ماسەلەن, المالى سەلولىق وكرۋگى اۋماعىندا 250-دەن استام ساياجاي ۋچاسكەسى بار. الايدا, بۇعان دەيىن ساياجاي يەلەرى ءوز ۋچاسكەلەرىنە بارا العان جوق. ەندى اتىراۋدا دا ساياجايلارعا بارۋعا رۇقسات بەرىلىپ وتىر. بىراق, ساياجاي يەلەرى ءوز ۋچاسكەلەرىنە سەنبى مەن جەكسەنبى كۇندەرى تاڭەرتەڭگى ساعات 06:00-دەن 09:00-گە, كەشكى 17:00-دەن 20:00-گە دەيىن عانا بارىپ-كەلە الادى. ال, وزگە كۇندەرى وڭاي ولجانى ويلايتىندار ساياجايلاردان قولعا تۇسكەندى ءىلىپ كەتۋگە بەيىم ەكەن.
– پوليتسيا قىزمەتكەرلەرىنىڭ ساياجايدى ۇدايى قاداعالاۋعا مۇمكىندىگى بولا بەرمەيدى. سول سەبەپتەن, ءبىر توپ ەرىكتى ساياجايلاردى باقىلاۋدى قولعا الدىق. وعان ءوزىمىزدىڭ اتىمىزدى پايدالانۋدى ۇيعاردىق. ويتكەنى, ساياجاي اۋماعىندا كولىك جۇرە المايتىن تۇستار بار, -دەيدى پوليتسيانىڭ ەرىكتى كومەكشىلەرىنىڭ وتارعالي اۋبەكەروۆ.
كوپ جىلدان بەرى ساياجاي ۋچاسكەسىنە كوكونىس, باقشا ونىمدەرىن وسىرەتىن ۆلاديمير زاۆەرتكيننىڭ ايتۋىنشا, وسى كەزگە دەيىن قۇرال-سايماندار, قۇرىلىس ماتەريالدارى ءجيى جوعالاتىن بولعان. الايدا, كۇزەتشى جالداۋعا قارجىنىڭ تاپشىلىعى كەدەرگى كەلتىرەدى. ەندى اتتىلى جاساق ىسكە كىرىسكەلى بەرى ۇرلىق ايتارلىقتاي ازايىپتى.
وبلىستىق پوليتسيا دەپارتامەنتى ءباسپاسوز قىزمەتىنىڭ جەتەكشىسى گۇلنازيرا مۇحتاروۆانىڭ ءمالىم ەتۋىنشە, اتتى جاساق مۇشەلەرىن پوليتسيانىڭ قوعامدىق كومەكشىسى دەۋگە بولادى. قازىر 600-دەن استام قوعامدىق كومەكشى بار. ولار جىل باسىنان بەرى 100-دەن اسا قىلمىستىڭ اشىلۋىنا قولعابىس جاساپتى.
– قوعامدىق كومەكشىلەر ۋچاسكەلىك ينسپەكتورلارمەن بىرگە قوعامدىق ءتارتىپتىڭ ساقتالۋىنا دا اتسالىسىپ ءجۇر. ءار توقسان سايىن بەلسەندى كومەكشىلەرگە 10 ايلىق ەسەپتىك كورسەتكىش مولشەرىندە سىياقى بەرىلەدى, -دەيدى پوليتسيا دەپارتامەنتىنىڭ ءباسپاسوز حاتشىسى گۇلنازيرا مۇحتاروۆا.
