«1 مامىر كۇنى تۇسكى ساعات 14.15.-شاماسىندا وبلىستىق ينفەكتسيالىق اۋرۋحانانىڭ 30 شاقتى پاتسيەنتى اۋرۋحانا اۋلاسىنا شىعىپ, وزدەرىن بوساتۋدى, ۇيگە جىبەرۋدى تالاپ ەتتى. ولاردىڭ بارىنە دە «سovid-19» دياگنوزى قويىلعان, بىراق ناۋقاستار تۇلابويىندا ەشقانداي اۋرۋى جوقتىعىن ايتىپ, ءوز بەتىمەن مەديتسينالىق مەكەمە اۋماعىنان كەتپەك بولعان. دارىگەرلەردىڭ تالابىنا قۇلاق قويماعان. وقيعا ورنىنا پوليتسيا جاساعى باردى. باتىس قازاقستان وبلىستىق پوليتسيا دەپارتامەنتى جەرگىلىكتى پوليتسيا باسقارماسى قىزمەتكەرلەرىنىڭ ءتۇسىندىرۋ جۇمىستارىنان كەيىن ولار ساعات 14.45.-تە پالاتالارىنا تارادى. قوعامدىق ءتارتىپ بۇزىلعان جوق» - دەگەن مالىمدەمە تاراتتى پوليتسيانىڭ ءباسپاسوز قىزمەتى.
ورال قالاسىنداعى جۇقپالى اۋرۋلار اۋرۋحاناسىنا باراتىن جولدارعا توسقاۋىل قويعان پوليتسيا قىزمەتكەرلەرى جۋرناليستەردى وقيعا ورنىنا جىبەرمەدى. ويتكەنى, ەرەۋىلشىلەرمەن كەزدەسكەن ءتىلشىنىڭ ءوزى كوروناۆيرۋس جۇقتىرعان ناۋقاسپەن قارىم-قاتىناستا بولعانى ءۇشىن كارانتينگە جاتقىزىلۋى ءتيىس بولادى.
بىزگە ءمالىم بولعانداي, كەيبىر ناۋقاستاردىڭ اۋرۋحانادا جاتقانىنا 14 كۇن بولعان, بىراق ولار مەديتسينالىق مەكەمەنىڭ ىشكى ءتارتىبىن بۇزىپ, اۋرۋحانا ىشىندەگى وزگە ناۋقاستارمەن قارىم-قاتىناستا بولعان. سوندىقتان ولاردىڭ وقشاۋلانۋ, ەمدەلۋ مەرزىمى دە قايتا ۇزارتىلعان.
سوڭعى مالىمەت بويىنشا باتىس قازاقستان وبلىسىندا 152 ادامعا «سovid-19» دياگنوزى قويىلعان.
باتىس قازاقستان
