ءمينيستردىڭ ايتۋىنشا, كوروناۆيرۋس پاندەمياسى ەكونوميكاعا جانە ەڭبەك نارىعىنا تەرىس اسەر ەتۋدە. وسىعان بايلانىستى ۇكىمەت قابىلداپ جاتقان ماڭىزدى شارالاردىڭ ءبىرى — جاڭا «جۇمىسپەن قامتۋدىڭ جول كارتاسى».
«باعدارلامانىڭ نەگىزگى شارتتارى – قىزمەت كورسەتۋشىلەردىڭ جانە پايدالاناتىن قۇرىلىس ماتەريالدارىنىڭ كەم دەگەندە 90%-ى وتاندىق وندىرۋشىلەر مەن مەردىگەرلەردەن بولۋى ءتيىس, قۇرىلىپ جاتقان جۇمىس ورىندارىنا جۇمىسسىز جۇرگەن, اسىرەسە جۇمىسسىز جاستاردىڭ كەم دەگەندە 50%-ى جۇمىسپەن قامتۋ ورتالىقتارى ارقىلى تارتىلۋى ءتيىس», — دەدى ب. نۇرىمبەتوۆ.
جالپى اكىمدەر «جۇمىسپەن قامتۋدىڭ جول كارتاسى» اياسىندا 6 506 جوبانى ۇسىندى. ونىڭ ىشىندە 2 703 جوبا — الەۋمەتتىك ينفراقۇرىلىمعا, 1 039 جوبا — تۇرعىن-ءۇي شارۋاشىلىعىنا, 1 799 جوبا — ينجەنەرلىك-كولىك ينفراقۇرىلىمىنا جانە 695 جوبا ەلدى مەكەندەردى اباتتاندىرۋعا قاتىستى.
اتالعان جوبالاردى ىسكە اسىرۋ اياسىندا بارلىعى 255 مىڭ جۇمىس ورنى قۇرىلادى. ىسكە اسىرىلعان جوبالار ەكونوميكانىڭ ءتۇرلى سالالارىندا 100 مىڭنان استام تۇراقتى جۇمىس ورىندارىن قۇرۋعا ىقپال ەتەدى.
«جول كارتاسىندا ىرىكتەلگەن جوبالار ۋاقىتشا جۇمىسپەن قاتار الەۋمەتتىك ماڭىزدى ماسەلەلەردى شەشۋگە, ەكونوميكالىق تيىمدىلىكتى ارتتىرۋعا, ارالاس سالالاردى دامىتۋعا, تۇراقتى جۇمىس ورىندارىن قۇرۋعا ىقپال ەتەدى», — دەپ اتاپ ءوتتى مينيستر.
سونىمەن قاتار, «جول كارتاسى» اياسىندا 80 جاڭا ءبىلىم بەرۋ مەكەمەسى سالىنادى. ءوز كەزەگىندە, بۇل اپاتتى جانە ءۇش اۋىسىمدى مەكتەپتەردىڭ پروبلەماسىن شەشۋگە, اۋىلداعى بالالاردىڭ ءبىلىم الۋىن قامتاماسىز ەتۋگە, مۇعالىمدەرگە 7 مىڭ جاڭا جۇمىس ورنىن اشۋعا مۇمكىندىك بەرەدى. جاڭا وتباسىلىق دارىگەرلىك امبۋلاتوريالار اۋىلدىق جەرلەردەگى حالىقتىڭ دەنساۋلىعىن جاقسارتۋعا, مەديتسينالىق ساقتاندىرۋ جۇيەسىن جەتىلدىرۋگە, اۋىلدىق جەرلەردە دارىگەر-مامانداردىڭ تۇراقتى جۇمىسپەن قامتىلۋىن قامتاماسىز ەتۋگە جول اشادى.
بۇدان وزگە, بىرقاتار وبلىستاردا جۇمىس ىستەپ تۇرعان سۋارمالى كەشەندەردى قايتا جاڭارتۋ سۋارمالى جەرلەردىڭ كولەمىن ۇلعايتۋعا, حالىقتىڭ ەگىنشىلىكپەن, مال شارۋاشىلىعىمەن اينالىسۋ مۇمكىندىكتەرىن كەڭەيتۋگە جول اشادى. ەسەپ بويىنشا, اتالعان جوبالار ارالاس سالالاردا 77 مىڭ تۇراقتى جۇمىس ورنىن اشۋعا مۇمكىندىك بەرەدى.
«بارلىق 6 506 جوبانىڭ 2 410-ى رەسپۋبليكالىق بيۋدجەتتە قاراستىرىلعان قاراجات ەسەبىنەن ىسكە اسىرىلۋدا. 1 مامىرداعى جاعداي بويىنشا مەملەكەتتىك ساتىپ الۋ بويىنشا كونكۋرستار اياقتالدى, 1 779 جوبا بويىنشا (نەمەسە 73,8%) مەردىگەرلەر انىقتالدى», — دەدى ب. نۇرىمبەتوۆ.
بۇل باعىتتا جامبىل, شىعىس قازاقستان, پاۆلودار, قاراعاندى, الماتى, تۇركىستان وبلىستارى الدا كەلەدى. بىرقاتار وڭىرلەردە 1 265 جوبا بويىنشا جۇمىس باستالدى, 17 مىڭنان استام جۇمىس ورنى قۇرىلدى, 10 332 جۇمىسشى قابىلداندى.
ەڭبەك جانە حالىقتى الەۋمەتتىك قورعاۋ مينيسترلىگى «جول كارتاسىن» ىسكە اسىرۋ مونيتورينگىنىڭ تەتىگىن ازىرلەدى. ءاربىر وبلىس, قالا, اۋدان جانە اۋىل بويىنشا ەسەپ جۇرگىزىلەدى, ءاربىر جوبا بويىنشا ونىڭ «پاسپورتى» ازىرلەندى. «پاسپورتتا» جوبانىڭ اتاۋىنان باستاپ, ونىڭ ماقساتى, قول جەتكىزۋ ءتيىستى تۇپكىلىكتى جوسپارلى كورسەتكىشى, ورىندالۋ مەرزىمى, مەردىگەر تۋرالى مالىمەتتەر, قۇرىلاتىن جۇمىس ورىندارىنىڭ سانى, جۇمىسپەن قامتۋ ورتالىعى ارقىلى قابىلدانعانداردىڭ جالاقى مولشەرى كورسەتىلەدى.
بۇگىنگى بارلىق باعدارلامالاردىڭ الەۋەتىن ەسكەرە وتىرىپ, 2020 جىلى 1 ملن 220 مىڭ ادامدى جۇمىسقا تارتۋعا مۇمكىندىك بار.
