كارانتين تۋرالى: قازىرگى تاڭدا ۆەلوسپورتشىلاردى تاسجولعا جىبەرمەيدى. ويتكەنى كارانتين كەزىندە ۇيدەن شىقپاۋ قاجەت. ەۋروپا ەلدەرى جابىق, سوندىقتان ءبارى دە ۇيدە جاتتىعۋدا. دەگەنمەن مۇنى جاتتىعۋ دەپ ايتۋ قيىن, فورماسىن ساقتاۋدا دەسەك دۇرىس بولاتىن شىعار. بارلىعى مامىر ايىن كۇتۋدە. ولاردىڭ قاتارىندا ءبىز دە بارمىز. ءبىزدىڭ سپورتشىلارعا جولدا دايىندالۋ ءۇشىن مۇمكىندىك بەرىپ قالار. بۇل ۇلكەن دەمەۋ بولار ەدى.
وليمپيادانىڭ كەلەر جىلعا اۋىسۋى: حوك پەن ۇيىمداستىرۋ كوميتەتى دۇرىس شەشىم قابىلدادى. قازىر ۆەلوشاباندوزدار ءارتۇرلى جاعدايدا جاتتىعۋدا. بەلگيا, اۋستريا سىندى ەلدەردە جولدا دايىندالۋعا رۇقسات بار, ال كوپشىلىگىندە مۇنداي مۇمكىندىك جوق. ال كەيبىرەۋلەرى بازادا وقشاۋلاۋ رەجىمىندە جاتىر دەپ ەستيمىن. سوندىقتان, وليمپيادانىڭ اۋىستىرىلعانى ەڭ جاقسى شەشىم بولدى. وليمپياداعا العان جولداما كۇشىن جويمايدى, ساقتالادى. ءبىزدىڭ كوماندانىڭ ۇزدىگى – الەكسەي لۋتسەنكو. وعان كومەكشىلەردى تاڭدايتىن بولامىز. بۇل جۇمىستى كەلەسى جىلعا قالدىرىپ وتىرمىز.
كوماندا قۇرامى تۋرالى: كوماندانى جىل باسىندا جاساقتادىق. ءاربىر ۆەلوشاباندوز قاي جارىسقا قاتىساتىنىن ءبىلدى, سوعان وراي دايىندالدى. قازىر جارىس وتەتىن مەرزىم ءسات سايىن اۋىسىپ جاتىر. مامىر ايىندا وتەتىن «دجيرو» قازانعا قالدى. كوماندانىڭ نەگىزگى سپورتشىلارى قاتاردا, ءالى ويلانامىز. وسى ماۋسىمدا لوپەستى بايقاعىمىز كەپ تۇر. ال «تۋر دە فرانس» بيىل قيىنداۋ. نيتستسادا باستالعان سوڭ بىردەن تاۋلى كەزەڭدەر باستالىپ كەتەدى. جارىس كەزىندە بىرتىندەپ كۇش الۋ ءۇشىن ۋاقىت بەرىلمەيدى. سول فۋلسانگ پەن لۋتسەنكونىڭ كۇشىنە سەنەمىز.
قازاقستانداعى ۆەلوسپورتتىڭ دامۋى: بىزدە جاقسى بالالار بار. ءبىر كوماندادا توعىز-ون سپورتشى كوزگە تۇسەدى. سونداي-اق جاستار دا قاتارعا قوسىلۋدا. بىزگە بيىلدان باستاپ پرونسكي قوسىلدى. جاس ءارى امبيتسياسى مىقتى جىگىت. ول قۇرلىقتىق كوماندادا جۇرگەندە باقىلاپ, بىلتىردان بەرى نازاردا ۇستادىق. جاس سپورتشىلار كاسىبيلەر اراسىندا بەيىمدەلۋ ءۇشىن ولارعا ۋاقىت بەرىپ, ءبىراز شىڭداۋ قاجەت. بىزدە العا ىلگەرىلەۋ بار. بىراق ماسەلە دە جوق ەمەس. قۇرلىقتىق كوماندالاردىڭ كوپ بولعانىن, سپورتشىلاردا تاڭداۋ مۇمكىندىگى بولعانىن قالايمىز.
وليمپيادا التىنى تۋرالى: مەنى توپ جارادى دەپ ەشكىم كۇتكەن جوق, بىراق مەن كۇرەسكە دايىن بولدىم. ساراپتاپ قارايتىن بولساق, جەڭىسكە جەتەتىن مۇمكىندىك از ەدى. ءار ەلدەن بەس سپورتشىدان سىنعا ءتۇستى, ال ءبىز اسان بازاەۆ ەكەۋمىز عانا باردىق. مارەگە بەس شاقىرىم قالعاندا ۋران ەكەۋمىزدىڭ التىنعا تالاساتىنىمىز انىقتالدى. قۋىپ كەلە جاتقان نەگىزگى توپتان الشاقتاۋ ءۇشىن بار كۇشىڭدى سالاسىڭ, سونداعى ارتىق ۋاقىتتى ۇنەمدەپ, ءبىر شاقىرىم ءۇشىن جانتالاسقاندا بارلىعىن سالقىنقاندى ويلاستىرۋ قاجەت. سوندىقتان توكيودا توپ جارۋ الەكسەيدىڭ قولىنان كەلەدى دەپ سەنەمىن. سپورتشىلار تاۋداعى كەزەڭنىڭ كوپتىگىنە بايلانىستى توكيو ويىندارى قيىن بولادى دەپ بولجاۋدا. ال لۋتسەنكو تاۋدا جاقسى جۇرەدى.
جازىپ العان
ءالي بيتورە,
«Egemen Qazaqstan»
