قوعام • 06 مامىر، 2020

اجىراسۋ ازايسىن دەپ...

34 رەت كورسەتىلدى

اقتوبە قالاسىندا بۇدان ەكى جىل بۇرىن «اناعا تاعزىم» اتتى ارنايى ورتالىق قۇرىلىپ، ءسانى مەن ساۋلەتى كەلىسكەن سىڭعىرلاعان سۋ جاڭا عيماراتقا ورنالاستى.

سول ۋاقىتتان بەرى وڭىرلەر اراسىندا بالاماسى جوق الەۋمەتتىك قۇرىلىم انالار مەن قىز-كەلىنشەكتەرگە قاتىستى تولعاعى جەتكەن ماسەلەلەردى شەشۋ مەن رەت­تەۋگە ۇلەس قوسىپ كەلەدى. تاياۋدا مۇن­­دا تاعى ءبىر جاعىمدى جاڭالىق بولدى. ياعني اتالعان عيمارات جانىنان «با­قىتتى وتباسى» ورتالىعى اشىلىپ قىز­مەت كورسەتە باستادى.

– مۇنى بۇعان دەيىن جۇمىس ىستەپ كەلگەن وتباسىن ساقتاۋ كابينەتىنىڭ جاڭا ساپالىق دەڭگەيگە كوتەرىلۋىنىڭ باستى كورىنىسى دەپ باعالاۋعا بولادى. ماقسات – وتباسى قۇندىلىعىن دارىپتەۋگە كەڭىنەن جول اشۋ، – دەيدى بۇل جونىندە Nur Otan پارتياسىنىڭ اقتوبە وبلىستىق فيليا­لى توراعاسىنىڭ ءبىرىنشى ورىنباسارى ەربول داناعۇلوۆ.

جاڭادان اشىلعان ورتالىقتا كاسىبي مەدياتورلار جانە زاڭگەرلەر مەن پسيحولوگتەر تۇرعىندارعا ءتيىستى كومەك بەرۋگە ءبىر كىسىدەي جۇمىلعان. سونداي-اق الەۋمەتتىك-تۇرمىستىق ماسەلەلەردىڭ شەشىمىن بىرلەسىپ ىزدەستىرۋ جولدارى دا قاراستىرىلعان. بۇل ءۇشىن وڭىردەگى مەملەكەتتىك ورگاندار باسشىلارى مەن ءماسليحات دەپۋتاتتارىنىڭ تۇر­عىنداردى تۇراقتى قابىلداۋ تارتىپتەرى بەلگىلەنگەن.

وتباسىنىڭ شايقالماۋى، اتا-انا­لاردىڭ ۇل-قىزدارىنا ۇلگى-ونەگە كورسەتە ءبىلۋى وتباسى مۇشەلەرى ارا­سىنداعى تاتۋلىق پەن تۇسىنىستىك، ءوزارا جان جىلۋى باقىتتى وتباسى اتانۋعا اپاراتىن جولدىڭ باسى. ايتسە دە ومىردە شىنى اياق سىلدىرلاپ قالاتىن جايتتار دا كەزدەسەدى. تۇككە تۇرمايتىن كيكىلجىڭگە بولا ەرلى-زايىپتىلاردىڭ اجىراسۋ دەرەكتەرى دە ورىن الىپ جۇرگەنى ءمالىم. باقىتتى وتباسى وسى ماسەلەلەرگە بايلانىستى جۇرگىزىلەتىن جۇمىستاردىڭ جۇرەكتەرگە مەيلىنشە جاقىن بولۋىن ماقسات تۇتىپ وتىر. اتالعان ورتالىقتا قىزمەت ەتىپ جۇرگەن كاسىبي مەدياتور، ومىردەن كورگەنى مەن كوڭىلگە تۇيگەنى مول جان بيبىگۇل ابدىشۇكىرقىزى بۇل باعىتتاعى تۇيتكىلدەر مەن بەتپە-بەت كەلىپ جۇرگەندەرى جونىندە بىلايشا اڭگىمەلەپ بەردى.

 – ءبىز اقتوبە قالالىق سوتىنا اجى­را­سۋعا ءوتىنىش بەرگەن ەرلى-زايىپ­تى­لار­مەن اشىق اڭگىمە جۇرگىزەمىز. ەكەۋىنىڭ ورتا­سىنا ءتۇسۋ وتە نازىك ءارى سارى مايدان قىل سۋىرعانداي كۇردەلى ماسەلە ەكەنى ءمالىم. سوعان قاراماستان ولارمەن ورتاق ءتىل تابىسۋعا ۇمتىلىپ كەلەمىز. ونىڭ ناتيجەسى جامان ەمەس. اجىراسۋعا ارىز بەرگەندەردىڭ ۇشتەن ەكىسى قايتادان تاتۋلاسىپ، ورتاق مامىلەگە كەلگەنى ءبارىمىز ءۇشىن قۋانىش.

تاعى ءبىر ايتارى، اجىراسۋعا بەل بۋعان جاس وتباسىلاردىڭ الپىس پا­يىزى اتا-ەنەسىمەن بىرگە تۇرعىسى كەل­مەي­تىن­دەر ەكەن. سونداي-اق جيىرما پايىز كەلىنشەكتەر مەن ايەلدەر تۇرمىستارى مەن تابىستارى ءتاۋىر بولا تۇرسا دا وزدە­رىنە ەر-ازاماتپەن قۇقىمىز تەڭ دەپ ولار­عا كوكىرەك كورسەتۋدى ادەتكە اينالدىرىپتى.

 

اقتوبە

 

سوڭعى جاڭالىقتار

15169 ادام كوروناۆيرۋس جۇقتىردى

كوروناۆيرۋس • كەشە

ۇقساس جاڭالىقتار