مەملەكەت باسشىسى قاسىم-جومارت توقاەۆتىڭ بيىل 31 ناۋرىزدا جاساعان مالىمدەمەسىندە كاسىپكەرلىك سەكتوردى قولداۋعا باعىتتالعان بىرقاتار مىندەت بەلگىلەنگەن بولاتىن. پرەزيدەنت سالىقتىق جەڭىلدىكتەر, نەسيەلەر بويىنشا تولەمدەردى كەيىنگە شەگەرۋ, تەكسەرۋلەرگە تىيىم سالۋ ماسەلەلەرىمەن قاتار, كەڭ جانە ساپالى جۇمىسپەن قامتۋ, اگروونەركاسىپتىك كەشەندى ۇزدىكسىز قامتاماسىز ەتۋ, شاعىن جانە ورتا بيزنەستى نەسيەلەۋدى ارتتىرۋ قاجەتتىلىگىن ەرەكشە اتاپ ءوتتى.
وسى ورايدا اۋىل شارۋاشىلىعىن قارجىلاي قولداۋ قورى جەتى جىلدان بەرى شاعىن كاسىپكەرلىكتى قولداۋعا باعىتتالعان بىرقاتار مەملەكەتتىك باعدارلامانىڭ قارجىلىق وپەراتورى رەتىندە جۇمىس ىستەپ كەلە جاتقانىن ايتا كەتۋ كەرەك. كومپانيا 2017 جىلدان بەرى 2017-2021 جىلدارعا ارنالعان «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسىنىڭ ەكىنشى باعىتىن ىسكە اسىرۋدا. كومپانيانىڭ ءباسپاسوز قىزمەتىنىڭ حابارلاۋىنشا, وسى ارالىقتا ءتۇرلى باعدارلاما اياسىندا قور جالپى سوماسى 160 ملرد تەڭگە بولاتىن 53 مىڭنان استام شاعىن نەسيە بەرگەن. ناتيجەسىندە 53 مىڭنان استام اۋىل تۇرعىنى جۇمىسپەن قامتىلدى.
قور ءوزىنىڭ نەسيە ونىمدەرى ارقىلى اۋىل تۇرعىندارى مەن اۋىل شارۋاشىلىعى تاۋارىن وندىرۋشىلەردىڭ جوبالارىن ءتۇرلى ماقساتتى باعىتتار بويىنشا قارجىلاندىرىپ كەلەدى. ناقتى ايتار بولساق, مال شارۋاشىلىعىن, وسىمدىك شارۋاشىلىعىن, اۋىل كاسىپكەرلىگىن دامىتۋ جانە اۋىل شارۋاشىلىعى ونىمدەرىن قايتا وڭدەۋ مەن ساقتاۋ جوبالارى بار.
ناتيجەلى جۇمىسپەن قامتۋ باعدارلاماسى بويىنشا ءتۇرلى ماقساتتاعى نەسيەنىڭ جىلدىق سىياقى مولشەرى 6%-دى قۇرايدى. سونداي-اق ءتيىمدى جىلدىق سىياقى مولشەرى 6,7%-دان اسپايدى. نەسيەنىڭ سوماسى, جەڭىلدىك مەرزىمى نەسيە ونىمىنە بايلانىستى ءارتۇرلى بولادى. سونداي-اق قوردىڭ نەسيەلەۋ شارتىندا اگراريلەر قىزمەتىنىڭ ەرەكشەلىگى, ونىڭ ىشىندە اۋىل شارۋاشىلىعى جۇمىستارىنىڭ ماۋسىمدىلىعى مەن تسيكلدىلىگى ەسكەرىلگەن.
– باعدارلاماعا اۋىل شارۋاشىلىعىمەن جانە اۋىل شارۋاشىلىعىنا جاتپايتىن كاسىپ تۇرلەرىمەن اينالىسقىسى كەلەتىندەر جانە كاسىبىن كەڭەيتۋدى جوسپارلاعان ازاماتتار قاتىسا الادى. نەسيە الۋشىلارعا قويىلاتىن بىرقاتار تالاپ بار. اتاپ ايتقاندا, كاسىبىن ەندى باستايتىن ازاماتتىڭ كاسىپكەرلىك نەگىزدەرىن وقىعانى تۋرالى سەرتيفيكاتى بولۋى ءتيىس. نەسيە تاريحى جاقسى بولعانى ابزال. كەپىلگە قوياتىن مۇلكى بولۋى شارت. بۇدان بولەك, بيۋدجەتتىك جانە قارجى ۇيىمدارىنىڭ الدىندا مەرزىمى وتكەن بەرەشەگى بولماۋى كەرەك, – دەپ حابارلادى كومپانيانىڭ ءباسپاسوز قىزمەتى.
