ارينە, پوليتسيا قۇرامىندا قازاقپەن بىرگە كوپ ەتنوس وكىلدەرى بولىپ, ولاردىڭ ءبارى قازاقستان رەسپۋبليكاسىنا تاتۋلىقپەن, بىرلىكپەن ادال قىزمەت ەتىپ جاتقاندارى كوڭىلگە قۋانىش ۇيالاتادى. بىراق قازاقستاندا ءبىر-اق - قازاق ۇلتى بار ەكەندىگىن, قالعان جۇرت باسقا ەتنوستاردىڭ وكىلدەرى ەكەنىن ايىرا جازۋ كەرەكتىگىن وزگەلەرمەن قاتار پوليتسيا قىزمەتىنە دە ءبىلۋ شارت ەكەنىن ۇمىتپاعان ءجون. قازاقستان ازاماتتارىنىڭ ءبارى تەڭقۇقىقتى, ءبارى دە بىرىگىپ, ەلىمىزدىڭ ءبىرتۇتاس حالقىن قۇرايدى. سوندىقتان دا 1 مامىردى قازاقستان حالىقتارىنىڭ ەمەس, قازاقستان حالقىنىڭ بىرلىگى كۇنى دەپ اتايمىز. ءبىز ءبىر حالىقپىز, الايدا ۇلت دەگەندە قازاقتان باسقالاردى وزگە ەتنوستاردىڭ وكىلدەرى دەپ اتاۋ قاجەتتىگىن ارقاشان ەسكەرگەن دۇرىس. سونىمەن بىرگە مۇندايدا كەڭەستىك, جاۋىردى جابا توقىعان, قولدان جاسالعان «ينتەرناتسيونالدىق دوستىق» دەگەندى دە تىقپالاۋدىڭ ءجونى جوق.
ءباسپاسوز قىزمەتىنىڭ حابارىنا قاراعاندا سقو قىزىلجار اۋدانىنىڭ سوكولوۆكا كەنتىنىڭ پوليتسيا بولىمىندە ازەربايجان ەتنوسىنىڭ وكىلى, پوليتسيا مايورى ەلدار اللاحۆەرانوۆتىڭ باسقارۋىندا قازاقتان باسقا 14 ەتنوستىڭ وكىلدەرى قىزمەت ەتەدى ەكەن. «ۇجىمداعى دوستىق قارىم-قاتىناستى جەرگىلىكتى تۇرعىنداردىڭ پىكىرلەرى كۋالەندىرەدى, ولار پوليتسەيلەردىڭ كاسىبيلىگىنە ءجيى ريزاشىلىقتارىن بىلدىرەدى», دەيدى ءباسپاسوز قىزمەتى. ال ە.اللاحۆەرانوۆتىڭ ءوزى بولسا: «ارقايسىسىمىزدىڭ اتىمىزعا تۇرعىندار تاراپىنان ايتىلعان العىس سوزدەردى ەستىگەنگە قاتتى قۋانامىز. بۇلار قۇقىق قورعاۋ ورگاندارىنىڭ قىزمەتكەرلەرى ءۇشىن وتە ماڭىزدى, ويتكەنى ول ءبىزدىڭ جۇمىسىمىزدىڭ ەڭ باستى باعاسى», دەيدى.
بۇرىن اۋدان ورتالىعى بولعان سوكولوۆكا كەنتىندەگى وسى پوليتسيا ءبولىمىنىڭ قىزمەتكەرلەرى 9 اۋىلدىق وكرۋگتەن تۇراتىن 34 ەلدىمەكەنگە قىزمەت ەتەدى. كارانتين جاعدايىندا اۋىل تۇرعىندارىنىڭ پەتروپاۆل قالاسىمەن قاتىناسى ءۇزىلىپ قالدى. كۇندەلىكتى كوپتەگەن ماسەلەلەردى شەشۋگە قولايسىزدىقتار تۋدى. وسىندايدا پوليتسيا قىزمەتكەرلەرى تۇرعىندارعا قولدان كەلگەن كومەكتەرىن جاساپ تۇرعان.
«بىرلىك, دوستىق - بۇل ءبىزدىڭ قازاقستان حالقىنىڭ باستى بايلىعى. ءبىز, ونى قازىر توتەنشە جاعداي رەجىمىندە جۇمىس ىستەپ جۇرگەندە دە سەزىندىك. ءبىزدىڭ باستى مىندەتىمىز - زاڭدىلىقتى قامتاماسىز ەتۋ عانا ەمەس, سونىمەن بىرگە حالىققا كومەك كورسەتۋ», - دەيدى سقو پد باستىعى پوليتسيا پولكوۆنيگى مارات تولەباەۆ.
ال 1 مامىر كۇنى ع.مۇسىرەپوۆ اتىنداعى اۋدانداعى بلوك-بەكەتتەرگە اۋداندىق ەتنومادەني ورتالىقتاردىڭ وكىلدەرى ۇلتتىق تاعامداردان ءدام تاتقىزعان ەكەن. بۇل - بلوك-بەكەتتەردەگى كەزەكشىلىكتە تۇرعان پوليتسەيلەر مەن دارىگەرلەر ءۇشىن وتە ماڭىزدى مەرەكەلىك كوڭىل-كۇي تۋعىزعان.
