەدى. باۋ-باقشامىزدا الما, المۇرت, شابدالى, ءجۇزىم, شيە جانە تاعى باسقا جەمىس اعاشتارى مەن باقشادا قاۋىن, قاربىز تاعى سول سياقتى بالاداي ماپەلەپ, وسىرە ءبىلدى. اۋىلدا ءار مۇسىلماننىڭ مىندەتى - قايىرىمدى ىستەردى دە اتقاردى. جەتىم, جەسىرلەرگە ازىق-ت ۇلىكتەر ۇلەستىرىپ وتىردى. نايمان ارىق دەپ اتالاتىن كانالعا كوپىر سالىپ بەردى. ۇلكەن قۇدىق قازدىرىپ, ساۋاپتى ىستەرگە مۇرىندىق بولا ءبىلدى. اۋىلدا ء«امىردىڭ توعايى» دەگەن توعاي بولدى.
اكەمىز وتە ساۋاتتى بولدى. گازەت-جۋرنالدار مەن كىتاپتاردى وتە كوپ وقيتىن. قيسسا, داستانداردى, ايتىستاردى اۋىلداستارىمىزعا مانەرلەپ وقىپ بەرەتىن. ەڭبەك جانە سوعىس ارداگەرى, اكەمىز ءامىر قوجاقوۆ 1979 جىلى 26 قازاندا دۇنيەدەن وزدى. شىمكەنتتەگى اباي اتىنداعى ساياباقتاعى ۇلكەن ەسكەرتكىشتە وڭىرىمىزدەن مايدانعا اتتانعانداردىڭ اتى-جوندەرى ءمارمار تاسقا جازىلعان. مۇندا ءبىزدىڭ اتامىز بوراش قوجاقوۆ اتامىز بەن اكەمىز ءامىر قوجاقوۆتىڭ دا ەسىمدەرى جازۋلى تۇر. جىل وتكەن سايىن ارداگەرلەر قاتارى ازايىپ بارادى. سوندىقتان ولاردىڭ وزدەرى كوزدەن كەتسە دە ەسىمدەرى مەن كورسەتكەن ەرلىكتەرى كوڭىلدەن كەتپەيدى. ءبىز بۇگىنگى, بولاشاق ۇرپاق اكەلەرىمىزدىڭ بىزگە سىيلاعان مامىراجاي بەيبىت كۇندەرىنىڭ قادىرىن باعالاي بىلەمىز. سوعىس وتى ەندى شارپىماسىن! ەلىمىزدە بەيبىت ءومىر, تىنىش زامان بولسىن!
ء ۋاليحان ءامىر ۇلى قوجاق,
تۇركىستان وبلىسى,
ورداباسى اۋدانى.