اۋىل شارۋاشىلىعىن قارجىلاي قولداۋ قورىنىڭ سولتۇستىك قازاقستان وبلىسىنداعى فيليالىنان نەسيە العان كاسىپكەرلەردىڭ 60%-ى بىرنەشە رەت جەڭىلدەتىلگەن نەسيە راسىمدەگەندەر. سولاردىڭ ءبىرى – «تامىر» شارۋا قوجالىعىنىڭ باسشىسى جانعالي ىسقاقوۆ. ايىرتاۋ اۋدانىندا تۇراتىن ول مال جانە وسىمدىك شارۋاشىلىعىمەن اينالىسادى. قوجالىق باسشىسى 2011 جىلدان بەرى قورمەن ىنتىماقتاسا جۇمىس ىستەپ كەلەدى. «ەڭبەك» باعدارلاماسىنا قاتىسقان فەرمەر اۋىل شارۋاشىلىق تەحنيكاسىن الۋعا, ەگىن ەگۋگە, مال باسىن كوبەيتۋگە نەسيە العان. بىلتىر جىل سوڭىندا اۋىل شارۋاشىلىعى تەحنيكالارىن جاڭادان ساتىپ الۋ ءۇشىن تاعى نەسيە راسىمدەدى. ول قازىرگى ۋاقىتتا كوكتەمگى ەگىس ناۋقانىنا دايىندالىپ جاتىر. مالدارىن دا تولدەتىپ, قىزۋ قاربالاس جۇمىستار اتقارۋدا.
ال تۇركىستان قالاسىنىڭ تۇرعىنى مۇحتار ساپاراليەۆ «بيزنەس-كەڭەسشى» كۋرسىن اياقتاعان سوڭ ءوزىنىڭ بيزنەس-جوسپارىن ىسكە اسىرۋعا كىرىستى. ونىڭ بيزنەس يدەياسى – قۇرىلىس سالاسىندا قىزمەت كورسەتۋ. مۇحتار كاسىبىن باستاۋ ءۇشىن بەرگەن ءوتىنىمى ماقۇلدانىپ, اۋىل شارۋاشىلىعىن قارجىلاي قولداۋ قورىنان 9 ملن تەڭگە نەسيەنى 6% مولشەرلەمەمەن الدى. نەسيە قارجىسىنا «LGZT 939» ماركالى فرونتالدى جۇك تيەگىش تەحنيكا ساتىپ الىپ, ىسكە كىرىسىپ كەتتى.
جالپى, ءوز ءىسىن باستاۋعا نيەتتى ادامدارعا, نەسيە العاننان كەيىن باسقا دا ماسەلەلەرى تۋىنداعان ادامدارعا كومپانيا قولداۋ كورسەتۋگە دايىن. بۇل ءۇشىن ءار وبلىستاعى فيليالدىڭ مەنەدجەرلەرىنە حابارلاسۋعا بولادى. كاسىپكەرلەر پالاتاسىنىڭ اۋداندىق فيليالدارى دا كەڭەس بەرۋگە ءازىر.
«اۋىل شارۋاشىلىعىن قارجىلاي قولداۋ قورى» اق – «قازاگرو» ۇلتتىق باسقارۋشى حولدينگىنىڭ قۇرامىنا كىرەتىن مامانداندىرىلعان قارجى-نەسيەلىك ۇيىم ەكەنىن ايتا كەتەيىك. قوردىڭ نەگىزگى مىندەتى – اگروونەركاسىپ كەشەنى سالاسىنداعى باسىمدىققا يە سالالار بويىنشا اۋىل كاسىپكەرلىگىن قارجىلاندىرۋ.
ەرلىك ساپابەك
