ءبيبىنۇر احمەتقىزى قازاقتىڭ بۇلب ۇلى اتانعان جەزتاڭداي ءانشى, كسرو حالىق ءارتىسى, سوتسياليستىك ەڭبەك ەرى, كسرو مەملەكەتتىك سىيلىعىنىڭ لاۋرەاتى بيبىگۇل تولەگەنوۆانىڭ اپكەسى. ارداگەردىڭ نەمەرەسى توميريس ساعىندىق حالىقارالىق مەكتەپتىڭ 7 سىنىبىندا ءبىلىم الادى.
«قايران ءبىزدىڭ انالار اردى ويلاعان» دەپ اقيىق اقىن مۇقاعالي جىرلاعانداي, سوعىس جىلدارىندا ەر-ازاماتتىڭ قايراتىن قاجەت ەتەتىن «قارا جۇمىستا» بوي جازباستان ەڭبەك ەتىپ, ازاماتتاردى جوقتاتپاعان قايسار انالارىمىزدىڭ تاپتىرماس ۇلگىسى – ءبيبىنۇر احمەتقىزى سۇراپىل سوعىس جىلدارى جايىندا سىر شەرتتى.
– سوعىس باستالعان تۇستا مەن نەبارى 12-13 جاستىڭ شاماسىندا ەدىم. بالالىعىمىز قارا حالىقتىڭ باسىنا تونگەن قيىنشىلىقپەن باستالدى. جيىرما بەس جاسىندا شيەتتەي بالا-شاعامەن جەسىر قالعان انام, سول اۋىرتپالىقتى جالعىز ءوزى كوتەردى. جوقشىلىعى مەن اشتىعى قاتار كەلگەن زاماننىڭ بەينەتىن جاستىقپەن كوتەردىك. ەڭبەك ورتاسىنا ەرتە ارالاستىق. ءسىڭلىم بيبىگۇل اعاش وڭدەيتىن زاۋىتقا جۇمىسقا تۇردى. جارامسىز قالدىقتاردى جيناپ, ۇيگە اكەلەتىنبىز. بار ويىمىز وتىن ەتىپ جاعىپ, باۋىرلارىمىزبەن بىرگە جىلىنۋ عوي. اسكەري گوسپيتالدىڭ جۇمىسىنا دا ارالاسقان شاعىمىز بولدى. مەن جاۋىنگەرلەرگە حات جازۋعا كومەكتەسسەم, ءسىڭلىم بيبىگۇل ءان سالىپ بەرەتىن. سول ۋاقىتتا بيبىگۇلدى «كاتيۋشا» دەپ تە اتاپ كەتكەن. سول كۇندەردى وي ەلەگىنەن وتكىزسەم, قۋانىشى از بولعان ەكەن عوي», – دەپ كۇرسىنەدى قارت انا.
ءبيبىنۇر احمەتقىزىنىڭ اڭگىمەسىن زەيىن قويىپ تىڭداعان وقۋشىلار, قارشادايىنان سوعىس دالاسىن كورگەن قارت اجەيدىڭ جابىرقاۋلى كوڭىلىن بايقاسا كەرەك, اڭگىمەنىڭ بارىسىن وزگە ارناعا بۇرىپ, جەڭىستى جاقىنداتقان بارشا ارداگەرلەرگە العىستارىن ءبىلدىردى.
– بولاشاق ۇرپاققا بەيبىت كۇن سىيلاعان ارداگەرلەرىمىزدىڭ ەسىمى بىزدەي وسكەلەڭ ۇرپاقتىڭ جادىندا ماڭگىلىككە ساقتالادى. ەرلىكتەرىڭىز ءالى تالاي ۇرپاققا اڭىز بولىپ ايتىلىپ جۇرەرى ءسوزسىز. ەرلىكتەرىڭىزدى قۇرمەتتەۋ, ەسىمدەرىڭىزدى ۇلىقتاۋ – بىزگە تاپسىرىلعان ۇلكەن امانات, – دەدى وقۋشىلار ءبىراۋىزدان.
– بۇگىنگىدەي قيىن-قىستاۋ ۋاقىتقا قاراماستان, بالالاردىڭ بىزدەردى ەستەرىنەن شىعارماي, عالامتور ارقىلى جۇزدەسۋگە, تىلدەسۋگە شاقىرعانى قاتتى قۋانتتى. وقۋشىلاردىڭ جارقىن جۇزدەرى مەن مولدىرەگەن كوزدەرىن كورىپ, بەيبىت كۇننىڭ قۋانىشى ارتا بەرۋىن تىلەيمىن», – دەپ كەيىپكەرىمىز اعىنان جارىلدى.
ونلاين كەزدەسۋدىڭ سوڭىندا بالالار تىل ارداگەرى ءبيبىنۇر احمەتقىزىمەن حالىق ءانى «قۇسني-قورلاندى» ورىندادى. كۇمىس كومەي داۋىس اپكەلى-ءسىڭلىلى ءبيبىنۇر مەن بيبىگۇل انالارىمىزدىڭ بويىنا دارىعان, قانىنا سىڭگەن اسىل قاسيەت دەگەن ويعا قالدىق.
