بۇل وتباسىندا ۆيرۋس جۇقتىرعان 3 ەرەسەك بالامەن قاتار, 26 ناۋرىز كۇنى دۇنيەگە كەلگەن 1 ايلىق ءسابي دە اۋىرعان ەدى. قۋانىشتىسى, بۇگىن ەڭبەكشىقازاق اۋدانارالىق كوپسالالى اۋرۋحاناسىنان نارەستە ەمدەلىپ, اناسىمەن بىرگە ۇيىنە بارۋعا رۇحسات الدى.
- بالا اۋرۋحاناعا تۇسكەن كەزدە تۋعانىنا 18 كۇن عانا بولعان. سوندىقتان ەرەكشە باقىلاۋعا الىپ, كۇندەلىكتى ەمدەۋ ءتاسىلىن دارىگەرلەرمەن تالقىلاپ وتىردىق. بالادا ەم قابىلداۋ كەزىندە ەشقانداي قيىندىق تۋعان جوق. بالا اناسىنىڭ جانىندا بولدى. اۋرۋحاناداعى 20 كۇن ىشىندە 1 كەلى سالماق قوستى. قازىر جاعدايى جاقسى, - دەيدى اۋداندىق اۋرۋحانانىڭ باس دارىگەر جاميلا ابەۋوۆا.
سونداي-اق, ەڭبەكشىقازاق اۋدانىندا 16 ءساۋىر كۇنى تىركەلگەن 2 ناۋقاستىڭ ءبىرى 73 جاستاعى قاريا بولسا, ءبىرى 1992 جىلى تۋعان ەسىك قالاسىنىڭ تۇرعىنى بولاتىن. دارىگەرلەر قاريا كوروناۆيرۋس ينفەكتسياسىنان تولىق ەمدەلىپ شىققانىن ايتادى.يي
ال قاسكەلەڭ قالالىق ينفەكتسيالىق اۋرۋحاناسىندا 17 ساۋىردەن باستاپ ەم قابىلداعان قاراساي اۋدانىنىڭ 1971, 1967, 1985 جىلى تۋعان تۇرعىندارى بۇگىن تولىقتاي جازىلىپ شىقتى.
- اتالعان ەكى اۋداننىڭ ەمدەلۋشىلەرىنە 1 مامىر كۇنى جۇرگىزىلگەن قايتا تالداۋ قورىتىندىلارى تەرىس ناتيجە كورسەتتى. اتاپ وتسەك, ەڭبەكشىقازاق اۋدانىندا جازىلىپ شىققانداردىڭ بارلىعى راحات اۋىلدىق وكرۋگىنە قاراستى «كوكساي», «بەرەكە», «التىن الما», «التىن ادام» ساياجايلارىنىڭ تۇرعىندارى. اتالعان ساياجايلاردا اۋرۋدىڭ جاڭا جاعدايى تىركەلمەگەندىكتەن, ولارداعى كارانتين الىنىپ تاستالدى. جالپى, COVID-19 ينفەكتسياسىنىڭ تارالۋى بويىنشا ەپيدەمولوگيالىق جاعدايدىڭ وزگەرۋىنە بايلانىستى كارانتين شارالارىنىڭ رەجيمى مەن مەرزىمى وزگەرۋى مۇمكىن. بىراق جالپى كارانتين تالاپتارى ساقتالادى-, دەپ حابارلايدى الماتى وبلىسى اكىمىنىڭ ءباسپاسوز حاتشىسى عالىمۇرات جۇكەل.
