قازاقستاننىڭ وسى ءبىر اسا قاۋىپتى ىندەتكە قارسى دەر كەزىندە قابىلداعان شارالارى دۇنيەجۇزىلىك دەنساۋلىق ساقتاۋ ۇيىمى مەن حالىقارالىق ساراپشىلار تاراپىنان وڭ باعالاندى. ەلىمىزدە ناۋرىز ايىنىڭ ورتاسىنان بەرگى كارانتين ءتارتىبى ءتيىستى ناتيجەسىن بەردى. ىندەت ءبىرشاما باسەڭسىدى. الايدا بوساڭسۋعا ءالى ەرتە.
مامىر ايىنىڭ باسىندا ەلىمىزدە مەرەكەلىك كوڭىل كۇي ورىن الادى. حالىقتىڭ بىرلىگى مەن ىنتىماق مەرەكەسى, 7 مامىر قازاقستان قارۋلى كۇشتەرى كۇنىنە جانە بيىلعى جەڭىستىڭ 75 جىلدىعىنا جالعاسادى. كوڭىلگە قۋانىش ۇيالاتقان كوكتەمنىڭ شۋاقتى دا شىرايلى شاعىندا بيىل قيىندىق ورىن الىپ وتىرعانى بارشاعا بەلگىلى. مۇنداي كەزدە جاعدايعا تۇسىنىستىكپەن قاراعان جۇرتشىلىق پرەزيدەنت شەشىمىن وڭ قابىلداپ وتىر. حالقىمىزدىڭ باسىم كوپشىلىگى ونسىز دا دەمالىس كۇندەرى جۇمىس ىستەمەيدى, قىزمەتكە شىقپايدى.
الايدا بۇل تەك ءبىزدىڭ ەلىمىزدە عانا ەمەس, بۇكىل الەمدە ورىن الىپ وتىرعان اۋىر كەزەڭ ەكەنىن ءبىز جاقسى تۇسىنەمىز. داعدارىس قىسقان وسىنداي قىسىلتاياڭ كۇندەرى مەملەكەت تاراپىنان تابىسى تومەن, جاعدايى ناشار وتباسىلارعا ايتارلىقتاي كومەك كورسەتىلىپ, حالىقتىڭ ەداۋىر بولىگىنە الەۋمەتتىك قامقورلىق جاسالىپ جاتقانى قۋانتادى. جەڭىس مەرەكەسى قارساڭىندا سوعىس جانە تىل ارداگەرلەرىنە اكىمدىكتەر تاراپىنان ءتيىستى قامقورلىق كورسەتىلىپ كەلەدى. ەلىمىزدەگى بۇقارالىق اقپارات قۇرالدارى ارداگەرلەردىڭ ەرلىگى مەن ەڭبەگىن بارىنشا ەسكە الىپ, كەيىنگى ۇرپاققا ناسيحاتتاۋدا. وسى ورايدا مەرەكە قارساڭىندا بارشا مايدانگەرلەردى جەڭىس كۇنىمەن, قازاقستان قارۋلى كۇشتەرى كۇنىمەن قۇتتىقتايمىز.
ال وسى مامىر ايىنىڭ باسىنداعى مەرەكە كۇندەرى كارانتين ءتارتىبىن ساقتاپ, اركىم ءوزىنىڭ شاڭىراعىندا, ءوزىنىڭ وتباسىمەن بىرگە بولىپ, ايتۋلى مەيرامدى جىلى شىرايلى, ەمەن-جارقىن قارسى العانى ورىندى دەپ بىلەمىز. وسى تۇرعىدان كەلگەندە مەملەكەت باسشىسىنىڭ كارانتين مەرزىمىن بەلگىلى ءبىر مەرزىمگە ۇزارتقانى وتە ءتيىمدى ءارى كورەگەندىك بولدى. ەلىمىزدەگى توتەنشە جاعدايلار تۋرالى ارنايى كوميسسيانىڭ قابىلداعان شەشىمى بويىنشا كارانتين ءتارتىبى ءبىرشاما جەڭىلدەتىلە باستادى. دەگەنمەن, ساقتىق شارالارى قاشاندا كەرەك. ازاماتتارىمىزدىڭ اماندىعى, حالىقتىڭ دەنساۋلىعى بارىنەن ماڭىزدى. قازاقستان جۇرتشىلىعى بۇل شەشىمدى تۇسىنىستىكپەن قابىلداپ وتىر.
اقان بيجانوۆ,
فيلوسوفيا, ساياساتتانۋ جانە ءدىنتانۋ ينستيتۋتىنىڭ ديرەكتورى
