2020 جىلعى 27 ءساۋىر كۇنى قازاقستان جاستارىنىڭ كونگرەسى مەن «جاسىل ەل» جاستار ەڭبەك جاساقتارىنىڭ رەسپۋبليكالىق شتابى اتىنان قازاقستان رەسپۋبليكاسىنىڭ پرەمەر-مينيسترىنە رەسمي ۇندەۋ جولداندى.
رەسمي ساۋالعا پرەمەر-مينيستر اسقار ءماميننىڭ توراعالىعىمەن وتكەن ۇكىمەتتىڭ سەلەكتورلىق وتىرىسىندا 2020-2025 جىلدارعا ارنالعان «نۇرلى جول» مەملەكەتتىك باعدارلاماسىن جۇزەگە اسىرۋ اياسىندا بيىل پايدالانۋعا بەرىلەتىن رەسپۋبليكالىق ماڭىزداعى جولدار كولەمىن ارتتىرۋ تۋرالى حابارلاۋى سەبەپ بولدى. سونداي-اق پرەمەر-مينيستر اسقار مامين قۇرىلىس ماۋسىمىن ۋاقىتىندا باستاۋدى, قۇرىلىس قارقىنىن جەدەلدەتۋ مەن جوسپارلانعان تۇرعىن ءۇي كولەمىن ۋاقتىلى پايدانالۋعا بەرۋدى تاپسىرعان.
«وڭىرلەردەگى جاستار ەڭبەك جاساقتارىنىڭ مەملەكەتتىك ماڭىزداعى قۇرىلىس جۇمىستارىنا قاتىسۋى جاستاردىڭ وزدەرىنە جاھاندىق مىندەتتەر ارتىپ, قوعام الدىندا ازاماتتىق جاۋاپكەرشىلىكتى سەزىنە الۋىنا ىنتالاندىرادى», دەدى «جاسىل ەل» جاستار ەڭبەك جاساقتارى رەسپۋبليكالىق شتابىنىڭ جەتەكشىسى ازامات دانيار.
سونداي-اق رەسپۋبليكالىق شتاب جاسىلەلدىكتەردىڭ وسى باعىتتاعى تاجىريبەلەرىن اتاپ ءوتتى. ولار «باتىس ەۋروپا – باتىس قىتاي» حالىقارالىق ترانزيتتىك اۆتوجولى مەن EXPO-2017 حالىقارالىق مامانداندىرىلعان كورمەسى نىساندارىنىڭ قۇرىلىسى, «اۋىلدىڭ گۇلدەنۋى – قازاقستاننىڭ گۇلدەنۋى» رەسپۋبليكالىق مارافون-ەستافەتاسىن ۇيىمداستىرۋ جۇمىستارىنا بەلسەندى قاتىسقان. العاشقىلاردىڭ ءبىرى بولىپ «نۇرلى جول» ينفراقۇرىلىمدى دامىتۋ مەن «نۇرلى جەر» تۇرعىن ءۇي باعدارلامالارىن جۇزەگە اسىرۋ جۇمىستارىنا جۇمىلدىرىلعاندار قاتارىندا جاسىل ەل ساربازدارى بولعان.
