ەلىمىزدەگى كارانتين ۋاقىتىنىڭ مامىردىڭ 11-ىنە دەيىن ۇزارتىلۋى ەلدىڭ كوڭىلىن جۇباتقانداي بولدى. سەبەبى ءساۋىردىڭ 30-نان مامىردىڭ 11-ىنە دەيىن ون كۇننىڭ ىشىندە التى كۇنى دەمالىس, مەرەكە كۇندەرى ەكەن. سوندىقتان قىرقىنا شىداعان ەل-جۇرت قىرىق بىرىنە دە شىدايدى دەپ ويلايمىن.
پرەزيدەنت ءوز مالىمدەمەسىندە ەلدىڭ كوكەيىندە جۇرگەن كوپ سۇراققا جاۋاپ بەرىپ, حالىقتى سابىرعا شاقىردى. دۇنيە جۇزىندە 3 ميلليوننان استام ادام وسى اۋرۋعا شالدىققانى ايتىلدى. ءبىزدىڭ ەلىمىزدە دە اۋرۋ جۇقتىرعاندار ازايماي تۇر. سونىڭ ىشىندە دەنساۋلىق ساقتاۋ سالاسىنىڭ قىزمەتكەرلەرى, ياعني دارىگەرلەردىڭ حالىقتى قۇتقارامىن دەپ ءجۇرىپ, وزدەرىنىڭ جۇقتىرعانى, وسى اۋرۋعا شالدىققانى وكىنىشتى جاعداي. سوندىقتان قازىرگى قابىلدانىپ جاتقان ساقتىق شارالارى وتە دۇرىس, بۇعان تۇسىنىستىكپەن قاراۋىمىز كەرەك.
بارلىق مەديتسينا, دەنساۋلىق ساقتاۋ سالاسىنا جاعداي جاسالىپ جاتىر. ەكى اپتانىڭ ىشىندە جۇقپالى اۋرۋلاردى ەمدەيتىن اۋرۋحانا سالىندى. بۇل ءبىزدىڭ مەملەكەتىمىزدىڭ مۇمكىندىگىن كورسەتەدى.
كارانتين ۋاقىتىنىڭ سوزىلۋى ءوز قاۋىپسىزدىگىمىزدى ساقتاۋعا, قازاقستاننىڭ ءار ازاماتىنا قاجەت. ەلىمىزدە بىردەن ءتيىستى شارالار قولدانعاننىڭ, ءوزىمىزدى ءوزىمىز قورعاعانىمىزدىڭ ارقاسىندا قيىندىقتاردىڭ ءبىرازىن ەڭسەردىك جانە اۋرۋدىڭ ءورشىپ كەتۋىنە توسقاۋىل جاسادىق. مەنىڭ پايىمداۋىمشا, ءساۋىردىڭ اياعىنان باستاپ ىندەتتىڭ ازاياتىنى جونىندە ساراپتاما بار.
قيىن كەزەڭدە مەملەكەت تاراپىنان ەلگە كومەك بەرىلىپ جاتىر. بيۋدجەتتەن بيزنەس سالاسىنا, اسىرەسە شاعىن جانە ميكروبيزنەسكە, جۇمىسسىز قالعاندارعا قولداۋ كورسەتىلىپ, بۇگىنگى تاڭدا 4 ملن 750 مىڭ ادام كومەك الدى. 570 مىڭ ازامات ازىق-ت ۇلىكپەن قامتاماسىز ەتىلدى. كوممۋنالدىق تولەمدەر جەڭىلدەتىلىپ, ءبىر جارىم ميلليوننان استام ادامعا جاردەم بەرىلدى. نەسيە العاندار دا شەت قالعان جوق, ولاردى كەيىنگە قالدىرۋ ماسەلەسى شەشىلىپ جاتىر. ءاربىر شاعىم, ءار ادامنىڭ ءوتىنىشى نازارعا الىندى. مۇنى پرەزيدەنتتىڭ اپپاراتىنان باستاپ, ۇكىمەت, Nur Otan پارتياسى, اكىمشىلىكتەر كۇندەلىكتى باقىلاپ, مونيتورينگ جاساپ وتىر.
مالىمدەمەدەگى تاعى ءبىر ماڭىزدى ماسەلە – جۇمىس ورنىن جانە ەڭبەكاقى كولەمىن ازايتپاۋ ماقساتىندا ءىرى كومپانيالارعا كومەك كورسەتۋ ماسەلەسى كوتەرىلدى جانە ونىڭ ءتىزىمىن قازىر ۇلتتىق ەكونوميكا مينيسترلىگى جاساپ جاتقاندىعى, ول تىزىمگە تەك اسا ماڭىزدى كومپانيالار عانا ەنگىزىلەتىنى ءسوز بولدى. بۇل ماسەلە دەر كەزىندە دۇرىس نازارعا ءىلىندى دەپ ەسەپتەيمىن. ەندى ونى اشىق تۇردە, جاريالى تۇردە وتكىزۋ وتە ماڭىزدى. سەبەبى قازىر الەۋمەتتىك جەلىلەردە كوپ سىنالىپ, كەيبىرەۋلەردىڭ ايتۋىنا قاراعاندا, تابىسى ۇلكەن كومپانيالار دا تىزىمگە ەنىپ جاتىر دەگەن سان الۋان پىكىر قايشىلىقتارى ايتىلىپ ءجۇر. سوعان بايلانىستى بۇل ەگجەي-تەگجەيلى قارالىپ, تەك قانا ءتيىستى كومپانيالارعا, ونىڭ ىشىندە قاجەتتىگى جوعارى, نەگىزىنەن اۋىل شارۋاشىلىعى, تاماق وندىرەتىن كومپانيالارعا عانا بەرىلەدى دەپ ويلايمىز.
