تابيعات بايلىعىنا قاستاندىق جاساعانى تۋرالى بەينەسيۋجەت الەۋمەتتىك جەلىلەرگە جاريالانعان ساتتە تاراز قالاسىنىڭ اكىمى ايتقازى قارابالاەۆ قالاداعى س.سەيفۋللين كوشەسىنە جەتتى. ول ءتيىستى مەكەمە باسشىلارىنا تالداردى اياۋسىز وتاعاندارعا ءىس قوزعاۋعا تاپسىرما بەردى.
انىقتالعانداي, «تالاس» مولتەكاۋدانى №17 ءۇيدىڭ جانىنداعى قاۋىپتى 27 اعاشتى جاسارتۋ ماقساتىندا ولاردىڭ توبەلەرىن قىسقارتۋعا اكىمدىكتىڭ تۇرعىن-جاي كوممۋنالدىق شارۋاشىلىق ءبولىمى تاراپىنان اعىمداعى جىلعى 20 ناۋرىز كۇنى رۇقسات بەرىلگەن ەكەن. الايدا, كاسىپكەر تالاپتى ورىنداماي, اعاشتاردى تۇبىنەن وتاپ تاستاعان. قازىرگى تاڭدا قۇزىرلى ورگاندار تاراپىنان كاسىپكەردىڭ ىسىنە قاتىستى قىلمىستىق ءىس قوزعالدى.
بۇگىندە جەرگىلىكتى پوليتسيا قىزمەتى مەن ورمان شارۋاشىلىعى ماماندارى كەلتىرىلگەن زالال مولشەرىن انىقتاۋدا. ال, كاسىپكەرگە كەلتىرىلگەن زالال ءۇشىن 100 ايلىق ەسەپتىك كورسەتكىش كولەمىندە ايىپپۇل سالىنىپ, قىلمىستىق ءىس قوزعالدى. سونداي-اق, تارازداعى اباي داڭعىلى مەن تاشكەنت كوشەسىنىڭ قيىلىسىنداعى «Golpass» مەيرامحاناسى الدىنداعى كەسىلگەن اعاشقا بايلانىستى قالا اكىمى ايتقازى قارابالاەۆ بارلىق قۇزىرلى ورگان ماماندارىن كورسەتىلگەن مەكەنجايعا جيناپ, اعاشتى كەسكەندەردى تاۋىپ, اكىمشىلىك جاۋاپكەرشىلىككە تارتۋدى تاپسىردى. اتاپ وتسەك, قالانىڭ باستى كوشەلەرىنىڭ ءبىرى بولىپ سانالاتىن بۇل كوشەدەگى تالدى تۇبىنەن كەسۋگە اكىمدىك تاراپىنان ەشقانداي دا رۇقسات بەرىلمەگەن. اتالعان مەيرامحانا قىزمەتكەرلەرىنىڭ ايتۋىنشا, العاشقىدا الدەكىمدەر اعاشتى ورتاسىنان, بىرنەشە كۇننەن كەيىن تۇندە تۇبىنەن كەسىپ, بۇتالارىن وسى جەرگە تاستاپ كەتكەن. كوشە بويىندا شاشىلعان بۇتاقتاردى الداعى كۇنى «جاسىل ەل-تاراز» جشس-ءنىڭ قوعامدىق جۇمىسشىلارى شىعارعان.قازىرگى تاڭدا بۇل ماسەلە بويىنشا قۇزىرلى ورگاندار ءىس قوزعاپ, تەرگەۋ امالدارى جۇرگىزىلۋدە. تاراز قالالىق اكىمدىگىنىڭ مالىمەتىنشە, قالاي بولعاندا دا جاسىل جەلەكتى قۇزىرلى ورگاننىڭ رۇقساتىنسىز, ورىنسىز وتاپ, كەسكەندەر قاتاڭ جازاعا تارتىلادى.
سونداي-اق, اكىمدىك بۇل ماسەلەگە قاتىستى ەشكىمنىڭ دە جازادان قۇتىلمايتىنىن مالىمدەدى.
