ەندى پەترپاۆلدان رف اۋماعىنا وتەمىز دەپ وتىرعاندا مۇندا كارانتين رەجىمى باستالىپ, ەشكىم شىقپايتىن بولىپ قالعان. ءسويتىپ, مولدوۆالىقتاردىڭ ۇلكەن وتباسى قىزىلجار اۋماعىندا قالا بەرگەن.
ولارعا العاشقى بولىپ وبلىستىق كوشى-قون قىزمەتى باسقارماسىنىڭ قىزمەتكەرلەرى كومەك قولىن سوزعان. ولار ءماجبۇرلى قوناقتاردى تۇرعىن ۇيمەن قامتاماسىز ەتىپ قانا قويماي, قاجەتتى زاتتارىن, سونىڭ ىشىندە گيگيەنالىق زاتتار, بالالارعا پامپەرسكە دەيىن جەتكىزىپ بەرگەن. ازىق-ت ۇلىكپەن قامتاماسىز ەتۋلەرى دە تۇراقتى بولىپ تۇرعان. مۇنداي قامقورلىق كورەمىز دەپ ويلاماعان مولدوۆالىقتار قازاقستاندىقتارعا شەكسىز ريزالىقتارىن ءبىلدىرۋدە. «قازاقستان حالقى وتە قوناقجاي ەكەن. قولىمىزدا كىشكەنتاي بالالارىمىز بار. ولار سونى كورىپ العاشقى كۇننەن-اق وسىنداي قيىن ساتتە بىزگە قۇلشىنا كومەكتەستى. باسپانا ماسەلەسىن شەشىپ بەردى. كەرەكتى زاتتارىمىزدى جەتكىزىپ بەرۋدە. ءبىز وتە ريزامىز. راحمەت!», - دەيدى مولدوۆا رەسپۋبليكاسىنىڭ 38 جاستاعى ازاماتى ارتۋر شەربان.
قازىر وبلىستا كارانتين رەجىمى جۇمسارتىلۋدا. مولدوۆالىقتاردىڭ ءوز ەلىنە قاراي ساپارعا شىعاتىن كۇندەرى دە الىس ەمەس. سول كۇندى تاعاتسىزدانا كۇتكەن جاندار قازاقستاندىقتاردىڭ جومارت مىنەزدەرىنە دە كۇننەن كۇنگە ءتانتى بولۋدا.
جالپى, كوشى-قون قىزمەتى باسقارماسىنىڭ اقپاراتىنا قاراعاندا كارانتين كۇندەرى سولتۇستىك قازاقستان وبلىسى اۋماعىندا 5500-دەن استام شەتەلدىك ازامات كەتە الماي قالىپ قويعان. بىراق ولاردىڭ مۇندا تۋعان-تۋىستارى مەن تانىستارى كوپ. وزدەرى دە بۇرىن سولتۇستىك قازاقستاندا تۇرعان رەسەي فەدەراتسياسىنىڭ ازاماتتارى. سوندىقتان ولار ەشكىمنىڭ قامقورلىعىن كەرەك قىلمايدى.
سولتۇستىك قازاقستان وبلىسى
