– ەكسپو-2017 حالىقارالىق كورمەسىندە ءبىزدىڭ وبلىستان 200-گە جۋىق ۆولونتەر قاتىسقانىن ماقتان ەتەمىز. ارامىزدا فارحات ماقىشەۆ, جاننا تاسىباەۆا, يانا يۆلەۆا سياقتى «ۇزدىك ۆولونتەرلەر» دە بار. بىزدە «ۆولونتەر كودەكسى» بار. كودەكستە ۆولونتەرلەرگە قويىلاتىن تالاپتار مەن ولاردىڭ جەكە باسىنىڭ قۇقىعىن قورعاۋ ماسەلەلەرى قاراستىرىلعان. ۆولونتەردىڭ ەڭ ءبىرىنشى ەرەجەسى – ەركىن تۇردە قولۇشىن بەرۋ. جوعارى وقۋ ورىندارىندا, كوللەدجدەردە 20-دان استام ۆولونتەرلەر ۇيىمى بار. ونىڭ ۇشەۋى «قازاقستان اليۋميني زاۋىتى» اق, «قازاقستان ەلەكتروليز زاۋىتى» اق جانە «كاستينگ» جشس كاسىپورىندارىندا قۇرىلعان. ءبىز ءاربىر ىسىنە نەمقۇرايلى قاراماي, جاۋاپكەرشىلىكتى سەزىنەتىن جاستاردى قاتارىمىزعا قوسىلۋعا شاقىرامىز, – دەيدى «ۆولونتەرلەردى دايارلاۋ ۇيىمىنىڭ» كوشباسشىسى, «ۇزدىك ۆولونتەر» اتاعىن العان اياجان قۇرمانوۆا.
اياجان ايتقانداي, ءاربىر ىسىنە نەمقۇرايلى قارامايتىن, جاۋاپكەرشىلىكتى سەزىنەتىن جاستار ەلدەگى توتەنشە جاعداي كەزىندە دە بەلسەندىلىك كورسەتۋدە. وڭىردە قۇرىلعان ۆولونتەرلەر ۇيىمدارى كارانتينگە جابىلعان ۇيلەر مەن بلوك-بەكەتتەردە, اۋرۋحانالار مەن زەرتحانالار قىزمەتكەرلەرىنە كومەككە ءبىرىنشى بولىپ جەتتى. كۇن سايىن ىستىق تاماق جەتكىزۋدە. ۆولونتەر جاستار بىرلەسىپ از قامتاماسىز ەتىلگەن, جالعىزباستى, جەتىم بالالار, كارانتين كەزىندە جۇمىسىنان ايىرىلعان تۇرعىندارعا ازىق-ت ۇلىك سەبەتتەرىن ۇلەستىرگەن.
– قازىر 21 ميلليون 691 مىڭ تەڭگەنىڭ ازىق-ت ۇلىگىن تاراتىپ ۇلگەردىك. بۇل قايىرىمدىلىق ىسىنە قاراپايىم حالىق پەن كاسىپكەرلەر كومەككە كەلدى, – دەيدى وبلىس ورتالىعىنداعى «ۆولونتەرلەر» كلۋبىنىڭ باسشىسى اسحات قۇسداۋلەتوۆ.
ال «كلۋب دوبرياكوۆ» – «مەيىرىمدىلەر» كلۋبىنىڭ مۇشەلەرى «مەيىرىم سەبەتى» اتتى ۋاقىتشا قايىرىمدىلىق شاراسىن باستادى. بۇل شارا توتەنشە جاعداي سالدارىنان جۇمىسسىز قالعان, كوپ بالالى وتباسىلارعا ارنالعان. ۆولونتەرلەر @club_dobryakov_pavlodar ۇن, قاراقۇمىق, قانت, شاي, ماكارون, كارتوپ, ءسابىز, پياز سياقتى قاجەتتى جيىنتىق دايىنداپ, 370 ازىق-ت ۇلىك سەبەتى ۇلەستىرىلگەن.
