اۋدان ورتالىعى قورداي اۋىلىنداعى №1 د.قوناەۆ اتىنداعى مەكتەپ-گيمنازياسى مەن №4 ب.بولتىرىكوۆا اتىنداعى مەكتەپ-ليتسەيى دە بۇل باستاماعا لايىقتى ۇلەس قوسىپ كەلەدى. قورداي اۋدانىنىڭ اكىمى رۇستەم داۋلەت اتالعان ءبىلىم وشاقتارىنىڭ جاي-كۇيىمەن تانىستى. ءبىلىم نىساندارىن ارالاعان اكىم اتالعان مەكتەپتەردىڭ جاعدايىمەن جاقىنىراق تانىسىپ, شەشىمىن تاپپاي كەلە جاتقان كۇردەلى ماسەلەلەردىڭ اۋدان دەڭگەيىندە شەشۋ جولدارىن قاراستىردى.
ەڭ اۋەلى رۇستەم داۋلەت وبلىس بويىنشا ۇزدىكتەردىڭ قاتارىنان كورىنىپ جۇرگەن №1 د.قوناەۆ اتىنداعى مەكتەپ-ليتسەيىندە بولدى. مەكتەپ ديرەكتورى س.سارعاسقاەۆا اۋدان اكىمىنە مەكتەپ عيماراتىن كورسەتىپ, وقۋشىلاردىڭ جەتىستىكتەرىمەن ءبولىستى. اتالعان ءبىلىم وشاعى سوڭعى جىلدارى ءبىلىم سالاسىنداعى تاۋەكەل دارەجەسىن باعالاۋدىڭ 39 كريتەريى بويىنشا بارلىق تالاپتاردى ورىنداپ, سوڭعى ءۇش جىلدا الدىڭعى قاتاردان كورىنىپ كەلەدى. اتالعان مەكتەپتە بۇگىندە 1400-دەن استام وقۋشى ءبىلىم الادى. مۇندا 50-دەن استام ءتۇرلى مەكتەپ ۇيىرمەلەرى جۇمىس ىستەيدى. ناتيجەسىندە اتالعان مەكتەپ وقۋشىلارى وبلىستىق, رەسپۋبليكالىق سايىستاردا, ءتىپتى حالىقارالىق دەڭگەيدەگى بايقاۋلاردا توپ جارىپ, اۋدان نامىسىن قورعاپ ءجۇر. الايدا وسىنداي ۇلگىلى ءبىلىم بەرۋ مەكەمەسىندە وزەكتى ماسەلەلەردە دە بار بولىپ شىقتى. بىرىنشىدەن وقۋشىلار ءۇشىن ەڭ قاجەتتى سپورت جانە اكت زالىنىڭ توبەسىنەن سۋ اعىپ, قولايسىزدىق تۋدىرۋدا ەكەن. بۇدان كەيىن مەكتەپ ءۇشىن باسسەين ماسەلەسى وزەكتى. پايدالانىلماي تۇرعانىنا ءبىراز جىل بولعان حاۋىز كۇردەلى جوندەۋدى دە تالاپ ەتەدى. اۋدان اكىمى مەن مەكتەپ ديرەكتورى ونىڭ ورنىنا سپورتپەن اينالىساتىن بالالارعا ارناپ كۇرەس زالىن اشىپ, مەكتەپ جانىندا ورنالاسقان سپورت مەكتەبىنىڭ وقۋشىلارى ءۇشىن جاتتىعۋ زالىن جاساۋ كەرەكتىگى تۋرالى ورتاق شەشىمگە كەلدى. سونىمەن قاتار, مەكتەپ ديرەكتورى س.سارعاسقاەۆا «مەكتەبىمىزدە شىعارماشىلىقپەن اينالىسۋعا نيەت بىلدىرگەن وقۋشىلار سانى كوپ, دەگەنمەن شەبەرحانا مەن ەڭبەك ساباعىنا قاجەتتى زاتتاردىڭ بولماۋى قيىندىق تۋعىزىپ تۇر. وسىعان قولداۋ بىلدىرسەڭىز», دەپ, اۋدان اكىمىنە سۇرانىسىن جەتكىزدى. رۇستەم داۋلەت ەڭبەك كابينەتىندە دە بولىپ, وقۋشىلاردىڭ جاساعان بۇيىمدارىن كوردى. ول اۋدان اكىمدىگىنىڭ ءبىلىم بولىمىمەن بىرلەسىپ قاجەتتى زاتتار الۋ ءۇشىن ۇسىنىس بەرۋدى تاپسىردى.
سونداي-اق, ول مەكتەپ اۋلاسىنداعى اباتتاندىرۋ جۇمىستارىنا دا كوڭىل ءبولىپ, مۇنداعى جارىقتاندىرۋ جۇمىستارى, ورىندىقتاردى جاڭارتۋ, گۇلزارلاردى قالىپقا كەلتىرۋ جانە دالاداعى سپورت الاڭشالارىنىڭ ستاندارتقا سايكەس بولۋى كەرەكتىگىن باسا ايتتى. ال, مەكتەپتىڭ اۋلاسىنداعى سىرتقى جۇمىستارى بويىنشا اۋىل اكىمى ب.ساحاتوۆقا ءتيىستى تاپسىرما بەردى. كەيىننەن رۇستەم داۋلەت №4 ب.بولتىرىكوۆا اتىنداعى مەكتەپ-ليتسەيدە دە بولدى. بىلتىر عانا كۇردەلى جوندەۋدەن وتكەن ءبىلىم نىسانىنىڭ جاعدايىمەن تانىسقان اكىم مەكتەپتى بەزەندىرۋ بويىنشا ديرەكتورعا سىن ەسكەرتپەلەرىن ايتتى. سونىمەن قاتار, مەكتەپ باسشىسىنا ءتيىستى شارالار قابىلداۋ قاجەتتىگى جونىندە دە تاپسىرما بەردى.
اۋدان اكىمى رۇستەم داۋلەت مەكتەپتەردى ارالاۋ بارىسىندا ء«ابۋ ناسىر ءال-فارابي, اباي قۇنانباي ۇلى, احمەت بايتۇرسىن ۇلى سىندى ۇلى تۇلعالاردىڭ تاربيەلىك ءمانى بار قاناتتى سوزدەرى مەكتەپتىڭ كورنەكى ورىندارىندا جازىلۋ كەرەك. دانالاردىڭ سوزدەرى وسكەلەڭ ۇرپاقتى تاربيەلەۋدە تاپتىرمايتىن قۇرال», دەپ مەكتەپ ديرەكتورلارىنا اقپاراتتىق بەزەندىرۋلەر تۋرالى ۇسىنىسىن جەتكىزىپ, وقۋشىلاردىڭ ءبىلىم ساپاسىن ارتتىرۋ جونىندە تاپسىرمالار بەردى.
جامبىل وبلىسى
