وقيعا جەتى تۇندە, حالىق ۇيىقتاپ جاتقاندا گاشەك پەن ءۋاليحانوۆ كوشەلەرىنىڭ قيىلىسىندا بولعان. جۇرگىزۋشى بالا-شاعا دا ەمەس, 36 جاستاعى اراققا سىلقيا تويىپ العان ازامات بولىپ شىقتى. «بەتپەردەڭدى شەش» دەگەن پوليتسيا قىزمەتكەرىنىڭ تالابىن دا مويىنداماي, كامەراعا بەتىن كورسەتپەي قاسارىسىپ تۇردى. وسىندايلارعا پوليتسيانىڭ كۇش قولدانباۋى مۇمكىن بە؟ وندايلار تەك كۇشتى عانا مويىندايدى ەمەس پە؟ ەگەر ولارعا قارسى كۇش قولدانباسا تۇرعىنداردىڭ قاۋىپسىزدىگى قالاي ساقتالادى؟
ەسەرسوق 15 تاۋلىككە قامالىپ, كولىك جۇرگىزۋ قۇقىنان 7 جىلعا دەيىن ايرىلدى. سوڭعى ەكى كۇندە پەتروپاۆلدا بۇدان باسقا دا ءبىر ماس ادام موتوتسيكل جۇرگىزىپ, جول ەرەجەسىن بۇزىپ بارا جاتقاندا ۇستالدى. بۇل ءتىپتى 44 جاستاعى ادام. «كارى تۇيە ويناقتاسا جۇت بولار» دەگەندەي جاستارى ەگدەلەنىپ, بالا-شاعالارى ءوسىپ قالعان وسىندايلاردىڭ جاس بالاشا ەكى اياقتى موتوتسيكلدى قىزىقتاپ, ەشتەڭە قاراماي ايداعانىنا تاڭ قالاسىڭ. ۇرپاعىنا قانداي ۇلگى بەرەمىز دەپ ويلايدى ەكەن؟
«جول قوزعالىسى ەرەجەلەرىن قاتاڭ ساقتاۋ – بارلىق كولىك قۇرالدارى جۇرگىزۋشىلەرىنىڭ قاۋىپسىزدىگىن قامتاماسىز ەتەدى. موتوتسيكل جۇرگىزۋشىلەرى ەرەكشە باقىلاۋدا», - دەپ اتاپ ءوتتى پاترۋلدىك پوليتسيا باتالونى كومانديرىنىڭ مىندەتىن اتقارۋشى قانات ءالىمجانوۆ.