ۆولونتەر ەرجان قۇنيازوۆتىڭ ايتۋىنشا, كارانتينگە جابىلعان كوپقاباتتى ۇيلەردىڭ تۇرعىندارىنا دارىلەر, گيگيەنا زاتتارى, بەتپەردەلەر, قولعاپتار, دەزينفەكتسيا زاتتارى جەتكىزىلگەن. سونىمەن بىرگە «مولكوم-پاۆلودار» جشس-ءنىڭ قولداۋىمەن كارانتينگە جابىلعان 76 وتباسىنا ءتۇرلى ءسۇت تاعامدارىن جەتكىزسە, «مير حلەبا» ناۋبايحاناسى بولسا, كۇن سايىن كومەككە مۇقتاج, كارانتينگە جابىلعان ۇيلەردەگى ءار پاتەرگە تەگىن نان ۇلەستىرۋدە.
اقتوعايلىق كاسىپكەر تالعات ءابدىراحمانوۆ جەرلەستەرىن قولداۋ ماقساتىندا 500 مىڭ تەڭگە قارجىلاي كومەكتەسسە, Small سۋپەرماركەتى دە قاجەتىنشە قولداۋ كورسەتۋدە. ءتىپتى «كلۋب دوبرياكوۆتىڭ» مەيىرىمدى ۆولونتەرلەرى ورتالىعىنىڭ 100 مۇشەسى مەن توتەنشە جاعداي كەزىندە ءوز ەركىمەن بۇل توپقا قوسىلعان 200 جاس قازىر تىنىمسىز قىزمەت كورسەتىپ ءجۇر.
كلۋب مۇشەلەرى ءۇش جىلدا 300 ءتۇرلى شارا وتكىزىپ, وبلىس مەكتەپتەرىمەن بىرلەسىپ, 16 توننا پلاستماسسا قاقپاق جيناپ, اۋىرىپ جاتقان بالالاردىڭ ەمىنە جاردەمدەستى. ال Vita اتتى ۆولونتەرلەردىڭ ىزدەستىرۋ توبى جوعالعان 13 ادامنىڭ تابىلىپ, ۇيىنە ورالۋىنا ىقپال ەتسە, 50 ادام ۆولونتەرلەردىڭ تاراتقان اقپاراتىنان كەيىن ۇيلەرىنە ورالعان.
وبلىس ورتالىعىنداعى قالالىق قورعانىس ىستەرى جونىندەگى باسقارماسىنىڭ باستىعى, پودپولكوۆنيك اسحات قانىشباەۆتىڭ مالىمەتىنشە, توتەنشە جاعداي كەزىندەگى شاقىرۋعا ءۇن قوسقان العاشقى 33 ۆولونتەر ارنايى اسكەري جيىندارعا جازىلدى. ولار قوعامدىق ورىنداردى دەزينفەكتسيالاۋمەن, نىسانداردى كۇزەتۋمەن اينالىسادى.
سونىمەن بىرگە جەرگىلىكتى پەداگوگيكالىق ۋنيۆەرسيتەت رەكتورى التىنبەك نۋح ۇلىنىڭ باستاماسىمەن ۆولونتەر جىلى اياسىندا بەلسەندى 30 ستۋدەنتكە نەگىزگى شاكىرتاقىنىڭ 30 پايىزدىق كولەمىندە ستيپەنديا تاعايىندالدى. ۋنيۆەرسيتەتتە قۇرامىندا 60 ستۋدەنت بار «Lotos» ۆولونتەرلەر ۇيىمى بار. بارلىق ۆولونتەرلەر qazvolunteer.kz پورتالىندا تىركەلگەن. وقۋ ورنىندا ۆولونتەرلەر مەكتەبىن اشۋدى, كىتاپتار جيناپ, ولاردى ساتۋ ارقىلى تۇسكەن قارجىنى ەمدەلىپ جۇرگەن بالالارعا اۋدارۋ جوسپارلانىپ وتىر.
