ايماق حالقى وزدەرى جەتىسپەي وتىرسا دا, قولىنداعى ماي-قۇرتىن, قوراسىنداعى مالىن سوعىسقا كومەك رەتىندە اتادى. وسى تۇستا ايماق باسشىسى بولعان جەڭىسحان دۇزەلباي ۇلى «سوعىسقا كومەك» اكتسياسىن باسقارىپ, ۇيىمداستىرۋشىلاردىڭ الدىڭعى قاتارىندا ءجۇردى.
جەكەڭ بەرتىندە بايولكەلىك قالامگەر سويان قاجىباي ۇلىنا ايتىپ بەرىپ جازدىرعان ەستەلىگىندە: «ەكىنشى دۇنيەجۇزىلىك سوعىسقا كومەك بەرۋدى كۇنى-ءتۇنى ۇيقىسىز ءجۇرىپ ۇيىمداستىردىق. وسى ارقىلى كەڭەس وداعىنىڭ نازارىن باي-ولكەگە تارتۋ جۇمىستارىن مىقتاپ قولعا الدىق. ناتيجەسىندە, سوعىس اياقتالعان سوڭ بىزگە سسسر-دىڭ كول-كوسىر كوپ كومەگى كەلدى. مايدانعا جىبەرگەن كومەگىمىزدىڭ قارىمتاسىن دا وسىلاي كوردىك. بۇل ىستەردىڭ بارلىعىن مارشال چويبالسىنمەن تىكەلەي نۇسقاۋىمەن اتقارىپ شىقتىم» دەگەن ەكەن.
ايماقتىق ارحيۆ قورىندا: «باي-ولكە حالقى 1941-1942 جىلدارى مايدانعا 702 899 سومنىڭ دۇنيەسىن جيناپ, سوعىسقا 4791 ات جىبەردى. 1943 جىلى 376 370 سومدى اقشالاي جيناپ, وعان قوسا 2629 جىلقى بەردى. 1944 جىلى 103 768 سوم جيناپ, تاعى دا 791 ات دايىندادى. 1945 جىلدىڭ باسىندا 1071 ات بەردى» دەگەن قۇجات ساقتالعان.
باي-ولكەلىكتەردىڭ كومەگىن قابىل العان قىزىل ارميا وكىلدەرى دە قاراپ قالماي, ايماق حالقىنا سالەمىن جولداپ, ۇيىمداستىرۋشى جەڭىسحان دۇزەلباي ۇلىنا بەساتار مىلتىق سىيعا جىبەرگەن ەكەن (سۋرەتتە). ال بۇقاراعا جىبەرگەن قۇتتىقتاۋ حاتتىندا بىلاي دەلىنىپتى:
ءجۇنيسحان (جەڭىسحان) جولداسقا!
سىزگە وسى قاراپايىم سىيلىقتى ۆينتوۆكانى تابىس ەتە وتىرىپ قىزىل ارميانىڭ سولتۇستىك-باتىس مايدانىنداعى جاۋىنگەرلەر, كومانديرلەر جانە ساياسي قىزمەتكەرلەر وتانىمىزدىڭ دۇشپاندارىمەن قيان-كەسكى سوعىس جىلدارىندا قىزىل ارمياعا قامقورلىق تانىتىپ, كوڭىل بولگەن سىزگە جانە ءسىز ارقىلى تۋىسقان موڭعول حالقىنا شىن جۇرەكتەن سالەم جولداپ, العىس ايتادى.
سىزدەردىڭ دەلەگاتسيانىڭ مايدانداعى ءبىزدىڭ بولىمگە كەلۋى, جاۋىنگەرلەرمەن جۇزدەسىپ, سىيلىق تارتۋ ەتكەنى سسسر مەن محر حالىقتارى اراسىنداعى دوستىق ارقاۋىنىڭ نىعايۋىنا جاڭا سەرپىن بەرىپ, ءبىزدىڭ ءبولىمنىڭ دۇشپاندارعا سوققى جاساۋىنا تىڭنان كۇش قوسقانداي بولدى.
مونعول حالىق رەسپۋبليكاسىنىڭ ەڭبەككەر حالقىنا جانە حالىقتىق رەۆوليۋتسيالىق ارمياسىنىڭ ساربازدارىنا قىزىلارميالىق ءبىزدىڭ العىسىمىز بەن جاۋىنگەرلىك ىستىق سالەمىمىزدى جەتكىزۋىڭىزدى وتىنەمىز.
سولتۇستىك-باتىس مايداننىڭ اسكەري كەڭەسى:
گەنەرال لەيتانات ۆلاديمير بوگاتكين
گەنەرال لەيتانات ۆەنيامين زلوبين
گەنەرال مايور الەكسەي پرونين
22 جەلتوقسان, 1942 جىل.
