«2019 جىلى جامبىل وبلىسى بويىنشا سىبايلاس جەمقورلىق قىلمىستارى ءۇشىن 33 لاۋازىمدى تۇلعا سوتتالسا, ولاردىڭ باسىم بولىگى ءبىلىم سالاسىنا قاتىستى. باسقا سالالاردان دا سىبايلاس جەمقورلىققا قارسى زاڭنامانى بۇزۋشىلار بار. ەڭ كوپ قىلمىس تاراز قالاسىندا, شۋ, بايزاق, جۋالى جانە مەركى اۋداندارىندا ورىن العان», دەپ اتاپ ءوتتى وبلىس اكىمى بەردىبەك ساپارباەۆ.
جيىندا ەلىمىزدىڭ سىبايلاس جەمقورلىققا قارسى ءىس-قيمىل اگەنتتىگى وبلىستىق دەپارتامەنتىنىڭ باسشىسى ءادىلحان اشىرباەۆ بايانداما جاسادى. ول ەڭبەك جانە سىبايلاس جەمقورلىق زاڭناماسىنىڭ ورىندالۋى بويىنشا مونيتورينگ بارىسىندا قىزىقتى فاكتىلەر انىقتالعاندىعىن العا تارتتى. مىسالى, سىبايلاس جەمقورلىق ارەكەتتەرى فاكتىلەرى بويىنشا جاۋاپكەرشىلىككە تارتىلعان مەملەكەتتىك ورگاندار مەن كاسىپورىنداردىڭ 9 لاۋازىمدى تۇلعالارى ءوز باسشىلىق قىزمەتتەرىن جالعاستىرىپ كەلگەن. تەك سىبايلاس جەمقورلىققا قارسى قىزمەتتىڭ ارالاسۋىنان كەيىن عانا ولار ءوز وكىلەتتىگىن توقتاتۋعا ءماجبۇر بولعان. سىبايلاس جەمقورلىقتىڭ الدىن الۋ جانە وعان قارسى تۇرۋ ماقساتىندا سىبايلاس جەمقورلىققا قارسى ءىس-قيمىل اگەنتتىگىنىڭ تاپسىرماسى بويىنشا «اشىق بيۋدجەتتىڭ ينتەراكتيۆتى كارتاسى», «بيزنەستى جانە ينۆەستيتسيالاردى قورعاۋ» سياقتى جوبالار ىسكە اسىرىلۋدا ەكەن. قازىرگى ۋاقىتتا جەرگىلىكتى اتقارۋشى ورگانداردىڭ باسقارمالارى مەن بولىمدەرىنە قاراستى 900 ۇيىم ءوز بيۋدجەتتەرى تۋرالى جاريالاعان. «وتكەن جىلدىڭ قورىتىندىسى بويىنشا دەپارتامەنت سىبايلاس جەمقورلىق جاساعان 70 ءىستى سوتقا جولداسا, 90 لاۋازىمدى تۇلعا قىلمىستىق جاۋاپكەرشىلىككە تارتىلعان. سىبايلاس جەمقورلىق قىلمىستارىنان كەلتىرىلگەن شىعىن كولەمى 1,2 ميلليارد تەڭگەنى قۇراپ, 930 ميلليون مەملەكەتكە قايتارىلدى. شاعىن جانە ورتا بيزنەس قىزمەتىنە ارالاسۋمەن, سونداي-اق مەملەكەتتىك باعدارلامالاردى ىسكە اسىرۋعا بولىنگەن قاراجاتتى جىمقىرۋعا قاتىستى قىلمىستاردىڭ سانى ارتقان», دەپ اتاپ ءوتتى ءادىلحان اشىرباەۆ.