مالىمدەمەدە كارانتين بىتكەننەن كەيىن, بۇكىل الەمدەگى داعدارىسقا بايلانىستى بىزگە دە داعدارىس جاعدايىنا دايىندالۋ قاجەتتىگى, ەلباسىنىڭ 24 ساۋىردە وتكەن قاۋىپسىزدىك كەڭەسىندەگى جۇكتەگەن تاپسىرمالارىن جۇزەگە اسىرۋ جايى ەسكەرتىلدى.
جوعارىدا ءتيىستى كومپانيالارعا, ەلىمىزدىڭ ەكونوميكاسىنا وزدەرىنىڭ قوماقتى ۇلەسىن قوساتىن كومپانيالارعا كومەك بەرۋ قاراستىرىلعانىن جوعارىدا اتاپ وتتىك. بۇعان ەلىمىزدىڭ تولىق مۇمكىندىگى بار. قازىر ۇلتتىق قورىمىزدا ءۇش جىلدىق بيۋدجەتتىڭ قارجىسى ساقتالعان. ءدال قازىرگى ۋاقىتتا بيۋدجەتكە جەتىسپەيتىن جاعى سول قوردان قاراستىرىلۋدا.
تاۋەلسىزدىك العان العاشقى جىلدارى قانداي قيىندىق كوردىك. ول كەزدە ينفلياتسيا 2500 پايىزعا دەيىن جەتىپ, ايلىق, زەينەتاقىلار التى ايعا دەيىن كەشىكتىرىلىپ بەرىلگەن كەزەڭنەن دە وتكەنبىز. كەيىنگى جىلدارداعى الەمدە بولعان داعدارىستار دا سول ۇلتتىق قوردىڭ ارقاسىندا قيىندىقتى تەزىرەك ەڭسەردىك. بۇگىنگى كۇنى دە ۇلتتىق قوردىڭ ارقاسىندا سونداي كومەك بولادى, بولىپ تا جاتىر.
ازىق-ت ۇلىك قورىنا كەلەتىن بولساق, قازاقستان ءاربىر ادام باسىنا شاققاندا دۇنيە جۇزىندە بەس الدىڭعى مەملەكەتتىڭ قاتارىنا كىرەدى. ءبىر عانا مىسال كەلتىرەيىن, بىزدە جىلىنا ءار ادام باسىنا شاققاندا 1 توننادان استام بيداي وندىرىلەدى. ازىق-ت ۇلىكتىڭ اتاسى دا, اناسى دا سول ناننان تۇرادى. بۇدان باسقا دا ازىق-ت ۇلىك قورى بارشىلىق. سوندىقتان كەز كەلگەن جاعدايدا ءبىزدىڭ تىعىرىقتان شىعۋعا مۇمكىندىگىمىز بار. «بىرلىگى كۇشتى ەل وزادى» دەپ دانالارىمىز ايتقانداي, بۇكىل ەل بولىپ, ءبىر-بىرىمىزگە يىق تىرەپ, قولداۋ كورسەتسەك بۇل ۋاقىتشا قيىندىقتان دا لايىقتى شىعارىمىز انىق. وسى ماقالانى دايىنداپ وتىرعانىمدا ءبىر جاقسى حابار وقىدىم. وندا سينگاپۋر تەحنولوگيا جانە ماسساچۋسەتتىڭ تەحنولوگيا ۋنيۆەرسيتەتتەرىنىڭ بولجامدارى بويىنشا قازاقستاندا وسى ءساۋىر ايىنىڭ اياعىندا كوروناۆيرۋسپەن اۋرۋدىڭ جوعارى دەڭگەيى ءبىتىپ, ءارى قاراي تومەندەي كەلە, مامىر ايىنىڭ اياعىنا قاراي 97 پايىزعا قىسقارادى دەپ جازىلعان. ايتقاندارى تەزىرەك بولعاي دەپ تىلەيمىز!
ءساۋىر ايىنىڭ اياعى مەن مامىر ايىنىڭ باسىنا قاسيەتتى رامازان ايى ءدال كەلىپ وتىر. بۇل بۇكىل مۇسىلمان قاۋىمعا, قازاقستاندىقتارعا جاقسىلىق, باقىتتى كۇندەر سىيلايتىن اي بولسىن. ءار وتباسىنداعى نيەت-تىلەك قابىل بولسىن. 1 مامىر قازاقستان حالقىنىڭ بىرلىگى كۇنى, 9 مامىر ۇلى جەڭىستىڭ 75 جىلدىعى, وسى مەرەكەلەردى وتكىزىپ, ءسال شىداپ, ءبىر-ءبىرىمىزدى سابىرعا شاقىرىپ, كارانتيننەن امان-ەسەن ءوتىپ, ءومىرىمىزدى بەيبىت, جاقسى كۇندەردە جالعاستىراتىن بولايىق!
ەرسۇلتان بەكتۇرعانوۆ,
پارلامەنت ءماجىلىسىنىڭ دەپۋتاتى, Nur Otan فراكتسياسىنىڭ مۇشەسى
