اسىرەسە, الەۋمەتتىك ماڭىزى بار تاۋارلاردىڭ باعاسى شەكتىك نورمادان اسىپ كەتپەۋى ءتيىس. كارانتيندى سىلتاۋراتىپ, ساۋداگەرلەر قاراپايىم حالىقتىڭ قالتاسىن قاقپاۋى قاجەت.
كارانتين باستالعالى جىلقى ەتى مەن سيىر ەتىنىڭ كەلىسى 300-400 تەڭگەگە قىمباتتادى. ەل ىشىندە سويىستىق مال بار بولعانىمەن شارۋالار وبلىس ورتالىعىنداعى ساۋدا سورەلەرىنە جەتكىزە الماي جاتىر. ءتىپتى, جۇمىرتقادان ءجۇن قىرقاتىن دەلدالداردىڭ دا دىمى قۇرىپ وتىر. ايتۋلارىنا قاراعاندا, ەت تاسۋعا رۇقسات العاندارىمەن كوپشىلىگىنىڭ مۇزداتقىشپەن جابدىقتالعان كولىكتەرى جوق ەكەن. سول سەبەپتى, بۇل ۋاقىتشا قىمباتشىلىق دەپ ۇقتىق. ساتۋشىلار ەت, ماكارون باعالارىن شەكتىك نورمادا تۇراقتى ۇستاپ تۇر. ال جۇمىرتقا, قاراقۇمىق قىمباتتاۋ. بۇلار ۇكىمەت بەكىتكەن الەۋمەتتىك ماڭىزى بار ازىق-ت ۇلىككە جاتادى.
ساۋدا سورەلەرىندەگى: ماكارون – 215, قاراقۇمىق – 339, تازارتىلعان كۇرىش – 307, جۇمىرتقا – 267, وسىمدىك مايى – 417 تەڭگە كولەمىندە. باسقا تاۋارلاردىڭ باعاسى قاتاڭ باقىلانباسا دا, مۇنداي تاۋارلار ءاردايىم قاداعالانادى.
–بۇگىندە قالا بازارلارىنداعى الەۋمەتتىك ماڭىزى بار 19 ءتۇرلى تاۋارعا مونيتورينگ جۇرگىزىلىپ وتىرادى. ونىڭ ىشىندەگى توعىز ءتۇرى ءۇشىن شەكتىك باعا بەكىتىلگەن. اتالمىش تاۋارلارى بويىنشا قالالىق اكىمدىك ماماندارى باقىلاۋلار جۇرگىزىپ, تالاپتى بۇزعان ساۋداگەرلەرگە اكىمشىلىك قۇقىقبۇزۋشىلىق بويىنشا حاتتاما تولتىرادى. ءبىز ورتالىق بازار, رۋبين, كريستالل, سمولل, سويۋز سىندى ءىرى ساۋدا نىساندارىنداعى تاۋارلار باعاسىن باقىلايمىز. قالا بويىنشا 515 ءىرىلى-ۇساقتى ساۋدا نىسانىنا تەكسەرۋ جاسالادى. سوڭعى ەكى كۇندە باعانى تۇراقتى ۇستاماعانى ءۇشىن 13 ەسكەرتپە حاتتاما تولتىرىلدى. العاشقى ەسكەرتۋدەن كەيىن مۇنداي زاڭ بۇزۋشىلىقتى قايتالاعان ساۋداگەرگە 100 ايلىق ەسەپتىك كورسەتكىش كولەمىندە ايىپپۇل سالىنادى,–دەيدى قالالىق كاسىپكەرلىك ءبولىمىنىڭ جەتەكشىسى اندرەي پودگۋرسكي.
ازىق-ت ۇلىكتىڭ باعاسىنا الاڭداپ وتىرعان حالىقتىڭ قامىن ويلاعان دا جاقسى-اۋ.
كوكشەتاۋ قالاسى
