«ەل باسىنا تونگەن اپاتتان بولعان زالالدىڭ ورنىن تولتىرۋ ءۇشىن جان-جاقتاعى جومارت جاندار وڭتۇستىككە گۋمانيتارلىق كومەك جىبەرۋدە. وسىعان وراي ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ بقو فيليالى, ياعني اقجايىق ايتىسكەرلەرى ماقتاارالعا قارجىلاي كومەك جونەلتتى. بىزدەن بارعان قاراجات اپاتتان زارداپ شەككەن اعايىننىڭ يگىلىگىنە جاراسىن دەيمىز!» دەلىنگەن الەۋمەتتىك جەلىدە تارالعان حابارلامادا.
ايتىس اقىندارى مەن جىرشى-تەرمەشىلەردىڭ حالىقارالىق وداعى باتىس قازاقستان وبلىستىق فيليالىنا بەلگىلى اقىن باۋىرجان حاليوللا جەتەكشىلىك ەتەدى. قازىر وڭىردە رەسپۋبليكالىق دەڭگەيدەگى ۇلكەن ايتىستارعا شىعىپ جۇرگەن 12 اقىن بار. بىراق حالىق ونەرىنە جانى جاقىن, ايتىستى قۇلاي سۇيەتىن جاستار كوپ. ولاردىڭ ءبارى ورالداعى قادىر مىرزا ءالى اتىنداعى مادەنيەت جانە ونەر ورتالىعىنىڭ جانىنان اشىلعان «ايتىس كابينەتىندە» ءجيى باس قوسادى. ءتىپتى وزدەرىنىڭ بەيرەسمي قۇرىپ العان ورتاق قورى دا بار ەكەن.
- جاستاردىڭ باستاماسى عوي. مۇنىڭ ءتىپتى ارنايى بەكىتىلگەن ەرەجەسى, قابىلدانعان جارعىسى دا جوق. اركىم شاما-شارقىنشا تيىن-تەبەن سالادى. سايىستاردا جۇلدە العاندارى اقشا اۋدارىپ قويادى. سوسىن قاجەت كەزىندە ءوزارا اقىلداسىپ, ورتاق شەشىممەن پايداعا اسىرادى. مىسالى, بىلتىر ارىستاعى جارىلىستان زارداپ شەككەن اعايىندارعا دا قارجىلاي قولداۋ كورسەتتىك. ودان بولەك, جەرگىلىكتى قايىرىمدىلىق باستامالارعا بارىنشا ءۇن قوسىپ وتىرامىز. كەشە عانا ءبىزدىڭ ورتالىقتىڭ قىزمەتكەرلەرى, بەلگىلى اقىندار ۆولونتەر رەتىندە ءوز كولىكتەرىمەن مۇقتاج جانداردىڭ ۇيىنە ازىق-ت ۇلىك تاراتتى, - دەيدى باۋىرجان حاليوللا.
ايتپاقشى, ءدال وسى باستامانىڭ ناق ورتاسىندا اق جايىقتىڭ اقىن قىزى, VII «التىن دومبىرا» جۇلدەسىنىڭ يەگەرى جانسايا مۋسينا دا بار. ونىڭ سوڭعى كۇندەرى بۇكىل حالىققا تاراپ كەتكەن ولەڭى بىلاي دەپ ءتامامدالادى:
«باسىلماي ماقتارالدا اعىن كۇشى,
پەندەنىڭ بولا الماسپىن سابىرلىسى,
وردالى وڭتۇستىكتەن اقجايىققا,
جەتسە ەكەن جاڭالىقتىڭ جاعىمدىسى...»
بارشا باتىسقازاقستاندىقتاردىڭ دا تىلەگى وسى.
باتىس قازاقستان
