الماتىداعى بۇل دوستىق ءۇيى ەرەكشە مارتەبەگە يە جانە «كوعامدىق كەلىسىم» رمۋ قۇرىلىمدىق بولىمشەسى رەتىندە 34 ەتنومادەني بىرلەستىكتىڭ باسىن قوسىپ وتىر. ءتورت جىلعا جۋىقتاعان قىسقا مەرزىم ارالىعىندا شەت تىلدەر كافەدراسى مەن قازاقستان حالقى اسسامبلەياسى قازاقستان تاريحى جانە الەۋمەتتىك عىلىمدار كافەدراسىمەن بىرلەسە وتىرىپ, ونەر اكادەمياسىنىڭ, قازاقستان ۋنيۆەرسيتەتتەرىنىڭ جانە كورشى ەلدەردەگى عالىمداردىڭ, وقىتۋشىلاردىڭ, ماگيسترانتتاردىڭ قاتىسۋىمەن دوڭگەلەك ۇستەلدەر, سەمينارلار, كونفەرەنتسيالار, كىتاپ تۇساۋكەسەرلەرىن وتكىزدى. كەي پلەنارلىق وتىرىستار ەتنومادەني بىرلەستىك مۇشەلەرىنىڭ قاتىسۋىمەن دوستىق ءۇيىنىڭ الاڭىندا ۇيىمداستىرىلدى.
ماگيسترانتتاردىڭ, ستۋدەنتتەردىڭ قاتىسۋىمەن وتكىزىلەتىن وسى جانە وزگە دە ءبىلىم بەرۋ ءىس-شارالارى قازاقستاندىق پاتريوتيزم مەن ۇلتارالىق كەلىسىمدى نىعايتۋعا باعىتتالدى. اكادەميادا ماگيسترانتتارمەن قاتار, الىس جانە جاقىن شەتەلدەردىڭ ستۋدەنتتەرى ءتالىم الادى. سوندىقتان مۇنداي ءىس-شارالار بىرلىك پەن ۇلتارالىق كەلىسىمدى نىعايتۋ جولىنداعى قاجەتتى الاڭ سانالادى.
ونەر اكادەمياسىندا شەت تىلدەر كافەدراسى مەن قازاقستان حالقى اسسامبلەياسى كافەدراسىنىڭ جۇمىس ىستەۋى – دوستىق ۇيىمەن قارىم-قاتىناستى جانداندىرۋعا, ورتاق جۇمىس جۇرگىزۋگە ۇلكەن قادام بولدى. دوستىق ءۇيى وتكىزەتىن ءتۇرلى فەستيۆالدەر, تاقىرىپتىق كەشتەر, حالىقتىق سالت-داستۇرلەر مەرەكەسى مەن ەتنومادەني بىرلەستىكتەردىڭ مەرەيتويلىق داتالارى, تاۋەلسىز قازاقستاننىڭ دامۋى مەن قالىپتاسۋىنا ۇلەس قوسقان تانىمال شىعارماشىلىق جانە تاريحي قايراتكەرلەرمەن كەزدەسۋلەر, مەملەكەت باسشىسىنىڭ قازاقستان حالقىنا جولداۋلارى مەن ماقالالارى, عالىمداردىڭ عىلىمي ەڭبەكتەرى اكادەميانىڭ سەرىكتەسى رەتىندە بىرلەسكەن سايتتا جارىق كورىپ وتىرادى.
دوستىق ۇيىمەن بىرلەسكەن جۇمىسىمىز – ەتنومادەني بىرلەستىكتەرمەن جۇمىس جاساۋدىڭ ناقتى فورماسى سانالادى. بۇل قازاقستاندىق بىرتۇتاستىقتى, ۇلتتىق بىرلىكتى, الەۋمەتتىك جانە ەتنوسارالىق كەلىسىمدى نىعايتۋعا, قازاقستاندىق ءپاتريوتيزمدى ناسيحاتتاۋعا باعىتتالعان. كوپتەگەن ءىس-شارالاردا ءبىزدىڭ اكادەميا دوستىق ءۇيىنىڭ سەرىكتەسى رەتىندە كونتسەرتتەر, تەاترلاندىرىلعان مۋزىكالىق قويىلىمدار, حورەوگرافيالىق قويىلىمدار ازىرلەيدى. ولاردىڭ كوپشىلىگى قازاقتىڭ, قازاقستاندا تۇرىپ جاتقان وزگە دە ەتنوستاردىڭ ادەت-عۇرپىن, تولەرانتتىلىق پەن ۇلتتىق بىرلىك يدەياسىن ناسيحاتتاۋعا نەگىزدەلگەن. قازاقستان حالقى اسسامبلەياسىنىڭ «بىرلىكتەگى الۋان تۇرلىلىك» ۇرانى – ءبىزدىڭ بىرلەسكەن شىعارماشىلىق جۇمىسىمىزدى سيپاتتايدى.
