2018 جىلى «رۋح» حالىقارالىق ادەبي بايقاۋىندا روماندار اراسىنان «جىلقى اتىلعان جاز» شىعارماسى 1-ورىنعا يە بولعان ىرىسبەك دابەي مەن ورالدىق وقىرماندار اراسىنداعى جەلىدەگى جۇزدەسۋ وتە قىزۋ ءوتتى. جاستار جازۋشىنىڭ شىعارمالارىن وقىپ, كەزدەسۋگە تىڭعىلىقتى دايىندالىپ كەلىپتى. اۆتورعا شىعارمالارى بويىنشا كوكەيدەگى سۇراقتارىن دا جولداپ, ەركىن پىكىر الماستى. ماگيسترانتتار شىعارما مازمۇنىن تالداۋمەن شەكتەلمەي, قازاق ادەبيەتتانۋىنداعى جاڭا باعىتتار توڭىرەگىندە سول شىعارمالاردان مىسال كەلتىرە, پىكىر ءبولىسىپ وتىردى.
«قازىرگى جاستار پروزاسىنداعى زاماناۋي كوركەم پروزاداعى نارراتيۆ: جاس قالامگەر ىرىسبەك دابەي شىعارمالارىنداعى جاڭاشىلدىق» دەگەن تاقىرىپپەن وتكەن كەزدەسۋدە ماحامبەت ۋنيۆەرسيتەتىنىڭ قاۋىمداستىرىلعان پروفەسسورى ريتا سۇلتانعاليەۆا قالامگەردىڭ دەرەكتى پروزا جانرىنداعى ىزدەنىستەرى, جازۋشىلىق شەبەرلىگى, كوركەم پروزاداعى ديسكۋرس تاقىرىبى, جازۋشى تۋىندىلارىنداعى ەپيكالىق راكۋرس, پوستمودەرنيستىك سيپاتتا سۋرەتتەلگەن ۋاقىت پەن مەكەنشىق, حرونوتوپ ماسەلەلەرى اياسىندا تەوريالىق تالداۋ جاسادى.
ونلاين-جۇزدەسۋگە قاتىسقان كەيبىر ماگيسترانت تا جازۋشى شىعارماشىلىعى تۋرالى ويلارىن ورتاعا سالدى.
- جاستار قازىر موتيۆاتسيالىق, پسيحولوگيالىق ەڭبەكتەرگە ءۇيىر. بىراق كوركەم شىعارمادان دا تالاي پايدالى نارسە الۋعا بولادى. ماسەلەن, «قوڭىز» رومانى جازۋشىنىڭ وزگە شىعارمالارىنا قاراعاندا استارلى, تەرەڭ تولعانىستان ءوتىپ جازىلعان دۇنيە. شىندىق. قاتىگەزدىك. الاياقتىق. استامشىلىق. قوعامداعى اششى تىرلىك. ادامداردىڭ تاعدىرى. بۇل ۇعىمدار وتە اۋقىمدى ماسەلە. روماندى «قوڭىز» دەپ اتاۋدىڭ ءوزى تاقىرىپ پەن يدەيانى اشا تۇسەدى. ارينە بۇل ءار قىرىنان ءالى تالاي جازىلار. بىراق العاشقىنىڭ ورنى بولەك قوي, - دەيدى 2-كۋرس ماگيسترانتى ايگۇل تاڭاتاروۆا.
ال 1-كۋرستاعى ماگيترانت مارجان شاپاەۆاعا «اكەلەرىمىز ايتاتىن اڭگىمە» ۇناپتى. «بالا بويىنداعى جاقسى-جامان قاسيەتتەرىن بايقاسا, قازاق ونى ەڭ ءبىرىنشى اكە مەن اتا تاربيەسىنەن كورەدى, تەگىنە تارتقان دەيدى عوي. ىرىسبەك دابەيدىڭ «اكەلەرىمىز ايتاتىن اڭگىمە» اتتى شىعارماسى كىشىلىك پەن كىسىلىك كەلبەت تۋرالى وي تاستايدى. ماعان وتە ۇنادى» دەيدى. ودان بولەك, ساندۋعاش ساعيدۋلليەۆا, ءلايلى ماقسوتوۆا, بوتاگوز ەربولەكوۆا, نازەركە ەسەنتەمىر, اياجان جاردەموۆا, نازىك ماحامبەتوۆا سىندى ماگيسترانتتار دا قالامگەردىڭ «جىلقى اتىلعان جاز», «قۇلاعىڭىزعا سىبىرلايىنشى...», «سورعا بىتكەن باق», «ماعان وكپەلەڭىزشى», «ۇڭگىردەگى ۇرەي», «قۇرال قونعان قىس», «تاۋ باسىنداعى قاردىڭ ءدəمى», «سۇيەگىم جاسيدى» شىعارمالارى تۋرالى وي-پىكىرىن ورتاعا سالىپ, قازاق ادەبيەتىن ماعىنالى-ءماندى تۋىندىلارىمەن بايىتقان جاس جازۋشىعا شالقار شابىت تابىس تىلەدى. وقىرمان مەن اۆتور اراسىندا وتكەن بۇل كەزدەسۋ ەكى تاراپقا دا وتە پايدالى بولدى.
باتىس قازاقستان
