اتالعان اۋدانعا 2020 جىلعى 2 مامىردا شىققان قۇتقارۋشىلار كۇن سايىن اۋداننىڭ ەلدى مەكەندەرىندەگى سۋدىڭ دەڭگەيىنە مونيتورينگ جۇرگىزۋدە, جەرگىلىكتى حالىققا كومەك كورسەتۋ ءۇشىن سۋ باسقان اۋىلداردى ارالاۋدا. وسىلايشا, شىمكەنت قالاسى تجد جەدەل-قۇتقارۋ جاساعىنىڭ قۇتقارۋشىلارى جەڭىس اۋىلىندا ءىرى جانە ۇساق مالداردى قۇتقارۋ جۇمىستارىن جۇرگىزدى.
200-دەن استام ءۇي ورنالاسقان ورگەباس اۋىلىندا قۇتقارۋشىلار قايىقتا تەكسەرۋ جۇرگىزىپ, ناتيجەسىندە جەرگىلىكتى تۇرعىندارعا كومەك كورسەتتى. سۋ باسقان ۇيلەردەن ولار قۇندى زاتتار مەن قۇجاتتاردى كوشىرۋگە كومەكتەستى. سونداي-اق, اۋىلدى سۋ اعىسىنان قورعاۋ ءۇشىن قۇتقارۋشىلار جەرگىلىكتى تۇرعىندارمەن بىرلەسىپ, جاعالاۋدى بەكىتۋ جۇمىستارىن جۇرگىزدى. بارلىعى 100 قاپ قۇم توسەلدى.
كوماندالىق-شتابتىق ماشيناسى ارقىلى قر ءىىم توتەنشە جاعدايلار كوميتەتىنىڭ, تۇركىستان وبلىسىنىڭ جانە شىمكەنت قالاسى تج دەپارتامەنتىنىڭ باسشىلارىمەن بايلانىس ورناتىلدى. شىمكەنت قالاسىنىڭ قۇتقارۋشىلارى سۋ دەڭگەيىنىڭ مونيتورينگىن جانە اۆاريالىق-قۇتقارۋ جۇمىستارىن جۇرگىزۋدى جالعاستىرۋدا, وعان جەكە قۇرامنان 17 ادام جانە 4 بىرلىك تەحنيكا جۇمىلدىرىلدى.
ايتا كەتسەك, بۇگىن شىمكەنت قالاسىنان ماقتاارال اۋدانىنداعى سۋ باسقان ەلدى مەكەندەرگە اۆاريالىق-قۇتقارۋ قىزمەتى ءۇشىن 30 ارنايى تەحنيكا جىبەرىلدى.