ونەر اكادەمياسى دوستىق ۇيىمەن بىرلەسە وتىرىپ, اكادەميانىڭ شاكىرتتەرى ازىرلەگەن جانە باسىپ شىعارعان عىلىمي جانە عىلىمي-ادىستەمەلىك ادەبيەتتەردىڭ تۇساۋكەسەرلەرىن وتكىزەدى. ولاردىڭ قاتارىندا «قازاقستان رۋحانياتىنىڭ مادەني ەسكەرتكىشتەرىنىڭ ەنتسيكلوپەديالارى» مونوگرافياسى مەن «ناۋرىز مەيرامى: كوكتەمنىڭ, بىرلىكتىڭ, كەشىرىمدىلىك پەن مەيىرىمدىلىكتىڭ مەيرامى» كىتابى بار. بۇل كىتاپتار قازاقستان حالقى اسسامبلەياسىنىڭ دەپوزيتاريىنە قوسىلدى.
اكادەميا قازاقستان حالقىنىڭ مۇراسىن ساقتاۋعا جانە دامىتۋعا ەرەكشە كوڭىل بولەدى. ماسەلەن, ۇلتتىق كۇنتىزبەلىك جانە سالت-داستۇرلەرگە نەگىزدەلگەن «ناۋرىز», «ماسلەنيتسا» مەيرامدارى بار. مۇنداي مەرەكەلەر ەتنوس وكىلدەرىن جاقىنداستىرىپ, ولاردىڭ ءومىرى مەن شىعارماشىلىعىن تانۋعا مۇمكىندىك بەرەدى.
ونەر اكادەمياسى وسىنداي ءىس-شارالارعا, دوستىق ءۇيىنىڭ قىزمەتكەرلەرى ۇيىمداستىرعان وزگە دە قالالىق جانە رەسپۋبليكالىق شارالارعا بەلسەندى قاتىسادى. ونەر اكادەمياسىنىڭ سايتىندا دوستىق ۇيىمەن بىرلەسىپ وتكىزىلەتىن ءىس-شارالاردى جاريالايمىز. ولاردىڭ قاتارىندا كونتسەرتتەر, شاعىن تەاترلاندىرىلعان قويىلىمدار, حورەوگرافيالىق قويىلىمدار, دوڭگەلەك ۇستەلدەر, رەسپۋبليكالىق جانە حالىقارالىق كونفەرەنتسيالار بار. قاتىسۋشىلار سانى جىل سايىن ارتىپ كەلەدى. سايكەسىنشە ءبىز جۇزەگە اسىرىپ جاتقان جوبالار شەتەلدىك سەرىكتەستەردى دە قىزىقتىرۋدا.
ماسەلەن, «كوپ مادەنيەتتى الەمدەگى بالالار مەن كىتاپتار» اتتى حالىقارالىق كونفەرەنتسيا جۇمىسىنا شەتەلدىك ارىپتەستەرىمىز, 9 ەلدىڭ, سونداي-اق ەلىمىزدەگى ءتۇرلى قالالاردىڭ وكىلدەرى قاتىستى. دوستىق ءۇيىنىڭ قولدا بار تەحنيكالىق بازاسى كونفەرەنتسيا جۇمىسىنىڭ كۇندىزگى ءبولىمىن وتكىزۋگە جانە وزگە ەلدەر مەن قالالاردىڭ قۇتتىقتاۋلارىن تىڭداۋعا مۇمكىندىك بەردى.
وسىلايشا ونەر اكادەمياسى مەن دوستىق ءۇيىنىڭ بىرلەسە اتقارىپ كەلە جاتقان اۋقىمدى جۇمىسى ەلىمىزدەگى بەيبىتشىلىك پەن كەلىسىمدى نىعايتۋ جولىنداعى بىرەگەي باعدار دەۋگە بولادى. ياعني ەكى ۇيىمنىڭ اراسىنداعى ىنتىماقتاستىق مۇمكىندىگى – بۇل جاستارعا ەتنومادەني بىرلەستىكتەردىڭ قىزمەتىمەن تانىسۋ مۇمكىندىگى دەپ باعالاعان ابزال.
مەڭدىعانىم شايمەردەنوۆا,
الماتى قالاسى قازاقستان حالقى اسسامبلەياسى عىلىمي-ساراپتامالىق توبىنىڭ مۇشەسى,
ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورى
