– جەتەكشى-جاتتىقتىرۋشىم بولعان جوق, مەنى العا قۇلشىندىرعان سپورتقا, اسىرەسە وسى سپورت تۇرىنە دەگەن قىزىعۋشىلىعىم بولدى. ونىڭ ۇستىنە بەلتەمىرگە تارتىلۋ بارىنشا قولجەتىمدى ەدى, ءاربىر ءۇيدىڭ اۋلاسىنداعى ويىن الاڭدارىنان بەلتەمىردى تابۋعا بولادى. مەن تىنباي جاتتىقتىم, ۇنەمى العا ۇمتىلا بەردىم, ناتيجەلى كورسەتكىشكە قول جەتكىزۋگە تىرىستىم, – دەيدى يلدار سەيىتنازار ۇلى.
اۋلاداعى الاڭدا يلدار ءاربىر كۇنى وزىمەن ءوزى قارسىلاس, وزىمەن ءوزى باسەكەلەس بولدى دەگەن ءسوز. بۇگىنگى كورسەتكىشىن ەرتەڭ باسىپ وزۋعا ۇمتىلۋ – جاقسى ءادىس جانە ماقتانارلىق جەتىستىكتەرگە جەتكىزدى. بۇگىندە يلدار – Street workout بويىنشا تارتىلۋدان قازاقستان رەسپۋبليكاسىنىڭ چەمپيونى, SW بويىنشا ەل چەمپيونى (جاڭا رەكورد), Street workout-تىڭ ءتورت تۇرىنەن رەسەي فەدەراتسياسى چەمپيونى, قازاقستان Street Workout فەدەراتسياسىنىڭ مۇشەسى.
2013 جىلى Aktau Open Fest فەستيۆالىندە يلدار «Freestyle: كۇردەلى ەلەمەنتتەر» اتالىمىندا ءۇشىنشى ورىن العان, «ەكى قولمەن كوتەرىلۋ» كۇشتەمەلى جاتتىعۋلارى مەن بەلىنە 32 كيلوگرامم قوسىمشا جۇك بايلاپ تارتىلۋدان چەمپيون بولدى. سول جىلى يلدار قازاقستاننىڭ العاشقى چەمپيوناتىندا street workout بويىنشا ەل رەكوردىن ورناتتى. ول «بەلتەمىرگە بەلىنە قوسىمشا 32 كيلوگرامم جۇك بايلاپ تارتىلۋدان» 15 رەت تارتىلىپ, جەڭىمپاز اتاندى. ءوزى قىزىققان اتالعان سپورت تۇرىندەگى جەتىستىكتەرى جالعاسا بەردى – 2014 جىلدىڭ جەلتوقسانىندا قازاقستان قۇراماسى قۇرامىندا street workout بويىنشا الەم چەمپيوناتىنا قاتىسسا, 2016 جىلدىڭ قىركۇيەگىندە Aktau Open Fest فەستيۆالىندە بەلتەمىرگە تارتىلۋدا ءوزىنىڭ 2015 جىلعى رەكوردىن جاڭارتتى. ول بەلىنە 32 كيلوگرامم جۇك بايلاپ 17 رەت تارتىلدى. اراعا ەكى جىل سالىپ, 2017 جىلدىڭ تامىزىندا ول ەل چەمپيوناتىندا street workout-تان جاڭا رەكتورد ورناتتى.
تىنىمسىز جاتتىعۋلار جولدا قالدىرعان جوق, 2018 جىلدىڭ كوكتەمىندە يلدار ستريتليفتينگ بويىنشا رەسەيدىڭ اشىق كۋبوگىندا ءتورت جۇلدەلى ورىنعا يە بولىپ ستريتليفتينگتەن حالىقارالىق دارەجەدەگى سپورت شەبەرى اتاعىن الدى. سول جىلى ول بۇكىل قازاقستان بويىنشا وتكەن Challenge Street Workout-قا قاتىسىپ, تۋعان قالاسىنا سپورت الاڭىن جەڭىپ الدى. 2018 جىلدىڭ تامىزىندا يلدار ياگياەۆ بۇكىلالەمدىك ستريت ۆوركاۋت جانە ستريتليفتينگ پرەزيدەنتى دەنيس ءمينيننىڭ باسشىلىعىمەن وتكەن حالىقارالىق «Workout Fest-2018» سپورت فەستيۆالىندە ستريتليفتينگتەن تاڭعالارلىق ناتيجە كورسەتىپ, ياعني بەلتەمىرگە 90 كيلوگرامم قوسىمشا سالماقپەن تارتىلىپ, قوسسىرىقتا 120 كگ قوسىمشا سالماقپەن كەۋدەسىن كوتەرۋ ارقىلى ەكى دۇركىن الەم چەمپيونى بولدى. دودالاردا توپ جارىپ جۇرگەن جالىندى جاس جىگىتتىڭ ەسىمى سول جىلى ەلىمىزدىڭ «100 جاڭا ەسىم» جۇيرىكتەرى قاتارىندا اتالىپ, قۋانىشىن ەسەلەي ءتۇستى. جەڭىمپاز بولعاندىعىن ەلوردادان ارنايى تەلەفون ارقىلى حابارلاعاندا تاڭدانىسىن جاسىرا الماعان. بۇل جاڭالىق وعان ۇلكەن اسەر بەرىپ, ودان ءارى قاناتتاندىرا تۇسكەن جانە توقتاپ قالماي تەك العا ۇمتىلا بەرۋ قاجەتتىگىن ۇعىندىرعان.
ارنايى قۇرالدارمەن جابدىقتالعان سپورت كەشەندەرىندە جاتتىقپاي-اق, كوشە سپورتىنان زور جەتىستىكتەرگە قول جەتكىزگەن يلداردىڭ ءومىرى كوپكە, اسىرەسە جاستارعا ۇلگى.
– جاستارعا ماقساتقا جەتۋ ءۇشىن تىنىمسىز ەڭبەكتەنىپ, ناتيجەگە قول جەتكىزۋ ءۇشىن تالپىنۋ قاجەت دەر ەدىم. ماقسات پەن جىگەر بولسا جاس جىگىت كەز كەلگەن ارمانىنا قول جەتكىزەدى دەر ەدىم, دەيدى جۋىردا اكە اتانۋدا ءۇمىتتى يلدار ياگياەۆ.
بارىنشا قولجەتىمدى سپورت ءتۇرىن جاستارعا ناسيحاتتاعان يلدار سالاۋاتتى ءومىر سالتىن ۇستانۋدىڭ دەنساۋلىققا قانشالىقتى قاجەتتى ەكەندىگىن ەسكە سالدى.
ماڭعىستاۋ وبلىسى
