جۋالى نەگىزىنەن وڭىردەگى تابيعاتى ەڭ كۇردەلى اۋدان. بيىلعى كوكتەمدە دە تابيعات توسىن مىنەزىن تانىتتى. اۋداندىق توتەنشە جاعدايلار بولىمىنە اعىمداعى جىلعى 29 ءساۋىر كۇنى كەشكى ساعات 21:17-دە اۋداننىڭ شاقپاق اتا اۋىلى, ورازباەۆ كوشەسىندەگى №97 ءۇيدىڭ اۋلاسىن سۋ باسىپ جاتقانى تۋرالى تۇرعىن ە.سازىنبەكوۆتەن اقپارات تۇسەدى. شۇعىل اتالعان وقيعا ورنىنا وبلىستىق توتەنشە جاعدايلار دەپارتامەنتىنىڭ باسشىسى ب.دانيلوۆ, اتالعان دەپارتامەنت باسشىسىنىڭ ورىنباسارى م.قوسىباەۆ, اۋدان اكىمى ن.ەرگەبەكوۆ, اكىمنىڭ ورىنباسارى ا.جاباعى, اۋداندىق توتەنشە جاعدايلار ءبولىمىنىڭ باسشىسى ە.ءامىروۆ, اۋداندىق №7 ءورت ءسوندىرۋ ءبولىمىنىڭ باسشىسى ك.ابدرايموۆ جانە اۋداندىق ءبولىم قىزمەتكەرلەرىمەن بىرگە بارىپ, ءتيىستى شارالاردى قابىلداعان. اۋدان اكىمدىگىنىڭ مالىمەتىنشە, تەكسەرۋ جۇمىستارىن جۇرگىزۋ كەزىندە شاقپاق اتا اۋىلدىق وكرۋگىندەگى الاتاۋ تاۋ بوكتەرىندە جاۋىننىڭ مولشەردەن كوپ ءتۇسۋى سالدارىنان سۋدىڭ ت.دۇيسەباي ۇلى اۋىلىنىڭ شەتىندەگى ەگىس القاپتارىن شايىپ, س.نارباي ۇلى كوشەسىنىڭ بويىنداعى 4 ءۇيدىڭ اۋلاسىنا كىرگەندىگى انىقتالعان. ءتىلسىز جاۋدى اۋىزدىقتاۋ ءۇشىن اۋدان اكىمدىگىنەن 2 ادام, شاقپاق اتا اۋىلدىق وكرۋگىنىڭ اكىمدىگىنەن 6 ادام جانە اۋداندىق توتەنشە جاعدايلار ءبولىمىنىڭ باسشىلارى مەن قىزمەتكەرلەرى تارتىلىپ, بىرلەسە جۇمىس اتقارعان. بەلگىلى بولعانىنداي, شاقپاق اتا اۋىلى, ورازباەۆ كوشەسى №97 ءۇيدىڭ اۋلاسىنا سۋ جينالعان. اتالعان اۋىلدىق وكرۋگتىڭ اكىمدىگىنەن ەرىكتى 5 ادام اتالعان ءۇيدىڭ اۋلاسىن تازارتۋ جۇمىستارىن اتقاردى.
سونىمەن قاتار, اۋدان ورتالىعى ب.مومىش ۇلى اۋىلىنداعى رىسبەك باتىر كوشەسىنىڭ بويىنداعى 1 ءۇيدىڭ اۋلاسىنا سۋ كىرگەن. بۇل ماسەلەگە دە اۋدان اكىمدىگىنەن 2 ادام, اۋداندىق توتەنشە جاعدايلار ءبولىمىنىڭ باسشىسى ە.ءامىروۆ, اۋداندىق №7 ءورت ءسوندىرۋ ءبولىمىنىڭ باسشىسى ك.ابدرايموۆ جانە ب.مومىش ۇلى اۋىلىنىڭ اكىمشىلىگىنەن 7 ادام جۇمىس اتقارعان. سول سياقتى, جينالعان جاۋىن-شاشىن سۋلارى ب.مومىش ۇلى اۋىلى رىسبەك باتىر كوشەسى بويىنداعى تەمىرجول استىنداعى سۋ وتكىزۋ ورنى ارقىلى جول بويىمەن وتكەن. مۇندا دا اتالعان اۋىل اكىمشىلىگىنەن 7 ادام جۇمىس اتقارعان. سونداي-اق, قاراساز اۋىلدىق وكرۋگىنە قاراستى اقباستاۋ اۋىلىنداعى بەرەكە كوشەسىنىڭ بويىمەن ءۇيدىڭ اۋلالارىنا سۋ كىرگەن. مۇندا دا اۋدان اكىمدىگىنەن, اۋداندىق توتەنشە جاعدايلار بولىمىنەن, اتالعان اۋىلدىق وكرۋگ اكىمشىلىگىنەن 20-عا جۋىق ادام كۇشى جانە قوسىمشا تۇرعىنداردىڭ كۇشى تارتىلىپ, سۋدى اۋىل شەتىندەگى سايعا بۇرىپ جىبەرگەن. ناتيجەسىندە اۋدان اكىمدىگى بۇگىندە تۇرعىندارعا ەشقانداي دا قاۋىپتىڭ جوق ەكەنىن حابارلادى. توتەنشە جاعداي كەزىندە اۋداندىق توتەنشە جاعدايلار بولىمىنەن 4 قىزمەتكەر, 1 اۆتوكولىك, اۋداندىق ءورت ءسوندىرۋ بولىمىنەن 1 كومەكشى, 4 قىزمەتكەر, ۋاز اۆتوكولىگى, ال اۋدان اكىمدىگىنەن 40 ادام, 4 اۆتوكولىك كۇشى جۇمىلدىرىلعان.
بۇگىندە اۋدانداعى «تەرىس-اششىبۇلاق» سۋ قويماسىنىڭ جوبالىق كولەمى 158,0 ميلليون تەكشەمەتر, ال بوگەتتىڭ تەحنيكالىق جاعدايى بويىنشا رۇقسات ەتىلەتىن كولەمى 145,0 تەكشەمەتر. الايدا, اۋداندىق اكىمدىكتىڭ حابارلاۋىنشا, سۋ تاسقىنىنان ەشقانداي قاۋىپ جوق.
جامبىل وبلىسى
