قالالىق پوليتسيا باسقارماسىنىڭ جەرگىلىكتى پوليتسيا قىزمەتى ءبولىمى باستىعىنىڭ ورىنباسارى, پوليتسيا پودپولكوۆنيگى ايدىن احماعامبەتوۆتىڭ ايتۋىنا قاراعاندا وسىنداي ۆەلوسيپەد ۇرلىعى پاترۋلدەگى جاساقتىڭ كۇشىمەن ءبىرىنشى رەت اشىلىپ وتىر ەكەن. «زارينا ەلۋباەۆا - پوليتسيا وفيتسەرى, ءىىم قوستاناي اكادەمياسىنىڭ تۇلەگى. جاس قىزمەتكەر جاۋاپكەرشىلىك جانە ەڭبەكقورلىعىمەن ەرەكشەلەنەدى», - دەيدى ول.
وقيعا بىلاي بولعان. كۇن سايىن قالاداعى قوعامدىق ءتارتىپتى باقىلاۋعا 550 ادامدىق قىزمەتكەرلەر بىرنەشە توپ بولىپ شىعاتىن بولسا, زارينا باستاعان توپ تا سونىڭ ءبىرى بولعان. ول قالانىڭ ينتەرناتسيونال كوشەسىنەن چايكوۆسكي كوشەسىنە دەيىن اۋەزوۆ كوشەسىندەگى №497 كۆارتالعا باقىلاۋ جۇرگىزگەن. جاساق قۇرامىندا زارينا ەلۋباەۆادان باسقا قاتارداعى پوليتسەي قايسار بوتپاەۆ جانە ۇلتتىق ۇلاننىڭ اسكەري ينستيتۋتىنىڭ ءۇش كۋرسانتى بولعان. كەشكى ساعات 5 شاماسىندا بوكەتوۆ كوشەسىندەگى دۇكەندەردىڭ ءبىرىنىڭ الدىنان قىمبات باعالى Centurion ۆەلوسيپەدى ۇرلاندى دەگەن حابار تۇسەدى.
سول توڭىرەكتى باقىلاپ جۇرگەن زارينانىڭ كوزى اۋەزوۆ كوشەسىنىڭ بويىنداعى اۋلالاردىڭ بىرىندە سيپاتتاماسى ۇرلانعان م ۇلىككە كەلەتىن ۆەلوسيپەدتى شالىپ قالادى. قىراعى لەيتەنانت جاساعىنا ونى مىنگەن ادامدى جەدەل ۇستاۋعا كوماندا بەرىپ, ۇرىنى بۇلتارتپاي قۇرىقتايدى. بۇل شىنىندا دا دۇكەننىڭ جانىنان ۇرلانعان ۆەلوسيپەد ەكەنى انىقتالادى. يەسى ءوزىنىڭ مۇلكىن جازباي تانيدى. شاقىرىلعان جەدەل-تەرگەۋ توبى اتالعان قىلمىسقا قاتىستى قاجەتتى پروتسەسسۋالدىق ءىس-ارەكەتتەرىن جالعاستىرىپ, وسى فاكتى قىلمىستىق كودەكستىڭ «ۇرلىق» بابى بويىنشا سوتقا دەيىنگى تەرگەپ-تەكسەرۋ جۇمىستارىنا كىرىسىپ كەتتى. قازىر ولار كۇدىكتىنىنىڭ باسقا دا ۇقساس قىلمىستارعا قاتىسى بار-جوعىن تەكسەرۋدە.
ءسويتىپ, جاس لەيتەنانت ءوزىنىڭ مىندەتىنە جاۋاپكەرشىلىكپەن قاراپ, قىراعىلىق كورسەتكەندىگىنىڭ ارقاسىندا ماقتاۋعا ىلەكتى. ونىڭ ەڭبەگىن ادال باعالاۋ الداعى كۇندەردىڭ مىندەتى بولسا كەرەك.
پەتروپاۆل
