دەي تۇرعانمەن, اۋداندا بىرقاتار ماسەلەلەر دە بار. ايدارلى اۋىلىنداعى №2 ورتا مەكتەپتە مەكتەپكە دەيىنگى بالالارعا ارنالعان «بالاپان» شاعىن ورتالىعى جۇمىس ىستەيدى. الايدا, عيمارات 50 جىلدان استام ۋاقىت بويى كۇردەلى جوندەۋ كورمەگەن. جامبىل وبلىسىنىڭ اكىمى بەردىبەك ساپارباەۆ تا مويىنقۇم اۋدانىنا جۇمىس ساپارى بارىسىندا ايدارلى اۋىلىندا بولىپ, اتالعان ماسەلەگە نازار اۋداردى. اتالعان ءبىلىم وشاعىندا ءبىلىم كورسەتكىشى ويداعىداي. مۇنداعى لينگۆيستيكالىق, اعىلشىن جانە روبوتوتەحنيكا كابينەتتەرىمەن تانىسقان اكىم مەكتەپ تۇلەكتەرىمەن بايلانىستىڭ وڭ جولعا قويىلماعانىن ايتتى. بۇل ورايدا مەكتەپتىڭ اكىمشىلىگى تۇلەكتەردى مەكتەپ تىرشىلىگى مەن ماسەلەلەسىنە بارىنشا تارتۋعا ىقپال ەتەتىن «Tulek.kz» سايتىنا ءتيىستى دەڭگەيدە ءمان بەرمەي وتىرعاندىعىن جەتكىزدى. ەندى بۇل مەكتەپتىڭ ماسەلەسى قالاي شەشىلەدى؟ وبلىس اكىمشىلىگى تاراپىنان قانداي كومەك بار؟ بۇل ورايدا بەردىبەك ساپارباەۆ ءبىلىم وشاعىنىڭ كۇردەلى جوندەۋ جۇمىستارىنا كومەكتەسۋگە ۋادە بەرىپ, اۋدان اكىمى مادەن مۇساەۆقا نىساننىڭ جوبالىق-سمەتالىق قۇجاتتارىن ۋاقىت سوزباي دايىنداۋدى تاپسىردى.
بۇگىنگى تاڭدا جامبىل وبلىسىندا حالىقتىڭ تۇرمىسىن ارتتىرۋعا ارنالعان پيلوتتىق جوبا جۇزەگە اسۋدا. بىراق, اتالعان جوبانىڭ شالعاي اۋىلداردا ورىندالۋى قانداي دەڭگەيدە؟ مويىنقۇم اۋدانى, كەڭەس اۋىلدىق وكرۋگىنە قاراستى ءبىر عانا ايدارلى اۋىلىنا بۇل ماقساتقا 630 ميلليون تەڭگە كولەمىندە قاراجات قاراستىرىلعان. پيلوتتىق جوبا اياسىندا 1708 باس مال ساتىپ الىنعان. الايدا, تۇرعىندار ولاردان وندىرىلگەن ءسۇتتى وتكىزەتىن جەردىڭ جوقتىعىن ايتىپ شاعىمدانۋدا. سونىمەن قاتار, ايدارلى اۋىلىنىڭ تۇرعىندارى اۋىز سۋدىڭ ساپاسىنا دا نارازىلىقتارىن بىلدىرۋدە. ولاردىڭ ايتۋىنشا, سۋ قۇرامىندا فتور قوسىندىسى كوپ. سونداي-اق, اۋىلدىقتار مادەنيەت ءۇيى قۇرىلىسىنا قاتىستى دا ماسەلە كوتەرگەن بولاتىن. ەندى بۇل ماسەلەلەر ءوڭىر باسشىلىعى تاراپىنان قالاي شەشىلەدى دەگەن ماسەلە تۇرعىندار ءۇشىن وزەكتى. پيلوتتىق جوبا بويىنشا الىنعان مالدىڭ ءسۇتىن وتكىزۋ ماسەلەسىنە بەردىبەك ساپارباەۆ ءوز پىكىرىن ءبىلدىردى. ول شۋ اۋدانىنداعى كاسىپكەرلەردىڭ بىرىندە تۇرعان ءسۇت وڭدەيتىن ءمودۋلدى تسەحتى وسى ىسكە جۇمىلدىرۋدىڭ ماڭىزدىلىعىنا نازار اۋدارىپ, مادەن مۇساەۆقا بۇل ماسەلەنى جان-جاقتى قاراستىرۋدى تاپسىردى.
مويىنقۇم اۋدانىنداعى بىرلىك اۋىلىنىڭ كىرەبەرىسىندە بلوك-بەكەت ورنالاسقان. بۇل جەردەن كۇنىنە 150-200 ادام وتەدى. مۇندا 4 پوليتسيا, 2 مەديتسينا قىزمەتكەرى مەن 2 سانيتار مامان جۇمىس ىستەۋدە. بىرلىك اۋىلى حالىق قاھارمانى قايرات رىسقۇلبەكوۆتىڭ تۋعان جەرى. بەردىبەك ساپارباەۆ باتىردىڭ اۋىلىنا دا اتباسىن بۇرىپ, بلوك-بەكەتتىڭ جايىمەن جانە جالپى اۋىلدىڭ احۋالىمەن تانىستى. ءبىر كەزدەرى بىرلىك اۋىلى اۋداننىڭ ورتالىعى بولعان. سول كەزدەن قالعان اۋىلداعى ۇلكەن اۋرۋحانا بۇگىندە دارىگەرلىك امبۋلاتورياعا اينالعان. مۇندا بۇگىندە جالپى سانى 20 ادام ەڭبەك ەتەدى. ونىڭ ىشىندە 2 دارىگەر, 16 ەكىنشى بۋىن مەديتسينا قىزمەتكەرى بار. بۇل نىساندار كورشىلەس حانتاۋ, بينازار, ايدارلى سىندى ءۇش ەلدى مەكەننىڭ تۇرعىندارىنا دا قىزمەت كورسەتەدى. اتالعان ەمدەۋ مەكەمەسىنىڭ ءبىر كورپۋسى جوندەۋدى تالاپ ەتەدى. ال, بەردىبەك ساپارباەۆ بۇل ماسەلەنى شەشۋ ءۇشىن, كوممۋنالدىق شىعىنداردى ازايتۋ ءۇشىن امبۋلاتوريانىڭ ءبىر بولىگىن باسقا ماقساتقا پايدالانۋ كەرەكتىگىن, جەرگىلىكتى حالىقتىڭ قاجەتتىلىگىن ەسكەرىپ, مۇندا قانداي مەكەمەنى ورنالاستىرۋعا بولاتىنىن اۋدان اكىمى جان-جاقتى ويلاستىرۋى كەرەكتىگىن جەتكىزدى. اۋدانداعى مۇنان وزگە دە ماسەلەلەر سارالاندى. كەيبىر الەۋمەتتىك ماسەلەلەردى شەشۋدىڭ جولدارى دا قاراستىرىلدى.
جامبىل وبلىسى
