مەملەكەت بۇگىنگى كۇنگە دەيىن وتانداستارىمىزدىڭ توتەنشە جاعدايعا بايلانىستى تۋىنداعان ماسەلەلەرىنە بەيجاي قارامايتىنىن كورسەتتى, ءالى دە كورسەتە بەرمەك. ىندەت باستالعان كۇننەن پرەزيدەنت قاسىم-جومارت كەمەل ۇلى توقاەۆ جاريالاعان الەۋمەتتىك پاكەتتەر قاجەتتى دەڭگەيدە جۇزەگە اسىرىلىپ كەلەدى. شاعىن جانە ورتا بيزنەس وكىلدەرىن قولداۋ شارالارى اياسىندا دا مەملەكەت بيۋدجەتىنەن قىرۋار قارجى قاراستىرىلدى. اسىرەسە اۋىل شارۋاشىلىعى سالاسىندا كوكتەمگى ەگىستىك جۇمىستارى بويىنشا توتەنشە جاعدايعا قاراماستان, ءتيىمدى شەشىمدەر قابىلدانىپ, دالا جۇمىستارىنىڭ ۋاقتىلى ۇيىمداستىرىلۋى ءۇشىن شارۋالارعا قولايلى جاعداي جاسالدى. پرەزيدەنت جۇمىسشى سانىن جانە ەڭبەكاقى كولەمىن ازايتپاۋ ماقساتىندا ەلىمىزدەگى ءىرى كومپانيالارعا دا ءتيىستى قولداۋ كورسەتىلەتىنىن مالىمدەدى. كوروناۆيرۋس ىندەتى مەن جاھاندىق ەكونوميكالىق داعدارىس ەلىمىزدىڭ ەكونوميكاسىنىڭ كۇرەتامىرىنا اينالعان بۇل كومپانيالاردى دا ءوز قىسپاعىنا الۋدا. اتالعان كاسىپورىنداردا ءجۇز مىڭداعان ازاماتىمىز ەڭبەك ەتەتىنىن ەسكەرسەك, پرەزيدەنت شەشىمىنىڭ الەۋمەتتىك ماڭىزدىلىعىن جەتە تۇسىنەمىز. ساياجايلار مەن ءۇي ماڭىنداعى شاعىن شارۋاشىلىقتار دا نازاردان تىس قالمايتىنى ايتىلدى. ءبىر سوزبەن ايتقاندا, پرەزيدەنت قاسىم-جومارت توقاەۆتىڭ مالىمدەمەسىنەن وسىناۋ سىن ساعاتتا قيىندىققا تاپ بولعان ەلىمىزدىڭ ەشبىر ازاماتى قولداۋسىز قالمايتىنىن ۇعىندىق. مەملەكەت وزىنە تيەسىلى مىندەتتەرىن تيىسىنشە اتقارىپ جاتىر. مۇنداي ساتتە ەلىمىزدىڭ ءاربىر ازاماتى سابىرلىق پەن توزىمدىلىك تانىتا ءبىلۋى ءتيىس. سوندا عانا توسىننان كەلگەن قيىندىقتى ەل بولىپ ەڭسەرە الماقپىز.
قۇرمەتتى وتانداستار, توتەنشە جاعدايدا سىزدەر مەن بىزدەردىڭ ساۋلىعىمىز بەن اماندىعىمىزدىڭ كەپىلى بولىپ, بار جاۋاپكەرشىلىكتى موينىنا الاتىن جالعىز كۇش – ول مەملەكەت. سوندىقتان دا ەلىمىزدىڭ ازاماتتارىن پرەزيدەنتىمىز جاريالاعان جاڭا شەشىمدەرگە قولداۋ كورسەتىپ, سابىرلىق پەن توزىمدىلىك تانىتىپ, ەل بىرلىگىنىڭ ەرەن ۇلگىسىن كورسەتۋگە شاقىرامىز.
«اۋىل» حالىقتىق-دەموكراتيالىق پاتريوتتىق پارتياسىنىڭ ساياسي كەڭەس تورالقاسى
