وسى ورايدا جەتىساي اۋدانىنان 250 تونناعا جۋىق قىرىققابات تيەلگەن 10 جۇك كولىگى جولعا شىقتى. بۇل ورامجاپىراقتار "دەگدار" قايىرىمدىلىق قورى ارقىلى ەلىمىزدەگى بارلىق بالالار ۇيلەرىنە جانە تۇرمىسى تومەن وتباسىلارعا تەگىن تاراتىلادى. بۇدان بولەك, جەتىساي اۋدانىنىڭ 300 توننا ورامجاپىراق تيەلگەن جۇك كولىكتەرى الماتى قالاسى اكىمدىگىمەن كەلىسىم نەگىزىندە الماتى قالاسىنداعى بازارلارعا جونەلتىلدى. «بۇگىنگى تاڭعا دەيىن اۋدان بويىنشا 705 گەكتار جەردەن جالپى كولەمى 20 مىڭ توننا ورامجاپىراق جينالدى. ناقتىراق ايتساق, جەتىسايلىق 367 شارۋا قىرىققابات داقىلىن ەكسە, سونىڭ 246-سى قازىرگى تاڭعا ءونىمىن جيناپ ۇلگەرگەن. بىردە - ءبىر قىرىققابات جەردە قالىپ جاتقان جوق. ىندەتكە بايلانىستى قيىندىقتار تۋىنداعانىمەن ديقاندار ءوز ونىمدەرىن ساۋدالاپ ۇلگەرۋدە. شارۋالاردىڭ ەڭبەگى ەش كەتپەۋى ءۇشىن وزگە وبلىس ورتالىقتارىنىڭ باسشىلارىمەن توقتاۋسىز كەلىسسوزدەر جۇرگىزىپ جاتىرمىز», دەيدى اۋدان اكىمى جامانتاي بەيسەنباەۆ.
جالپى بيىل جەتىساي اۋدانىندا 78 مىڭ گەكتار القاپتىڭ 1180 گەكتارىنا ەرتە كوكتەمگى قىرىققابات ەگىلگەن بولاتىن.
تۇركىستان وبلىسى