انىقتالعانداي, مەملەكەتتىك قۇرىلىمدار اراسىندا جەرگىلىكتى اتقارۋشى ورگاندار سىبايلاس جەمقورلىققا اسا بەيىم. اسىرەسە, ءبىلىم بەرۋ, دەنساۋلىق ساقتاۋ, الەۋمەتتىك قورعاۋ, اۋىل شارۋاشىلىعى, قۇرىلىس, ەنەرگەتيكا جانە تۇرعىن ءۇي-كوممۋنالدىق شارۋاشىلىعى سالالارىندا زاڭبۇزۋشىلىققا جول بەرىلۋدە. سونىمەن قاتار, جيىندا قۇقىق قورعاۋ ورگاندارىنىڭ قىزمەتكەرلەرىنە قارسى وتكەن جىلى 29 قىلمىستىق ءىس قوزعالعاندىعى دا ايتىلدى. اعىمداعى جىلدىڭ 3 ايىندا سوتقا جولدانعان سىبايلاس جەمقورلىق سيپاتىنداعى قىلمىستىق ىستەردىڭ سانى 27-گە جەتسە, وسى بولىك بويىنشا 28 تۇلعا قىلمىستىق جاۋاپكەرشىلىككە تارتىلعان. بايانداماشى وبلىس كولەمىندە سىبايلاس جەمقورلىققا قارسى ءىس-قيمىل جونىندەگى 2020 جىلعا ارنالعان كەشەندى جوسپاردى ىسكە اسىرۋعا بايلانىستى بىرقاتار ۇسىنىستارىن ورتاعا سالدى. ول جەرگىلىكتى اتقارۋشى ورگانداردىڭ ماڭىزدى مىندەتى «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ شەڭبەرىندە حالىقپەن ءتيىمدى كەرى بايلانىس ورناتۋ بولىپ تابىلاتىندىعىنا ايرىقشا كوڭىل ءبولدى. سوڭعى ۋاقىتتا «ادالدىق الاڭى» جوبالىق كەڭسەسىنىڭ جۇمىسىندا وڭ تاجىريبە جيناقتالعاندىعى, وسى باعىتتاعى جۇمىستاردى ودان ءارى جالعاستىرۋ كەرەكتىگى ايتىلدى. باسقوسۋدا «جامبىل – ادالدىق الاڭى» جوبالىق كەڭسەسىنىڭ جۇمىسى مەن پەرسپەكتيۆالىق باعىتتارى تۋرالى اتالعان جوبانىڭ جەتەكشىسى نازيما جۋۆاندىكوۆا باياندادى.
جيىندى قورىتىندىلاي كەلە بەردىبەك ساپارباەۆ اعىمداعى جىلدىڭ ءبىرىنشى توقسانىنداعى سىبايلاس جەمقورلىق كورىنىستەرىنىڭ سەبەپتەرىن ەگجەي-تەگجەيلى تالداۋ جانە ناقتى ءىس-قيمىل باعدارلاماسىن ازىرلەۋ قاجەتتىگىن اتاپ ءوتتى. سىبايلاس جەمقورلىققا قارسى كۇرەستە جۇيەلى, كەشەندى شارالار قاجەتتىگىن ەسكەرتتى. اكىمنىڭ ايتۋىنشا, بۇل ىستە ءوز قاراماعىنداعى قىزمەتكەرلەردىڭ سىبايلاس جەمقورلىق قۇقىقبۇزۋشىلىقتارى ءۇشىن مەملەكەتتىك ورگانداردىڭ ءبىرىنشى باسشىلارىنىڭ وتستاۆكاسى بويىنشا تۇزەتۋلەر ەنگىزىلگەن زاڭناما ايرىقشا نەگىزگە الىنۋى ءتيىس. جەرگىلىكتى اتقارۋشى ورگانداردىڭ حالىق ءۇشىن اشىق جانە قولجەتىمدى بولۋعا مىندەتتى ەكەنى دە ايتىلدى. وسىعان بايلانىستى, بارلىق اۋداندىق اكىمدىكتەرگە 1 شىلدەگە دەيىن تاراز قالاسى, مەركى جانە تالاس اۋداندارىنىڭ اكىمدىكتەرى سياقتى سەرۆيستىك رەجيمگە كوشۋ تاپسىرىلدى.
جامبىل وبلىسى