قالا اكىمىنىڭ ورىنباسارى سۆەتلانا گلادىشەۆانىڭ ايتۋىنشا, ۆولونتەر جىلى اياسىندا بيىل اقپان ايىندا №24 جالپى ورتا ءبىلىم بەرۋ مەكتەبىندە «ۆولونتەرلەر – تۋعان ەلىنە» فورۋمى وتكىزىلدى. ماقساتى – بەلسەندى ازاماتتىق ۇستانىمدى تاربيەلەۋ, وقۋشىلاردىڭ كوشباسشىلىق جانە ادامگەرشىلىك-ەتيكالىق قاسيەتتەرىن, پاتريوتيزم سەزىمدەرىن قالىپتاستىرۋ, مەكتەپتە ۆولونتەرلەر قوزعالىسىن دامىتۋ.
فورۋمدا جاس پەداگوگتەردىڭ باستاماسىمەن 30 ۆولونتەرلەر كلۋبى, 2 مەكتەپتە ۆولونتەرلەر جاساعىنىڭ اشىلۋ ءراسىمى ءوتتى. ولاردىڭ جوبالارى «ساباقتاستىق», «ساۋلىق», «تازا الەم», «اسىل مۇرا», «قامقور», ء«بىلىم» – اۋىل مەكتەپتەرىندەگى جوعارى سىنىپ وقۋشىلارىنا ۇبت-عا دايىندىق, اعىلشىن تىلىنە جانە كومپيۋتەرلىك ساۋاتتىلىققا وقىتۋ بويىنشا كومەك كورسەتۋ, ء«ۇمىت» – مايدانگەرلەر ەرلىكتەرى تۋرالى قۇجاتتاردى ىزدەۋ باعىتىنا ارنالۋدا.
ال جالپى سوڭعى جىلدارى قۇرىلعان ۆولونتەرلەر ۇيىمىنىڭ قاتارىندا ۇكىمەتتىك ەمەس ۇيىمداردىڭ بۇرىننان بەرى جۇمىس جاساپ كەلە جاتقان «الەۋمەتتىك ۆولونتەرلىك ورتالىعى» دا بار. ورتالىق مۇشەلەرىنىڭ ءبىرى, ماماندىعى پسيحولوگ الىشەر بەكجاننىڭ ايتۋىنشا, ۆولونتەر رەتىندە 2016 جىلدان باستاپ وبلىس ورتالىعىنداعى بالالاردى ەمدەيتىن «سامال» وڭالتۋ ورتالىعىندا جۇمىس ىستەگەن. ەكسپو-2017 كورمەسىنە بارىپ, ۆولونتەرلەر قاتارىندا بولعان ەكەن.
– قازىر ۆولونتەر بولۋ – ءومىرىمنىڭ اجىراماس ءبىر بولىگىنە اينالدى. ادامعا جاقسىلىق جاساۋ, كومەكتەسۋ پارىز. مۇمكىندىگى شەكتەۋلى جاندارعا قولۇشىن بەرىپ, بالالار ءۇيىنىڭ تاربيەلەنۋشىلەرىن اس ازىرلەۋ, ءۇي تۇرمىسىنداعى نەگىزگى داعدىلارعا ۇيرەتەمىز. جۇيكە جۇيەسى اۋىراتىن جاندارعا ارنالعان «الرامي» كلۋبتىق ۇيىنە بارىپ, شىعارماشىلىق تەراپيا, سۋرەت سالۋ ارقىلى كومەك كورسەتەمىز. مۇمكىندىگى شەكتەۋلى نەمەسە اقىل-ەسىندە اۋىتقۋى بار ادامدارمەن جۇمىس جاسايمىز. ولار ادامداردان تەك قانا مەيىرىم, جان جىلۋىن كۇتەدى, – دەيدى الىشەر.
بىلتىر وڭىردەگى ۇزدىك 30 ۆولونتەر توبىنا قوسىلعان الىشەر قازىر ۆولونتەرلەر قوزعالىسىن الەۋمەتتىك جەلىلەر ارقىلى ناسيحاتتاۋدى قولعا الىپتى.
پاۆلودار وبلىسى
