1942 جىلعى ازاماتشا شىمكەنت قالاسى, اباي اۋدانىنىڭ تۇرعىنى. 78 جاستاعى ناۋقاس 27 ءساۋىر كۇنى جرۆي, پنەۆمونيا دياگنوزىمەن جەدەل جاردەم قىزمەتى ارقىلى قالالىق جۇقپالى اۋرۋلار اۋرۋحاناسىنا جەتكىزىلگەن. ازاماتشا ءۇي جاعدايىندا ءوز بەتىنشە ەمدەلىپ, مەديتسينالىق كومەككە جۇگىنبەگەن. ناۋقاستان زەرتحانالىق سىناما الىنىپ, پتر دياگنوستيكالىق زەرتتەۋ قورىتىندىسىمەن COVID-19 دياگنوزى ناقتىلاندى. ناۋقاس كوروناۆيرۋس وشاعىنان انىقتالدى.
29 ءساۋىر كۇنى ازاماتشا جانساقتاۋ بولىمىنە جاتقىزىلىپ, جاعدايىنىڭ اۋىرلىعىنا بايلانىستى وكپەنى جاساندى جەلدەتۋ اپپاراتىنا قوسىلعان. ناۋقاستىڭ قوسالقى اۋرۋلارى: 3-ءشى دارەجەلى ارتەريالدىق گيپەرتەنزيا, وتە جوعارى توبى, سوزىلمالى برونحيت.
ناۋقاس ەمدەۋ حاتتاماسىنا سايكەس, قاجەتتى ەم شارالارى جۇرگىزىلىپ, رەسپۋبليكالىق ماماندارمەن بىرنەشە رەت كەڭەس وتكىزىلگەن.
جۇرگىزىلگەن رەانيماتسيالىق ءىس-شارالارعا قاراماستان, 3 مامىر كۇنى, ساعات 10:20-دا ناۋقاس قايتىس بولدى. ناۋقاسپەن قارىم-قاتىناستا بولعان وتباسى مۇشەلەرىندەگى 6 ازاماتتان كوروناۆيرۋس ينفەكتسياسى انىقتالىپ, ەمدەۋ شارالارى جۇرگىزىلۋدە, جاعدايلارى جاقسى.
2020 جىلدىڭ 3 مامىر كۇنگى جاعداي بويىنشا شىمكەنت قالاسىندا كوروناۆيرۋس ينفەكتسياسىنىڭ 210 جاعدايى تىركەلگەن.
